កំពង់ធំ ៖ នាព្រឹកថ្ងៃទី5 ខែកក្កដា ឆ្នាំ2017 នៅសាលប្រជុំសាលាខេត្តកំពង់ធំ បានបើកកិច្ចប្រជុំនគរបាលមន្ត្រីយុត្តិធម៍ ស្ដីពីការបូកសរុបលទ្ធផលអនុវត្តន៍ផែនការប្រយុទ្ធប្រឆាំងគ្រឿងញៀនខុសច្បាប់លើកទី1 គិតចាប់ពីខែមករា ដល់ខែមិថុនា ឆ្នាំ2017 និងលើកទិសដៅការងារអនុវត្តន៍បន្ដ ដឹកនាំដោយលោក អិត សុធា ព្រះរាជអាជ្ញាអមសាលាដំបូងខេត្កកំពង់ធំ ដោយមានការចូលរួមពី លោក អ៊ុក កុសល ស្នងការខេត្ត កងរាជអាវុធហត្ថខេត្ត នគរបាលមកពីបណ្ដាស្រុកក្នុងខេត្តកំពង់ធំ។
ឯកឧត្តម ឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ បានបញ្ចាក់យ៉ាងច្បាស់ថា សុំអោយកំលាំង សមត្ថកិច្ចនគរបាលទាំងអស់ពង្រឹងកិច្ចសហប្រតិបត្តិការគ្នា បង្រ្កាបបទល្មើសគ្រប់ប្រភេទ ជាពិសេសគ្រឿងញៀន ព្រោះគ្រឿងញៀន ធ្វើអោយគ្រោះថ្នាក់បំផុតដល់សង្គមជាតិ និងក្រុមគ្រួសារ គ្រឿងញៀនបានបំផ្លាញទ្រព្យសម្បត្តិ ក្នុងសាច់ញាតិក្រុមគ្រួសារថែមទាំងបំផ្លាញទ្រព្យសម្បត្តិអ្នកដ៏ទៃ មិនតែប៉ុណ្ណោះគ្រឿងញៀន បានកកើតជាអំពើហឹង្សា ចោរលួច ចោរប្លន់ និងអំពើឃាតកម្មជាដើម ដូច្នេះកងកំលាំងសមត្ថកិច្ចទាំងអស់ ត្រូវសហការណ៍ជាមួយអាជ្ញាធរមូលដ្នានគ្រប់ភូមិឃុំ ស្រុក ដើម្បីបង្រ្កាបបទល្មើសទាំងនេះអោយអស់។
លោក អិត សុធា ព្រះរាជអាជ្ញាអមសាលាដំបូងខេត្តកំពង់ធំ បានបញ្ចាក់ថា ក្រុងឬស្រុកណាបង្រ្កាបបទល្មើសគ្រឿងញៀនបានច្រើនជាងគេ លោកនិងលើកទឹកចិត្តប្រគល់រង្វាន់ 2លានរៀល និងសម្ភារះផ្សេងៗទៀត ក្នុងឱកាសនោះលោកសំនូមពរអោយកងកំលាំងសមត្ថកិច្ច គ្រប់ប្រភេទចូលរួមសហការគ្នាបង្រ្កាបបទល្មើសគ្រប់ប្រភេទ ជាពិសេសបទល្មើសគ្រឿងញៀន និង មានការចោទសួរនិងឆ្លើយពីសមត្ថកិច្ចស្ដីពីការបង្រ្កាបនិងមិនបង្រ្កាប ហេតុអ្វីបានជាមិនបង្រ្កាបបទល្មើស បែរជាអោយ អ្នកមិនមែននៅក្នុងមូលដ្ឋានមកបង្រ្កាបទៅវិញ និង មូលហេតុអ្វឺដែលឈានទៅដល់ការបង្រ្កាបបានដោយជោគជ័យ និងមិនជោគជ័យ ដូច្នេះប្រសិនបើកិច្ចការដោះស្រាយមិនចេញត្រូវរាយការណ៍មកថ្នាក់លើជួយដោះស្រាយ ដើម្បីបន្ដការបង្រ្កាបបទល្មើសគ្រឿងញៀនអោយអស់ពីទឹកដីខេត្តកំពង់ធំ៕
