កំពង់ធំ៖ បច្ចុប្បន្នរថយន្តដឹកឈើបន្តកន្ទុយគ្នា សម្រុកដឹកឈើចេញពីទឹកដីខេត្តព្រះវិហារ ឆ្លងកាត់ស្រុកសណ្តាន់ ស្រុកប្រាសាទបល្ល័ង្ក ខេត្តកំពង់ធំ សមត្ថកិច្ចជំនាញមេព្រៃមិនដែលចាប់បានម្ដងនោះទេ ជាក់ស្តែងរថយន្តទួរីសមួយគ្រឿង និងរថន្ដធុនត្រាមួយគ្រឿង បានដឹកឈើប្រណិតពេញ ត្រូវបានកម្លាំងនគរបាលចាប់បានប្រគល់ឲ្យខាងជំនាញវិញ។
លោក ញ៉ែម ឈុនលី អធិការនគរបាលក្រុងស្ទឹងសែន បានប្រាប់សារពត៏មានឲ្យដឹងនៅរសៀលថ្ងៃទី២៤ ខែមិថុនា ឆ្នាំ២០១៧ថា ដោយទទួលបានបទបញ្ជាពីលោកឧត្តមសេនីយ៍ត្រី អ៊ុក កុសលស្នងការនគរបាលខេត្តកំពង់ធំ កម្លាំងរបស់លោកបានចុះល្បាតនៅតាមដងផ្លូវជាតិលេខ០៦ ក៏បានប្រទះឃើញរថយន្តទួរីសដឹកឈើប្រណិតពេញមួយគ្រឿង កម្លាំងរបស់លោកឃាត់បានកាលពីព្រឹកថ្ងៃទី២៤ មិថុនា ឆ្នាំ២០១៧ នៅចំណុចភូមិពោធិសែនស្នាយ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ រួមជាមួយនិងអ្នកបើកបរម្នាក់ រួចនាំយកមកកាន់អធិការ
ដ្ឋាននគរបាលក្រុងស្ទឹងសែន។
នៅចំពោះមុខសមត្ថកិច្ច ជនសង្ស័យជាអ្នកបើកបរប្រាប់ថា រូបគេ ឈ្មោះ ផុន ភារី ភេទប្រុស អាយុ៣៣ឆ្នាំ រស់នៅភូមិគូលែន ឃុំគូលែន ស្រុកគូលែន ខេត្តព្រះវិហារ ជាអ្នកបើករថយន្តទួរីសពណ៍សរ ពាក់ស្លាកលេខ អ-០៤៩៤ ភ.ព.២ ដឹកឈើឲ្យចែមី រស់នៅភូមិឃុំជាមួយនឹងគេ បានដឹកឈើចេញពីខេត្តព្រះវិហារជាច្រើនជើងមកហើយ ដោយសារថាចែមី បានគឹតគូររួចហើយជាមួយសមត្ថកិច្ច ទើបគេហ៊ានដឹកជាច្រើនជើងរាប់មិនអស់រួចមកហើយៗបានបង់លុយអោយ មេព្រៃ ប៉ូលីសសេដ្ឋកិច្ចខេត្ត ប៉ូលីសក្រសួង PMជាដើម នៅតែនគរបាលក្រុងស្ទឹងសែននេះទេ ដែលមិនទាន់ដែលបានគិតគូបង់លុយឲ្យនោះ។
បន្ទាប់ពីបានធ្វើការសួរនាំ រួចនគរបាលក្រុងក៏បានប្រគល់ឲ្យខាងសង្កាត់រដ្ឋបាលព្រៃឈើកំពង់ស្វាយ មកធ្វើការវាស់វែងឈើប្រណិត(ធ្នង់) នៅក្នុងរថយន្តមានចំនួន៣០១ដុំ ស្មើនិង២,០៩៧ម៉ែត្រគូប ឯឈើរថយន្ដធុនត្រាវិញមានឈើធ្នង់ចំនួន57ដុំ ស្មើ0,350ម៉ែត្រគីប វត្ថុតាងនិងមនុស្សឲ្យខាងជំនាញដើម្បីចាត់ការតាមផ្លូវច្បាប់។
លោក ធីវ វណ្ណធីរ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប្រាប់ថា ចំពោះបញ្ហាខាងលើនេះ លោកនិងឲ្យគេធ្វើរបាយការណ៍មកលោក ហើយលោកក៏បានចេញបេសកម្មឲ្យមន្ត្រីរបស់លោក ចុះទៅពិនិត្យមើលបទល្មើសព្រៃឈើនៅក្នុងទឹកដីស្រុកសណ្តាន់។
ប្រជាពលរដ្ឋនាំគ្នានិយាយរិះគន់លើមន្រ្ដីជំនាញថា ក្នុងមួយរយៈពេលនេះ បទល្មើសព្រៃឈើហាក់ដូចជាកម្រើកឡើងវិញយ៉ាងអណាធិបបតេយ្យ ក្រោមការសូកសៀតក្រោមតុនៃអំពើពុករលួយ ធ្វើឲ្យមន្រ្ដីជំនាញភ្លេចតួនាទី លួចឃុបឃឹតគ្នាជាមួយនិងក្រុមឈ្មួញព្រៃឈើ កាប់និងដឹកជញ្ចូន ផលិតផលព្រៃឈើយ៉ាងសំបើមដៃ ឆ្លងកាត់មុខសង្កាត់ទាំងពីរទាំងយប់ទាំងថ្ងៃ យ៉ាងរលូនដោយពុំឃើញមានមន្រ្ដីជំនាញចេញមុខបង្រ្កាបនោះទេ បែរជាកំលាំងសមត្ថកិច្ច នគរបាល និងកងរាជអាវុធហត្ថជាអ្នកបង្រ្កាប រួចប្រគល់អោយជំនាញទៅវិញ៕
