កំពង់ធំ ៖ នៅព្រឹកថ្ងៃទី០២ ខែសីហា ឆ្នាំ២០១៧ ឯកឧត្តម សុខលូ អភិបាលខេត្តកំពង់ធំ បានដឹកនាំគណៈកម្មការក្រុមការងារសំបូរព្រៃគុក និងក្រុមការងារក្រសួងវប្បធម៌វិចិត្រសិល្បះ រួមទាំងមន្ទីរពាក់ព័ន្ឋជុំវិញខេត្តកំពង់ធំ ចូលរួមចុះត្រួតពិនិត្យ នៅទីតាំងប្រាសាទសំបូរព្រៃគុក ដែលត្រៀមប្រារព្វពិធីបួងសួងសុំសេចក្តីសុខនិងអបអរសាទរ នៅថ្ងៃទី៧សីហាឆ្នាំ២០១៧ ខាងមុខនេះ។
គណៈកម្មការរៀបចំពិធី ឯកឧត្តម សុខលូ បានបញ្ជាក់ថា ពិធីនេះបានប្រារព្វធ្វើចំនួន៤ទីតាំង សម្រាប់ការប្រារព្វពិធីសូត្រក្រុងពាលី ទី១ ចំណុចប្រាសាទជ្រៃ ទី២ ប្រាសាទតោ ទី៣ ប្រាសាទសំបូរ និងទី៤ ប្រាសាទយាយព័ន្ឋ ដែលនឹងត្រូវបានប្រារព្វចាប់ពីរសៀលថ្ងៃទី ៦ ខែ សីហា ឆ្នាំ២០១៧ និងឈានដល់ការប្រារព្វពិធីធំ នៅព្រឹកថ្ងៃទី០៧ ខែសីហា ឆ្នាំ២០១៧ ដែលមានវត្តមានប្រមុខដឹកនាំរាជរដ្ឋាភិបាលអញ្ជើញ ចូលរួមក្នុងពិធីបួងសួងសុំសេចក្តីសុខនិងអបអរសាទរ ការបញ្ជូលតំបន់ប្រាសាទសំបូរព្រៃគុកជាសម្បត្តិបេតិកភណ្ទពិភពលោក ។
ក្នុងបេសកកម្មដឹកនាំគណកម្មការរៀបចំទីតាំងដើម្បីប្រារព្វពិធីនេះ មានការចូលរួមពីសំណាក់ ឯកឧត្ត ឃឹម សារិទ្ធ រដ្ឋលេខាធិការក្រសួងវប្បធម៌ វិចិត្រសិល្បះ អមដំណើរដោយ ឯកឧត្តម សុខ លូ អភិបាល នៃគណៈអភិបាលខេត្តកំពង់ធំ រួមទាំងអភិបាលរង អាជ្ញាធរមូលដ្ឋាន និងកងកម្លាំងប្រដាប់អាវុធទាំង៣ប្រភេទ ចូលរួម ដើម្បីរៀបចំសណ្តាប់ធ្នាប់ សុវត្ថិភាព សន្តិសុខ អនាម័យ ដើម្បីបញ្ជៀសការកកស្ទះចរាចរណ៏តាមដងផ្លូវផងដែរ។
ជាមួយគ្នានេះបងស្រី ប៉ិលប៉ក់ អាជីវករលក់ដូរវត្ថុអនុស្សាវរីយ៏បានឲ្យដឹងថា ក្រោយពីដំណឹងប្រកាសជាផ្លូវការថា តំបន់ប្រាសាទសំបូរព្រៃគុកត្រូវបានបញ្ជូល ជាសម្បត្តិបេតិកភ័ណ្ទពិភពលោក រយៈពេលកន្លងទៅនេះ ប្រជាពលរដ្ឋ ក៏ដូចជាអាជីវករ លក់ដូរនៅតំបន់នោះ បានបង្ហាញនូវទឹកមុខស្រស់ស្រាយ សប្បាយរីករាយ បន្ទាប់ពីបានបញ្ជូលរមណីយដ្ឋានប្រាសាទសំបូរព្រៃគុក ជាសម្បត្តិបេតិកភណ្ទពិភពលោក ជាផ្លូវការកំណើនភ្ញៀវ ទេសចរណ៍ជាតិនិងអន្តរជាតិមានការកើនឡើងពីមួយថ្ងៃទៅមួយថ្ងៃ ការលក់ដូរដាច់ជាងពេលមុន ក្នុង១ថ្ងៃៗពួកគាត់លក់បានចាប់ពី២០ម៉ឺនទៅ៣០ម៉ឺនរៀល អាចឲ្យគាត់មានជីវភាពធូធារជាងមុន៕
