កំពង់ធំ ៖ ថ្ងៃទី២៦ ខែកក្កដា ឆ្នាំ២០១៧ បន្ទាប់ពីបានដឹកនាំកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្តរួចមក ឯកឧត្តម សុខ លូ អភិបាលខេត្តកំពង់ធំ និងក្រុមការងារ បានចុះត្រួតពិនិត្យស្ថានភាពកម្ពស់ទឹកតាមដងស្ទឹងសែន ខេត្តកំពង់ធំ នៅវេលាម៉ោង ១១និង៣០នាទី។ តាមរបាយការណ៍របស់លោក យូ ឡា ប្រធានមន្ទីរធនធានទឹកនិងឧតុនិយមបានបញ្ជាក់ អំពីស្ថានភាពទឹកនាថ្ងៃ២៦ ខែកក្កដា ឆ្នាំ២០១៧ នៅខេត្តកំពង់ធំ មានដូចខាងក្រោម:
- កំពស់ទឹកស្ទឹងសែន 13.07ម
- សីតុណ្ហភាព 24°C-34°C
- យប់មិញមានភ្លៀងធ្លាក់នៅស្រុក-ក្រុងចំនួន8/8
+ក្រុងស្ទឹងសែន 38.4ម.ម
+ស្រុកកំពង់ស្វាយ 14.8ម.ម
+ស្រុកសណ្តាន់ 35.0ម.ម
+ស្រុកប្រាសាទបល្ល័ង្ក59.6ម.ម
+ស្រុកប្រាសាទសំបូរ 25.4ម.ម
+ស្រុកស្ទោង 10.2ម.ម
+ស្រុកសន្ទុក 38.1ម.ម
+ស្រុកបារាយណ៍ 45.8ម.ម
តាមការសន្និដ្ឋានពេលនេះ ទឹកស្ទឹងសែនសម្រាប់ខេត្តកំពង់ធំ មិនទាន់គួរអោយបារម្ភនៅឡើយទេ ដោយយោងថា កំពស់ទឹកថ្ងៃនេះ 13.07ម កើនលើសពីម្សិលមិញ 0.08ម កើនយឺតក្នុង 24ម៉ោង ហើយកំពស់ប្រកាសការប្រុងប្រយ័ត្ន 13.50ម.ម។ បញ្ហាប្រឈមនឹងគ្រោះធម្មជាតិមួយនេះ អភិបាលខេត្ត បានប្រាប់ទៅអភិបាលស្រុក ក្រុងទាំង៨ ត្រូវចុះពិនិត្យ និងកំណត់ទីតាំងទួលសុវត្ថិភាពជាបន្ទាន់ ព្រមទាំងមានវិធានការណ៍ជាក់ស្តែង ដើម្បីត្រៀមរកទីទួលមានសុវត្ថិភាពជូនបងប្អូនប្រជាពលរដ្ឋ កុំឲ្យមានគ្រោះថ្នាក់ដោយប្រការណាមួយ និងផ្តល់របាយការណ៍មកឲ្យរដ្ឋបាលសាលាខេត្តឲ្យបានជារៀងរាល់ថ្ងៃ ចាប់ពីថ្ងៃនេះតទៅ។
លោក អភិបាលខេត្ត សូមអំពាវនាវឲ្យប្រជាពលរដ្ឋទាំងអស់ សូមមេត្តាមានការប្រុងប្រយ័ត្នចំពោះគ្រោះធម្មជាតិមួយនេះ និងរាយការណ៍ជូនអាជ្ញាធរតាំងពីថ្នាក់ឃុំ រហូតដល់ថ្នាក់ខេត្ត ដើម្បីមានវិធានការណ៍ ជួយសង្រ្គោះទាន់ពេលវេលា។ គួរបញ្ជាក់ផងដែរថា ក្រសួងធនធានទឹក និងឧតុនិយម បានជូនដំណឹងបន្ថែម អំពីស្ថានភាពអាកាសធាតុ និងស្ថានភាពទឹកជំនន់ ដោយសារឥទ្ធិពលព្យុះទី៨ ឈ្មោះ សុនកា ដែលធ្វើឲ្យកម្ពុជា នឹងមានភ្លៀងធ្លាក់ខ្លាំង ហើយស្ថានភាពទឹកជំនន់នឹងហក់ឡើងខ្ពស់ ចាប់ពីថ្ងៃទី២៥ ដល់ថ្ងៃទី២៧ ខែកក្កដា៕ សុផាត
