កំពង់ធំ ៖ បន្ទាប់ពីអភិបាលរងស្រុកសន្ទុក ខេត្តកំពង់ធំ ម្នាក់ត្រូវបានសាលាដំបូងរាជធានីភ្នំពេញ បង្គាប់ឲ្យឃុំខ្លួនក្នុងពន្ធនាគារព្រៃស ដោយចោទពីបទ «ឆបោក» ប្រាក់ជាង ២ លានដុល្លារ ពីសាច់ញាតិសម្តេចនាយករដ្ឋមន្ត្រី ហ៊ុន សែន កាលពីថ្ងៃ ១៧ កក្កដា ឆ្នាំ២០១៧ កន្លងទៅនេះ។ ក្រោយពីដំណឹងរសើបមួយនេះ បានផ្សព្វផ្សាយជាសាធារណៈភ្លាម ប្រភពពីមន្ត្រីស្អាតស្អំមួយចំនួនបានខ្សិបប្រាប់ថា ពួកគាត់សង្កេតឃើញក្រុមការងារស៊ីដាច់លុយជាង២លានដុល្លារអាមេរិក តាមរូបភាពរៀបដីខ្យល់ទំហំ ១៥០០ហិកតា ជាច្រើននាក់ ភ័យស្លន់ស្លោរបានណាត់ជួបជំគ្នា ដើម្បីរកដីឲ្យគ្រប់ ១៥០០ហិកតា ប្រគល់ជូនអ្នកស្រីសាច់ញាតិសម្តេចនាយករដ្ឋមន្ត្រី។
ប្រភពដដែលបានបន្តថា ក្រោយពីបានណាត់ជួបជំគ្នាជាច្រើនដងមក គេឃើញលោក សន វឿន ស្មៀនឃុំកកោះ និងលោក កែន សុភាន់ លោកពក ម៉ៃ មេភូមិទួលចាន់ ព្រមទាំងលោក ញឹប មេភូមិចំបក់ខាងជើង ដឹកនាំក្រុមបក្ខពួករបស់ខ្លួនរំលោភឈូសឆាយយកដីព្រៃតំបន់៣ ដែលជាតំបន់ព្រៃលិចទឹកសម្រាប់ត្រីពងកូន នៅក្នុងរដ្ឋបាលឃុំព្នៅ បំផ្លាញព្រៃលិចទឹករបស់រដ្ឋ រាប់រយហិកតាអស់គ្នានសល់ ចំណុច ដែលរងការបំផ្លាញយ៉ាងមហន្តរាយទាំងស្រុងនេះ រួមមាន ១ចំណុចទួលគោក ២ទួលដំរីស្លាប់ ៣ទួលទ្រា ៤ទួលទទឹងថ្ងៃ ៥ ទួលទីទុយ ៦បឹងចំណារ ៧បឹងព្រោះ ៨បឹងចាមបាច ក្នុងគោលបំណងប្រមូយកដីទាំងអស់នោះលក់បន្តទៅឲ្យឈ្មួញ។
ទាក់ទងនិងរឿងខាងលើ លោក កែន សុភាន់ ជាមេការរបស់ជនសង្ឃ័យឈ្មោះ អ៊ឹម ឆន បានប្រាប់តាមទូរស័ព្ទថា ខ្លួនពិតជាមានដីនៅតំបន់នោះដែរ លោកថា អ្នកដែលមានដីច្រើនជាងគេនៅតំបន់នោះ គឺឈ្មោះ រឿន នៅភូមិទួលចំបក់ខាងជើងមានជាងជិត២០០ហិកតាឯណុះ។
ចំណែកលោក ពក ម៉ៃ មេភូមិទូលចាន់ ឃុំតាំងក្រសាំង បានប្រាប់តាមទូរស័ព្ទដែរថា ក្រុមខ្លួនមានគ្នាប្រាំបីនាក់ ក្នុងនោះមានឈ្មោះលោក ភាន់ ផងដែរ មានដីតែ៦០ហិកតាទេដែលបានភ្ជួរហើយ។
ទោះយ៉ាងណាលោក យស បញ្ញាឫទ្ធិ អភិបាលស្រុកសន្ទុក ធ្លាប់បានគាំទ្រចម្លើយលោក អ៊ឹម ឆន ដោយបញ្ជាក់ថា ដីនោះគឺក្រុមការងារលោក អ៊ឹម ឆន បានប្រគល់ជូនអ្នកស្រីរួចហើយ ខណៈក្រុមហ៊ុនកំពុងអភិវឌ្ឍន៍លើដីនោះ។
ប្រជាពលរដ្ឋភាគច្រើន ដែលអាស្រ័យផលពីស្រែប្រាំងបានបង្ហាញថា ក្រុមស៊ីដាច់លុយជាង២លានដុល្លារអាមេរិក តាមរូបភាពរៀបដីខ្យល់ទាំងអស់នេះ មិនដែលខ្លាច និងញញើតច្បាប់ទេ សូមបីតែលុយសាច់ញាតិសម្តេចនាយករដ្ឋមន្ត្រី ហ៊ុន សែន ក៏ហ៊ានឆបោកដែរ ចុះពលរដ្ឋវិញ តើយ៉ាងណាទៅ?។ពួកគាត់បន្តទៀតថា នៅចំណុចខាងលើ ឥឡូវនេះ បានក្លាយទៅជាវាលស្រែប្រាំងអស់ទៅហើយ បឹងទន្លេសាប អស់មានព្រៃ សម្រាប់ត្រីពងកូនទៀតហើយ ក្រោមឥទ្ធិពលរបស់ក្រុមការងារស៊ីដាច់លុយជាង២លានដុល្លារអាមេរិក តាមរូបភាពរៀបដីខ្យល់នេះ មិនដែលឃើញមាន មន្ត្រីជំនាញណាចុះបង្ក្រាបឡើយ។
យ៉ាងណាជុំវិញការលើកឡើងខាងលើនេះ ប្រជាពលរដ្ឋ សង្ឃឹមយ៉ាងមុតមាំថា ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ លោកនិងបង្កើតគណៈកម្មការចុះសាវស្រាវដោយតម្លាភាព ហើយសង្ឃឹមថា ក្រុមជនខិលខូចនិងត្រូវបានយកមកផ្តន្ទាទោស តាមផ្លូវច្បាប់ជាក់ជាមិនខាន៕
