ភ្នំពេញ ៖សាលាដំបូងរាជធានីភ្នំពេញ បានចេញដីកាធ្វើការដោះលែងជាបណ្តោះអាសន្ន មន្ត្រីអង្គការសិទ្ធិមនុស្សអាដហុក រួមជាមួយអគ្គលេខាធិការរង គ.ជ.ប គឺលោក នី ចរិយា នៅល្ងាចថ្ងៃទី២៩ ខែមិថុនា ឆ្នាំ២០១៧នេះ។
ការដោះលែងនេះ គឺបន្ទាប់ពីចៅក្រមស៊ើបសួរបានបញ្ចប់ការស៊ើបសួរ ដូច្នេះបាន
សម្រេចបញ្ចប់ការឃុំខ្លួនបណ្តោះអាសន្នលើអ្នកទាំង៥ តែសំណុំរឿងពួកគាត់គឺនៅតែបន្តតាមនីតិវិធីដដែល នេះបើតាមលោក អ៊ី រិន អ្នកនាំពាក្យសាលាដំបូងរាជធានីភ្នំពេញ បានថ្លែងប្រាប់បណ្តាញព័ត៌មានក្នុងស្រុកនាល្ងាចថ្ងៃព្រហស្បត្តិ៍នេះ។
សូមបញ្ជាក់ថា មន្ត្រីអាដហុក និងគ.ជ.ប ទាំង៥នាក់នោះ រួមមាន លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រីជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។
មន្ត្រីទាំង៥នាក់នេះ ត្រូវបានជាប់ចោទពាក់ព័ន្ធនឹងសំណុំរឿង កញ្ញា ខុម ចាន់តារាទី ហៅស្រីមុំ ដែលមានរឿងអាស្រូវជាមួយលោក កឹម សុខា ប្រធានស្តីទីគណបក្សង្គ្រោះជាតិ។ពួកគាត់ទាំង៥នាក់ត្រូវបានដោះលែងចេញពីពន្ធនាគារព្រៃស នៅវេលាម៉ោងប្រមាណ៧និង២០នាទីយប់ ថ្ងៃទី២៩ ខែមិថុនា ហើយបានជួបជុំគ្រួសារសាច់ញាតិប្រពន្ធកូនអស់ហើយផងដែរ ៕
