កំពង់ធំ ៖កម្លាំងសមត្ថកិច្ចកាំកុងត្រូលខេត្តកំពង់ធំ សហការជាមួយកម្លាំងមូលដ្ឋាន និងមន្ទីរពាណិជ្ជកម្ម ចុះត្រួតពិនិត្យរកផលិតផលខូចគុណភាព នៅក្នុងផ្សារកំពង់ឈើទាល ឃុំសំបូរ ស្រុកប្រាសាទសំបូរ ខេត្តកំពង់ធំ ដោយបានរកឃើញផលិតផលហាមឃាត់ ចាហ៊ួយត្រណាប់ដូង១១កេះធំ និងផលិតផលខូចគុណភាពមួយចំនួនទៀត នៅព្រឹកថ្ងៃទី០៥ខែកក្តដាឆ្នាំ២០១៧។
សមត្ថកិច្ចបានឲ្យដឹងថា !នៅក្នុងប្រតិបត្តិការចុះត្រួតពិនិត្យនៅផ្សារកំពង់ឈើទាលព្រឹកមិញនេះ សមត្ថកិច្ចបានឆែករកឃើញចាហ៊ួយត្រណាប់ដូងម៉ាកថាញប៊ីន ដែលផលិតនៅប្រទេសវៀតណាមចំនួន១១កេះកន្លះ ស្មើនិង៨២កញ្ចប់ធំ! ទឹកត្រចៀកកាំម៉ាក yango ចំនួន១៨កំប៉ុង ទឹកក្រូចម៉ាកCAM ចំនួន១៧ដប ភេសជ្ជៈម៉ាក RANGER ចំនួន៤៨កំប៉ុង ផលិតនៅប្រទេសថៃ ទឹកដោះគោខាប់និងម៉ីម៉ាម៉ាចំនួន១១កំប៉ុង និងទឹកក្រូចចំណុះ២១០ml ចំនួន១៨ដប។
លោក លៀង សុភា ប្រធានសាខាកាំកុងត្រូលខេត្តកំពង់ធំ បានបញ្ជាក់ថា បន្ទាប់ពីសមត្ថកិច្ចបានឆែករកឃើញ ផលិតផលហាមឃាត់គឺចាហ៊ួយត្រណាប់ដូងចំនួន២កន្លែង ដែលលក់នៅតាមស្តង់ធំៗនៅជុំវិញបរិវេណផ្សារកំពង់ឈើទាល និងបានធ្វើការផ្សព្វផ្សាយពន្យល់ដល់ក្រុមអាជីវករឲ្យបញ្ឈប់ការលក់ផលិតផលហាមឃាត់ ដែលបង្កផលប៉ះពាល់ដល់សុខភាពពលរដ្ឋ ដូចជាចាហ៊ួយត្រណាប់ដូង ម្ស៉ៅបូរ៉ាក់ និងផលិតផលប្រេងខ្យងមួយចំនួន មកពីប្រទេសចិនព្រមទាំងបានចុះបិទផូស្ទ័រ ពន្យល់ណែនាំពីការថែរក្សាគុណភាពឲ្យបានល្អដើម្បីធានាសុខភាព ហើយលោកសូមអំពាវនាវឲ្យក្រុមអាជីវករឲ្យចូលរួមសហការជាមួយកម្លាំងជំនាញដែរ
ជាមួយគ្នានេះដែរ ប្រជាពលរដ្ឋបានសាទរចំពោះសមត្ថកិច្ចកាំកុងត្រូលខេត្តកំពង់ធំ តែងតែចុះពិនិត្យជាបន្តបន្ទាប់នៅតាមទីប្រជុំជន តាមទីផ្សារនិងតាមស្តារម៉ាត ដោយយកចិត្តទុកដាក់ពីសុវត្ថិភាព និងសុខភាព ពលរដ្ឋ៕ សុផាត
