បាត់ដំបង ៖ កាលពីចុងសប្តាហ៍នេះ សមត្ថកិច្ចចំរុះ បានបើកប្រតិបត្តិការបង្ក្រាបទីតាំងស្តុកឈើចំនួន២កន្លែង របស់ឈ្មួញរកស៊ីឈើខុសច្បាប់ដុះស្លែនៅស្រុកសំឡូត ដែលតែងតែដឹកជញ្ជូនឈើប្រណឹតយ៉ាងគគ្រឹកគគ្រេងមិនមានសមត្ថកិច្ច ឫមន្ត្រីជំនាញណាហ៊ានបង្ក្រាប។
លោក រស់ សុខធឿន ប្រធានក្រុមការងារ ជំនាញរបស់គណៈកម្មាការក្រសួងមហាផ្ទៃ ដឹកនាំការបង្រ្កាបសហការជាមួយវរះការពារព្រំដែនគោគលេខ៣១០ មន្ត្រីដែនជំរកសត្វព្រៃភ្នំសំកុរ (បរិស្ថាន) កងរាជអាវុអហត្ថ និងអធិការដ្ឋានស្រុកសំឡូត ក្រោមការសម្របសម្រួលពីលោកព្រះរាជអាជ្ញាអមសាលាដំដូងខេត្តបាត់ដំបង ។
ការចុះឆែកឆេរនេះ គឺក្រោយពីមានសេចក្តីរាយការណ៍ពីប្រជាពលរដ្ឋថា មានបទល្មើស និងនៅប៉ុន្មានថ្ងៃមុននេះ មានពលរដ្ឋខ្មែរយើងចូលទៅកាប់ឈើនៅទឹកដីថៃត្រូវបានគេដេញចាប់ទៀតផង ទើបកម្លាំងយើងចុះប្រតិបត្តការនៅតំបន់នោះ ក្រោយពីធ្វើការឆែកឆេរផ្ទះលោកស្រី ចាប សៀងអេង មានប្តីឈ្មោះ ធុក វណ្ណា ជាយោធា មានមុខងារជាអនុប្រធានកងអនុសេនាធំទី១ រស់នៅភូមិវាលរលឹម កម្លាំងចម្រុះក៏រឹបអូសបានឈើប្រណិតចំរុះជាង២ម៉ែត្រគូប រថយន្ត២គ្រឿង តែមិនបានឃាត់ខ្លួនម្ចាស់ផ្ទះទេ ដោយឈើទាំងនោះជារបស់ឈ្មោះ ជួបណូ ហៅចូវ ជាមន្ត្រីប៉េអឹម នៅខេត្តបាត់ដំបង ។
បន្ទាប់មកកម្លាំងចម្រុះក៏បានធ្វើការបង្ក្រាបមួយករណីទៀត ស្ថិតនៅភូមិភ្នំរ៉ៃ ឃុំតាតោក ស្រុកសំឡូត ដោយរឹបអូសបានឈើគ្រញូងចំនួនចំនួន៧៦ដុំ ស្មើនិង៤៥០គីឡូក្រាម ឈើនាងនួន៣៥ដុំ និងឈើធ្នុង៤សន្លឹក សរុបស្មើនិងកន្លះម៉ែត្រគូប ចំណែកម្ចាស់រត់បាត់ស្រមោល។
លោក រស់ សុខធឿន ក៏បានអំពាវនាវដល់ពលរដ្ឋខ្មែរយើងសូមកុំចូលទៅទឹកដីគេដោយខុសច្បាប់ជាដាច់ខាតព្រោះជាទង្វើខុសច្បាប់គេអាចធ្វើបាបយើងគ្រប់ៗពេល។
បច្ចុប្បនវត្ថុតាងត្រូវមន្ត្រីបរិស្ថានរក្សាទុកនៅស្នក់ការរងចាំកសាងសុំណុំរឿងបញ្ជូនទៅតុលាការចាត់ការតាមផ្លូវច្បាប់៕
