កំពង់ធំ ៖ ប្រជាពលរដ្ឋរស់នៅភូមិវាលល្ពាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ បានប្រកបមុខរបរកសិកម្ម ដាំមង្ឃុត សាម៉ាវធូរ៉េន ដើម្បីរកប្រាក់ជួយគ្រួសារឲ្យមានជីវភាពធូធារ ព្រោះបច្ចប្បន្នផ្លែសាម៉ាវ មានអតិថិជនកំពុងពេញនិយម ហើយឈ្មួញចុះកម្មង់ទិញដល់ចំការ។
បងស្រីម្ចាស់ចំការមង្ឃុត សាម៉ាវធូរេន ឈ្មោះ ហ៊ុន នូ អាយុ៣៣ឆ្នាំ ជាប្រជាពលរដ្ឋរស់នៅក្នុងភូមិល្ពាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ បានប្រាប់អ្នកយកពត៏មានយើងឲ្យដឹង នៅរសៀលថ្ងៃទី២៥ ខែមិថុនា ថាបន្ទាប់ពីក្រុមគ្រួសាររបស់បងស្រីបានផ្លាស់ប្តូរទីលំនៅពីខេត្តតាកែវ មករស់នៅទឹកដីខេត្តកំពង់ធំ អស់រយៈពេលជិត១០ឆ្នាំមកនេះ គឺពួកគាត់បានចាប់យកអាជីពធ្វើចំការ គឺដាំដំណាំកសិកម្ម មានមង្ឃុត សាម៉ាវធូរេន ហើយបានដាំលើផ្ទៃដី២;៥ហិចតា បន្ទាប់ពីដាំអស់រយៈពេល៤ឆ្នាំមក ពួកគាត់បានទទួលផលលក់ជារៀងរាល់ឆ្នាំផងដែរ។
បងស្រីបន្តថា ដំណាំមង្ឃុតនិងសាម៉ាវធូរ៉េននេះ អាចរកប្រាក់ជួយផ្គត់ផ្គង់ជីវភាពគ្រួសារបានធូធារមួយកម្រឹតផងដែរ ព្រោះដំណាំផ្លែសាម៉ាវធូរ៉េននេះ ធ្វើឲ្យពួកគាត់រកចំណូលបានក្នុង១ឆ្នាំៗចាប់ពី២៥លានរៀលទៅ៣០លានរៀល ព្រោះបច្ចុប្បន្នអតិថិជនដែលធ្វើដំណើរតាមដងផ្លូវនេះ បាននាំគ្នាចូលទិញផ្លែមង្ឃុតនិងសាម៉ាវ ជាហូរហែ មិនថាឡើយថ្ងៃសៅរ៏ឬថ្ងៃអាទិត្យនោះឡើយ។
ជាមួយគ្នានេះដែរ អ៊ុំស្រី ញ៉ាញ់ សុខុន អាយុ៥៩ឆ្នាំ ជាពលរដ្ឋម្ចាស់ចំការមង្ឃុតនិងសាម៉ាវធូរ៉េន មានទីលំនៅភូមិឃុំជាមួយគ្នា ក៏បានអះអាងថា ប្រជាពលរដ្ឋដែលប្រកបមុខរបរដាំមង្ឃុតនិងសាម៉ាវធូរ៉េន មានចំនួន៩គ្រួសារ សុទ្ធតែមានជីវភាពធូធារដូចគេឯងដែរ ព្រោះចំការពួកគាត់បានជ្រើសយកជីធម្មជាតិមកប្រើដាក់លើដំណាំ ក្នុងនោះ គឺមានជីអាចម៍គោ អាចម៍ក្របី និងជីកំប៉ុស្តិ ដែលមិនប៉ះពាល់ដល់សុខភាពឡើយ ឃើញដូច្នេះហើយ ទើបអតិថិជនបាននាំគ្នាចូលទិញផ្លែឈើពួកគាត់យកទៅហូប និងអ្នកខ្លះទៀតទិញយកទៅលក់បន្ត ព្រោះផ្លែសាម៉ាវពួកគាត់មានរស់ជាតិផ្អែមឆ្ងាញ់គ្មានជាតិគីមីឡើយ ហើយប្រភេទដំណាំនេះងាយស្រួលថែទាំបំផុត គ្រាន់តែប្រើប្រព័ន្ធទឹកឲ្យបានគ្រប់គ្រាន់ជាប្រចាំ ហើយដាំត្រឹមរយៈពេល៤ឆ្នាំទទួលបានផល។
អ៊ុំស្រីបានបន្តថា ចំការសាម៉ាវរបស់គាត់ចាប់ផ្តើមបេះលក់ជាហូរហែរ ក្នុងកំឡុងខែឧសភាដល់ខែកក្តដា ហើយឆ្នាំនេះមានភ្លៀងធ្លាក់ជោគជាំ ចំការសាម៉ាវរបស់គាត់ទទួលបានទិន្នផលខ្ពស់ជាងរាល់ឆ្នាំ ចាប់ពី៤តោនទៅ៥តោនក្នុង១ឆ្នាំៗ លក់រាយធម្មតា១គីឡូតម្លៃ៦០០០រៀល បើលក់ដុំឲ្យម៉ូយតម្លៃ៥៥០០រៀល ខណៈបច្ចុប្បន្នឈ្មួញចុះកម្មង់ទិញដល់ផ្ទះស្ទើបេះពុំទាន់៕ ដោយសុផាត
