ត្បូងឃ្មុំ ៖ តាមបទបញ្ជារបស់លោកស្នងការខេត្តត្បូងឃ្មុំ កម្លាំងបង្ក្រាបរបស់នគរបាលសេដ្ឋកិច្ចខេត្ត ដែលតែងតែចេញល្បាតជារៀងរាល់ថ្ងៃក្នុងដែនប្រតិបត្តិការរបស់ខ្លួន ក៏ពើបប្រទះ រថយន្តដឹកបទល្មើសឈើប្រណឹត កំពុងធ្វើចរាចរណ៍លើកំណាត់ផ្លូវជាតិលេខ៧ កម្លាំងបានដេញស្ទាក់ចាប់បានទាំងព្រឹកព្រលឹមថ្ងៃទី៤ ខែសីហា ឆ្នាំ២០១៧ ត្រង់ចំណុចផ្លូវលំស្ថិតក្នុង ភូមិច្របក់ភ្លោះ ឃុំពញាក្រែក ស្រុកពញាក្រែក ខេត្តត្បូងឃ្មុំ តៃកុងរថយន្តបានលោតរត់ទាំងព្រលឹងចុងសក់ ចេញបាតជើងសព្រាតបាត់ស្រមោលតែម្តងទៅ ហើយនៅល្ងាចថ្ងៃទី៤ ខែសីហា ឆ្នាំ២០១៧ នគរបាលសេដ្ឋកិច្ចនៃស្នងការដ្ឋានខេត្ត កម្លាំងខណ្ឌរដ្ឋបាលព្រៃឈើខេត្ត និងលោកព្រះរាជអាជ្ញារងខេត្ត បានឯកភាពគ្នាជាឯកច្ឆ័ន្ទ ត្រួតពិនិត្យរាប់ឈើក្រញូងដែលបង្រ្កាបបាន។
នគរបាលសេដ្ឋកិច្ចខេត្តបានបញ្ជាក់ឲ្យដឹងថា នៅពេលកម្លាំងចេញល្បាតបានប្រទះឃើញរថយន្តលុចស៊ីស 300 មានពាក់ស្លាកលេខ ភ្នំពេញ 2P.0752 ពណ៍ទឹកប្រាក់ បើកបរក្នុងល្បឿនយ៉ាងលឿន កម្លាំងដាក់ការសង្ស័យថា ជារថយន្តល្មើស ហើយបានរាយការណ៍ទៅលោកនាយការិយាល័យប្រឆាំងបទល្មើសសេដ្ឋកិច្ចខេត្ត ទៅលោកស្នងការខេត្ត ហើយលោកស្នងការខេត្ត បានសុំគោលការណ៍ ទៅលោកព្រះរាជអាជ្ញាអមសាលាដំបូងខេត្ត និងលោកអភិបាលខេត្តដើម្បីស្នើសុំការបង្ក្រាប មានការសម្របសម្រួល និងការឯកភាព ។
កម្លាំងបានបើករថយន្តធ្វើការដេញស្ទាក់ចាប់យ៉ាងក្តៅគគុក ហើយក៏ក្របួចបាននូវចំណុចខាងលើ ជាលទ្ធផលរឹបអូសបានឈើក្រញូងចំនួន១៣១ដុំ ស្មើនឹង៥០៧គីឡូក្រាម ហើយបច្ចុប្បន្ន ក្រោយពីកម្លាំងសហការរាប់ហើយបានប្រគល់ជូនខណ្ឌរដ្ឋបាលព្រៃឈើត្បូងឃ្មុំ ដើម្បីយកទៅរក្សាទុកនៅផ្នែករដ្ឋបាលព្រៃឈើមេមត់ ហើយរថយន្តល្មើសត្រូវរក្សាទុកនៅស្នងការដ្ឋាននគរបាលខេត្តត្បូងឃ្មុំផងដែរ ។
គួររំលឹកថា នៅចំណុចច្រករបៀងដូចជា ចាន់មូល ដូនរ័ត្ន ត្រពាំងឬស្សី បឹងជ្រោង និងទន្លេចាម មានរថយន្តច្នៃ រថយន្តលុចស៊ីស រថយន្តហាយឡែនដ័រ ដឹកឈើចេញ ទៅប្រទេសវៀតណាមយ់ាងរលូន ដោយសារមេព្រៃអសមត្ថភាពក្នុងការបង្ក្រាប ៕
