កំពង់ធំ៖ នៅវេលាម៉ោង១០ព្រឹក ថ្ងៃទី១០ ខែកក្តដា ឆ្នាំ២០១៧ អាជ្ញាធរស្រុកប្រាសាទសំបូរ ព្រមទាំងកងកម្លាំងនិងមន្ត្រីរាជការ ព្រះសង្ឍបានចូលធ្វើពិធីអបអរសាទរ នៅក្នុងបរិវេណប្រាសាទសំបូរព្រៃគុក ស្ថិតនៅក្នុងឃុំសំបូរ ស្រុកប្រាសាទសំបូរ ខេត្តកំពង់ធំដើម្បីអបអរសាទរព្រឹត្តិការណ៏ជាប្រវត្តិសាស្ត្រដ៏សំខាន់ សម្រាប់ខេត្តកំពង់ធំក៏ដូចជាព្រះរាជាណចក្រកម្ពុជាទាំងមូល។
លោកសេងមឿង នាយនគរបាលទេសចរណ៏ប្រចាំនៅតំបន់រមណីយដ្ឋានប្រាសាទសំបូរព្រៃគុក បានប្រាប់បញ្តាញព័តមានឲ្យដឹងថា នៅក្នុងរមណីយដ្ឋាននៃតំបន់ប្រាសាទសំបូព្រៃគុក មានប្រាសាទតូចធំ សរុបចំនួន២៩០ប្រាសាទ តែបច្ចុប្បន្ននៅសល់តែកំពូលប្រសាទចំនួន៦០ប្រាសាទ។
នៅក្នុងព្រឹត្តិការណ៏នេះ ឯកឧត្តម សុខ លូ អភិបាលខេត្តកំពង់ធំបានឲ្យដឹងថា នៅវេលាព្រឹកថ្ងៃទី១០នេះនៅតាមបណ្តាស្ថាប៏ននីមួយៗ គ្រប់មន្ទីរជុំវិញខេត្តទាំងអស់បានប្រារព្វ ពិធីអបអរសាទរ ចំពោះការទទួលស្គាល់និងបញ្ចូលតំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោកដ៏មហិមានេះ គឺតម្រូវឲ្យមានការ វាយគង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលអាចធ្វើទៅបាន ព្រោះថាកម្មវិធីធំ គឺបានប្រារព្វធ្វើនៅកោះពេជ្រ នាថ្ងៃទី១៧ ខែកក្តដានេះ និងត្រៀមធ្វើនៅទីតាំងតំបន់ប្រាសាទសំបូរព្រៃគុកផ្ទាល់ បន្ទាប់ពីធ្វើនៅកោះពេជ្រហើយ ដោយរង់ចាំពិភាក្សាជាមួយក្រសួងវប្បធម៍ ដើម្បីកំណត់ថ្ងៃ។
ជាមួយគ្នានេះ លោកខៀវ ប៉ាង អភិបាលស្រុកប្រាសាទសំបូរ បានរៀបចំពិធីអបអរសាទរនៅក្នុងបរិវេណប្រាសាទផ្ទាល់ ដោយមានក្រុមភ្លេងសៀម ភ្លេងពិណពៀត ក្រុមរបាំ និងច្រៀងបទភ្លេងជាតិ ជាសញ្ញាដើម្បីថែរក្សាវប្បធម៍ប្រវត្តិសាស្ត្រ។
ទន្ទឹមគ្នានេះព្រះសង្ឍដែលនិមន្តមកទស្សនានៅតំនប់ប្រាសាទព្រៃគុកផ្ទាល់ ក៏បានសម្តែងការសាទរចំពោះព្រឹត្តិការដ៏សំខាន់នេះ៕
