ឧត្តរមានជ័យ ៖ ប្រជាពលរដ្ឋរាយការណ៏ថាក្រុមហ៊ុនហួតម៉េងរីតា កំពុងធ្វើសកម្មភាព ប្រមូលទិញឈើប្រណីតពីប្រជាពលរដ្ឋ ដោយជំនាញរដ្ឋបាលព្រៃឈើឆ្លើយថា ជាក្រុមហ៊ុនមានច្បាប់ និងអាជ្ញាប័ណ្ណត្រឹមត្រូវ ទើបគេហ៊ានប្រមូលទិញឈើទាំងនេះ ។
តាមសេចក្តីរាយការណ៍ឲ្យដឹងទៀតថា ក្រុមហ៊ុនកំពុងប្រមូលទិញឈើប្រណីតធ្នង់ ដែលប្រជាពលរដ្ឋបានចូលទៅកាប់ពីតំបន់ព្រៃសហគមន៍ ព្រៃបរិស្ថាន តំបន់ព្រៃស្អាក់ និងព្រៃដែនជម្រកសត្វព្រៃគូលែន-ព្រហ្មទេព ដែលនៅក្បែរទីតាំងឃ្លាំងរបស់ក្រុមហ៊ុន និងបានធ្វើការប្រមូលពីទិញពីអ្នកភូមិ ដែលចូលទៅកាប់ឈើចេញពីព្រៃជាប់តំបន់ព្រំដែនក្នុងទឹកដីកម្ពុជា ហើយដឹកតាមរថយន្តកាមរីប្រភេទច្នៃ ឬរថយន្តផ្សេងៗ យកទៅស្តុកទុកនៅក្នុងទីតាំងឃ្លាំងរបស់ក្រុមហ៊ុនតែម្តង ដែលនៅជាប់នឹងផ្លូវជាតិលេខ ៦៨B ក្បែរស្នាក់ការផ្នែករដ្ឋបាលព្រៃឈើ ចំណុចអណ្តូងបី ក្នុងភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
លោក ឃុន ប៊ុនហេង នាយផ្នែករដ្ឋបាលព្រៃឈើប្រចាំស្រុកអន្លង់វែង និងស្រុកត្រពាំងប្រាសាទ បានបំភ្លឺតាមទូរស័ព្ទប្រាប់បណ្តាញព័តមានក្នុងស្រុកមួយថា ឈើដែលស្តុកទុកនៅក្នុងឃ្លាំងក្រុមហ៊ុនហួតម៉េងរីតា មានអាជ្ញាប័ណ្ណច្បាប់ត្រឹមត្រូវ និងមានលិខិតស្នាមក្នុងការប្រមូលទិញឈើ ។
ប្រជាពលរដ្ឋ រស់នៅក្បែរស្នាក់ការក្រុមហ៊ុនឲ្យដឹងទៀតថា ជារៀងរាល់ថ្ងៃមានរថយន្តប្រភេទកាមរី និងរថយន្តប្រភេទពីរបាំង បានដឹកឈើចូលទៅទម្លាក់ក្នុងឃ្លាំងក្រុមហ៊ុន ដែលភាគច្រើនសុទ្ធតែជាប្រភេទឈើធ្នង់ ស្តុកទុកប្រហែលជា៤០ទៅ៥០ម៉ែត្រគូប ។ ចំណែកដីព្រៃ ក្នុងដែនក្រុមហ៊ុន គឺពុំមានព្រៃនៅសេសសល់នោះទេ តែក្រុមហ៊ុនបានប្រមូលទិញឈើពីប្រជាពលរដ្ឋដែលកាប់ពីតំបន់អភិរក្សផ្សេងៗ ក្នុងស្រុកអន្លង់វែង រួចដឹកទៅស្តុកទុកនៅទីតាំងឃ្លាំង ដោយសំអាងលើអាជ្ញាប័ណ្ណដីសម្បទានសេដ្ឋកិច្ចរបស់ខ្លួន ។
យើងពុំអាចសុំការបំភ្លឺពីក្រុមហ៊ុនបានទេព្រោះពុំមានលេខទូរសព្ទ័ តែនិងព្យាយាមទំនាក់ទំនង៕
