កំពង់ធំ ៖ កាលពីព្រឹកថ្ងៃទី១៩ ខែកក្កដា ឆ្នាំ២០១៧ នេះ ខណ្ឌរដ្ឋបាលជលផល ខេត្តកំពង់ធំ បានសហការ ជាមួយអង្គការដៃគូរ អាជ្ញាធរមូលដ្ឋាន និងសហគមន៍នេសាទជាច្រើន ប្រារព្វធ្វើពិធីលែងកូនត្រីចម្រុះ សរុបចំនួន៨ម៉ឺនក្បាល ចូលទៅក្នុងទំនប់អូរម្កាក់ គឺជាបឹងធម្មជាតិរបស់សហគមន៍ ភូមិត្រពាំងឬស្សី ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
យោងតាមរបាយការណ៍ នាយខណ្ឌរដ្ឋបាលជលផលខេត្តកំពង់ធំ បានឲ្យដឹងថា ការលែងកូនត្រីនេះ ប្រភេទកូនត្រីពូជចំនួន៥ម៉ឺន កូនត្ឆ្ពិន៣ម៉ឺនកូន ត្រីកាហែ៩០០០កូន ត្រីកន្ធរ០០០កូន ចូលទៅក្នុងបឹងធម្មជាតិវិញ ដើម្បីឱ្យសម្បូរត្រីសម្រាប់បំរើសេចក្តីត្រូវការរបស់ប្រជាពលរដ្ឋ ក្នុងសហគមន៍។
ក្នុងពិធីនោះ ឯឧត្តម សុខ លូ អភិបាលខេត្តកំពង់ធំ បានពន្យល់ទៅដល់បងប្អូនប្រជាពលរដ្ឋថា ការលែងកូនត្រីចូលទៅក្នុងបឹង ស្ទឹង ទន្លេរបស់សហគមន៍ ក្នុងរដូវបិទនេសាទនេះ គឺក្នុងគោលបំណង ដើម្បីបង្កើនផលត្រី ឲ្យកាន់តែច្រើន ព្រោះបច្ចុប្បន្ននេះ ចំនួនមនុស្សមានកាកើនឡើង ដូច្នេះមនុស្សត្រូវតែចិញ្ចឹមត្រីវិញ ទើបអាចមានស្បៀងអាហារ សម្រាប់ចិញ្ចឹមមនុស្សលោក។
ឯឧត្តមបន្ត ជំរុញឨ្យមន្ត្រីជំនាញជលផលខិតខំយកចិត្តទុកដាក់ចុះបង្ក្រាបបទល្មើសនេសាទខុសច្បាប់ ពិសេសក្នុងរដូវបិតនេសាទនេះ ដើម្បីទុកឱ្យត្រីពងកូន។ ប៉ុន្តែ មិនមែនឱ្យមន្ត្រីយើងចុះទៅបង្ក្រាបមុខរបនេសាទជាលក្ខណៈគ្រួសារហើយទុកឱកាសឲ្យឈ្មួញនោះទេ។
ជាទីបញ្ចប់ឯកឧត្តម បានសំណូមពរ ដល់បងប្អូនប្រជាពលរដ្ឋ សូមមេត្តាកុំប្រើឩបករណ៍នេសាទខុសច្បាប់ ហើយចូលរួមជួយការពារផលប្រយោជន៍ យើងទាំងអស់គ្នាសម្រាប់កូនចៅជំនាន់ក្រោយ៕
