ខេត្តស្ទឹងត្រែង ៖ គេកត់សំគាល់ឃើញថា មេឈ្មួញជួញដូរសត្វព្រៃ នៅលើទីផ្សារស្ទឹងត្រែង គឺជាមនុស្សដដែលៗ ដោយបានដាក់តាំងលក់សាច់សត្វព្រៃជាច្រើនប្រភេទ ហាក់គ្មានក្រែងរអារដល់អាជ្ញាធរដែនដី និងមន្ត្រីជំនាញបង្ក្រាបសត្វព្រៃនោះទាល់តែសោះ។
នៅព្រឹកថ្ងៃ១សីហា ឈ្មួញដាក់តាំងលក់យ៉ាងសំបូណ៏បែប សាច់សត្វព្រៃច្រើនប្រភេទ មានសាច់ជ្រូកព្រៃស្រស់ សាច់ឈ្លុសស្រស់ ងៀតសាច់ឈ្លុស សាច់សត្វប្រើសស្រស់ ងៀតសាច់ប្រើស សត្វអណ្តើករស់ សត្វត្រកួតរស់ ព្រមទាំងសាច់សត្វព្រៃជាច្រើនប្រភេទទៀត នៅលើផ្សារសាមគ្គីស្ទឹងត្រែង ហើយគេក៏មិនបានឃើញមន្ត្រីជំនាញ និងមន្ត្រីនៅក្នុងស្ថាប័នពាក់ព័ន្ធនានាជាច្រើនទៀត ចុះទៅបង្ក្រាបនោះទេ។
ប្រភពបានទម្លាយឲ្យដឹងថា ក្រុមឈ្មួញទាំងនេះ ត្រូវគេដកស្រង់សម្តី ដោយអួតអាងថាការដាក់តាំងលក់សាច់សត្វព្រៃគ្រប់ប្រភេទ នៅលើផ្សារខេត្ត ហើយមិនមានខ្លាចក្រែងចំពោះការចុះបង្ក្រាបរបស់សមត្ថកិច្ចនោះ ពួកគេមិនខ្លាចការបង្ក្រាបពីអាជ្ញាធរមានសមត្ថកិច្ចនោះទេ ព្រោះត្បិតពួកគេបានបង់លុយប្រចាំថ្ងៃ ប្រចាំខែ ទៅឲ្យមន្ត្រីមានតួរនាទីបង្ក្រាបទាំងនោះអស់ទៅហើយ ដូច្នេះគ្មានអ្វីគួរឲ្យព្រួយបារម្ភនោះឡើយ ហើយបើអ្នកកាសែតថតអីក៏ថតទៅ ពួកគេមិនខ្វល់ខ្វាយឡើយ។
ប្រជាពលរដ្ឋក្នុងខេត្តស្ទឹងត្រែង បានសម្តែងការព្រួយបារម្ភពីការបាត់បង់សត្វព្រៃ និងបានស្នើដល់អាជ្ញាធរមានសមត្ថកិច្ចពាក់ព័ន្ធទាំងអស់ មិនគួរមើលរំលងការបរបាញ់ ការចាប់ និងជួញដូរសត្វព្រៃ និងសាច់សត្វព្រៃទាំងនេះផង។
អ្នកយកព័ត៌មាន មិនអាចសុំការបំភ្លឺពី លោក លាង សេង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បាន ព្រោះពុំមានលេខទូរសព្ទ័ តែរង់ចាំការបំភ្លឺជានិច្ច៕
