កំពង់ធំ៖ កាលពីរសៀលថ្ងៃទី១៧ ខែកក្តដា ឆ្នាំ២០១៧នេះ ស្ត្រីជនជាតិវៀតណាម និងតៃកុងឡាន សរុបចំនួន២នាក់ ត្រូវបានកម្លាំងសមត្ថកិច្ចខេត្តកំពង់ធំ ឃាត់ខ្លួនបញ្ជូនទៅកាន់តុលាការបន្ទាប់ពីសមត្ថកិច្ចបានឆែករកឃើញ រថយន្តពាក់ស្លាកលេខក្លែងក្លាយនៅភោជនីយដ្ឋានពន្លឺផ្កាយមាស នៅភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
លោក វ៉ាន់ វិបុល អធិការរងក្រុងស្ទឹងសែនបានឲ្យដឹងថា សមត្ថកិច្ចបានធ្វើការឃាត់ខ្លួនជនសង្ស័យចំនួន២នាក់ គឺផ្អែកតាមដឺការបញ្ជាឲ្យចាប់ខ្លួន របស់ប្រធានសាលាដំដូងខេត្តកំពង់ធំ លេខ១៦២៨/២០១៧ ចុះថ្ងៃទី២៧ ខែមិថុនា ឆ្នាំ២០១៧ ពីបទប្រមូលនិងដឹកជញ្ជូនផល អនុផលព្រៃឈើ គ្មានលិខិតអនុញ្ញាតិពីរដ្ឋបាលព្រៃឈើ បទដែលមានចែងក្នុងមាត្រា៩៦និង៩៨ និងប្រើឯកសារសាធារណៈក្លែងក្លាយ បទមានចែងឲ្យផ្តន្ទាទោស តាមមាត្រា៦៣០ នៃក្រមព្រហ្មទណ្ឌ! ហើយបន្ទាប់មកនៅរសៀលថ្ងៃទី១៧កក្តដានេះ សមត្ថកិច្ចបានឆែក ឃើញរថយន្តលុចសីស 470 ពណ៍ខ្មៅ ពាក់ស្លាកលេខក្លែងក្លាយ ត្រូវបានបញ្ជូនទៅសាកសួរនៅស្នងការខេត្ត
សមត្ថកិច្ចដដែល បានបន្តថា ជនសង្ស័យទី១ ឈ្មោះ ឃ្វៀង ធីម៉ាយ ភេទស្រី អាយុ៣៩ឆ្នាំ ជនជាតិវៀតណាម នៅភូមិត្រពាំងព្រៃ ឃុំត្រពាំងព្រៃ ស្រុកអន្លង់វែង ខេត្តឧត្តរមានជ័យ និងទី២ឈ្មោះ ម៉ុន ធី ភេទប្រុសអាយុ៤៥ឆ្នាំ នៅភូមិគោកដូង ឃុំទឹកវិល សៀមរាប ខេត្តសៀមរាប នៅក្នុងប្រតិបត្តិការនេះ សមត្ថកិច្ចបានដករថយន្តលុចសីស ពណ៍ខ្មៅ១គ្រឿង ពាក់ស្លាកលេខភ្នំពេញAN 4757 ទូរស័ព្ទចំនួន៣គ្រឿង កំពុងសាកសួរនៅស្នងការខេត្តកំពង់ធំ។
លោក អ៊ិត សុធា ព្រះរាជាអាជ្ញាខេត្កកំពង់ធំ បានបង្ហើបឲ្យដឹងនៅល្ងាចថ្ងៃដដែលនេះថា ជនសង្ស័យកំពុងសាកសួរនៅស្នងការខេត្ត និងបញ្ជូនបន្តទៅកាន់តុលាការនៅព្រឹកថ្ងៃទី១៨នេះ៕
