គិតចាប់ពីថ្ងៃទី០២ កក្កដា ដល់ត្រឹមម៉ោង១២ថ្ងៃត្រង់ថ្ងៃទី០៣ កក្កដា 2017 ពលករខ្មែរយ៉ាងតិចជាង៨០០នាក់ ដែលគេអះអាងថា បានសម្ងំលាក់ខ្លួនធ្វើការដោយខុសច្បាប់នៅប្រទេសថៃ ត្រូវបានសមត្ថកិច្ចថៃចាប់បញ្ជូនត្រឡប់មកប្រទេសកំណើតវិញជាបន្តបន្ទាប់ ក្នុងរយៈពេល១ថ្ងៃកន្លះ តាមច្រកទ្វាអន្តរជាតិដូង ក្នុងស្រុកកំរៀង ។
មន្ត្រីព្រំដែនបានរាយការណ៍ថា អាជ្ញាធរថៃទើបចាប់ផ្ដើម ចាប់បញ្ជូនពលករខ្មែរឆ្លងដែនខុសច្បាប់ មកស្រុកខ្មែរវិញ តាមច្រកទ្វារអន្តរជាតិដូងជាលើកដំបូង បន្ទាប់ពីរដ្ឋាភិបាលថៃចាប់ផ្ដើមអនុវត្តច្បាប់អន្តោប្រវេសន៍ រយៈពេលជាងកន្លះខែកន្លងទៅនេះ ។ មន្ត្រីដដែលឲ្យដឹងថា គិតចាប់ពីថ្ងៃទី០២ មកដល់ត្រឹមម៉ោង១២ថ្ងៃត្រង់ថ្ងៃទី០៣ កក្កដា មានពលករខ្មែរប្រុស ស្រី និងកុមារតូចៗផងប្រមាណជាង៨០០នាក់ហើយ ត្រូវបានអាជ្ញាធរថៃចាប់បញ្ជូនត្រឡប់មកប្រទេសកំណើតវិញ តាមច្រកទ្វារអន្តរជាតិដូង ក្នុងស្រុកកំរៀង៕
