ខេត្តឧត្តរមានជ័យ ៖ក្រុមឈ្មួញបានដាក់ទុនអោយប្រជាពលរដ្ឋ ចុះកាប់ឈើប្រភេទលេខពីរ និងធ្វើការដឹកជញ្ជូនតាមរទេះគោនិងតាមគោយន្តកន្ត្រៃ នៅស្រុកត្រពាំងប្រាសាទ ដោយគេយកមកស្តុកទុកនៅភូមិត្រាំប៉ោង ឃុំព្រះប្រឡាយ និងមួយកន្លែងទៀតនៅចំនុចដីក្រហម ភូមិថ្នល់កែង ឃុំត្រពាំងប្រាសាទ។ទីតាំងទាំងពីរខាងលើជាកន្លែងសំចតឈើ មុនពេលឈ្មួញធ្វើការដឹកជញ្ជូនយកទៅចែកចាយនៅដេប៉ូតាមបណ្តាខេត្តនាៗដូចជា សៀមរាប បន្ទាយមានជ័យ និងខេត្តបាត់ដំបង ហើយសកម្មភាពខាងលើគេប្រព្រិត្តទៅជាច្រើនឆ្នាំមកហើយ។
ឈ្មួញរកស៊ីឈើខុសច្បាប់ខាងលើត្រូវបានគេស្គាល់ឈ្មោះ ឆាយ ដោយរូបគេបានអះអាងថាការដឹកជញ្ជូនឈើខាងលើ គឺគេដឹកអោយលោកឧត្តមសេនីយ៏ឯក ង៉ែត ចាន់ថុន ហៅ 51 តួនាទីនាយរងសេនាធិការចំរុះប្រចាំទិសភូមិភាគ 4 ដើម្បីយកទៅធ្វើផ្ទះអោយនិវត្តជនគ្រួសារកងទ័ព។ដោយហេតុផលនេះហើយទើបការដឹកជញ្ជូនឈើខុសច្បាប់ខាងលើ ពុំដែលមានមន្រ្តីជំនាញឬស្ថាប័នពាក់ព័ន្ធណាហ៊ានសួរនាំឬត្រួតពិនិត្យនោះឡើយ ដោយសារតែបក្សពួកនិយមនិងអំណាចទើបធ្វើអោយមន្រ្តីក្នុងស្ថាប័នទាំងនោះយករួចខ្លួនរៀងៗខ្លួន។
ជាក់ស្តែងកាលពីថ្ងៃទី 22 ខែកក្កដា ឆ្នាំ 2017 មានគោយន្តកន្រ្តៃបីគ្រឿងដឹកឈើជាច្រើនម៉ែតគូប ចេញពីស្រុកត្រពាំងប្រាសាទឆ្លងកាត់ស្រុកអន្លង់វែង ឆ្ពោះទៅកាន់ដេប៉ូស្រុកវ៉ារិន ខេត្តសៀមរាប តែសំណាងមិនល្អក្នុងចំណោមគោយន្តបីគ្រឿង មួយគ្រឿងបានខូចកណ្តាលផ្លូវនៅស្រុកអន្លង់វែងត្រូវបានប្រជាពលរដ្ឋបានរាយការណ៏ទៅមន្រ្តីជំនាញរដ្ឋបាលព្រៃឈើ ភ្លាមនោះគេឃើញមានមន្រ្តីផ្នែករដ្ឋបាលព្រៃឈើម្នាក់ ដែលគេស្គាល់ឈ្មោះ រ៉ម ចុះទៅដល់ តែត្រូវបានតៃកុងគោយន្តដឹកឈើប្រាប់ថាជាឈើរបស់លោកឆាយ ស្រាប់តែមន្រ្តីផ្នែករដ្ឋបាព្រៃឈើនោះភ័យស្លន់ស្លោ ហើយបើករថយន្តចេញទៅវិញយ៉ាងលឿនដោយមិននិយាយអ្វីទាំងអស់។
ពាក់ពន្ធករណីរឿងលោកឆាយដឹកជញ្ជូនឈើលេខពីរដុះស្លែកាន់ឆ្នាំ លោក ឃុន ប៊ុនហេង នាយផ្នែករដ្ឋបាលព្រៃឈើស្រុកត្រពាំងប្រាសាទនិងស្រុកអន្លង់វែងបានអោយពត័មានក្នុងស្រុកដឹងថា បញ្ហាលោកឆាយដឹកជញ្ជូនឈើថ្មីៗនេះ លោកមិនបានដឹងទេ តែកន្លងមកគេមានច្បាប់។
ដោយឡែកលោកឧត្តមសេនីយឯក ង៉ែត ចាន់ថុន ហៅ 51 បានថ្លែងថា កន្លងមកលោកបានជួលរថយន្តលោក ឆាយដើម្បីដឹកជញ្ជូនឈើយកទៅធ្វើផ្ទះអោយអតីតយុទ្ធជននិវត្តមែន ហើយលោកក៍ទទួលស្គាល់ដែរថាពិតជាមានករណីយកឈើទៅលក់តាមដេប៉ូផងដែរ ដោយក្រោមពាក្យស្លោក ថា ត្រីងៀតឈ្លៀតពង៕
