ខេត្តឧត្តរមានជ័យ ៖ ប្រជាពលរដ្នបានរឹះគន់ សមត្ថកិច្ចជំនាញពុករលួយមួយចំនួនដែលបានលាភសក្ការៈពីឈ្មួញឈើ បែរជាកាងឈ្មួញឈើ ភ្លេចអស់តួនាទី ភារកិច្ចរបស់ខ្លួន ដែលរដ្នាភិបាលតំរូវឲ្យធ្វើការបំរើប្រជាពលរដ្ន និងសង្គមជាតិ តែបែរជាយកតួនាទី បុណ្យសក្កិ កាងឈ្មួញកាប់បំផ្លាញព្រៃឈើទៅវិញ ជាហេតុធ្វើអោយឈ្មួញឈើបានដៃដឹកឈើឥតសំចៃ បំផ្លាញព្រៃឈើ និងដឹកលើសទម្ងន់ធ្វើឲ្យរូងផ្លូវ ខូងស្រុតថ្នល់អស់។
ជាក់ស្តែងការដឹកជញ្ចូនឈើលេខ២ តាមរថយន្តរបស់លោក ឆាយ ដែលតែងតែដឹកជញ្ជូនឈើខុសច្បាប់ សឹងតែរាល់យប់ ចេញពីស្រុកត្រពាំងប្រាសាទនោះ គេមិនដែលឃើញសមត្ថកិច្ច ឬអាជ្ញាធរមានវិធានការបង្ក្រាបទាល់តែសោះ ផ្ទុយទៅវិញមានសមត្ថកិច្ចមួយចំនួនតូច ជាអ្នកមើលការខុសត្រូវក្នុងមុខរបររកស៊ីឈើខុសច្បាប់របស់ថៅកែឈើឈ្មោះឆាយ ទៅវិញ។
បើតាមសេចក្តីរាយការណ៍ពី ស្រុកត្រពាំងប្រាសាទ បញ្ជាក់ថា សព្វថ្ងៃនេះឈ្មួញឈើខុសច្បាប់ ឈ្មោះ ឆាយ បានធ្វើការប្រមូលឈើ ពីស្រុកត្រពាំងប្រាសាទ មាន២កន្លែង គឺនៅភូមិថ្នល់កែង ឃុំត្រពាំងប្រាសាទ និងមួយកន្លែងទៀត នៅភូមិត្រាំប៉ោង ឃុំព្រះប្រឡាយ ឯឈើដែលស្តុបនៅត្រាំប៉ោង គឺស្ថិតនៅក្នុងបន្ទាយទាហានមួយកន្លែង រួចធ្វើការដឹកចេញតាមរថយន្តពណ៌ត្រៃអ៊ី យកមកសាងចូលរថយន្តយីឌុបដឹកបន្ត ទៅដាក់ដេប៉ូផ្សេងៗ នៅស្រុកបន្ទាយអំពិល ឬហួសទៅដាក់ដេប៉ូនៅក្នុងខេត្តបន្ទាយមានជ័យ។
ប្រជាពលរដ្ឋបានខ្សឹបប្រាប់ថា ឈើទាំង២កន្លែងជារបស់ឈ្មោះ ឆាយ ដែលតែងតែដឹកឈើតាមរថយន្តលើសទម្ងន់ធ្វើឲ្យផ្លូវរងការបាក់ស្រុតខូចខាតយ៉ាងធ្ងន់ធ្ងរ ដូចជាផ្លូវក្រាលគ្រួសក្រហមពីរង្វង់មូល ស្រុកត្រពាំងប្រាសាទ ទៅភូមិថ្នល់កែង និងផ្លូវជាតិRP១៧៤ពីភូមិត្រាំប៉ោង រហូតដល់ក្រុងសំរោង រងការបាក់ស្រុតជាហូរហែរ ដោយសារថយន្តដឹកឈើលើសទម្ងន់ ដែលធ្វើឲ្យខាតបង់ថវិកាជាតិរាប់ពាន់លានរៀលក្នុងមួយឆ្នាំៗ។
ទោះបីសារព័ត៌មានក្នុងស្រុកជាច្រើនអង្គភាព ធ្លាប់បានចុះផ្សាយពីការដឹកឈើខុសច្បាប់ របស់ថៅកែ ឆាយ យ៉ាងណាក៏ដោយ ក៏ថៅកែឈើរូបនេះ មិនខ្វល់ ដែលអាចវាយតម្លៃបានថា ថៅកែ ឆាយ បានបង់លុយគ្រប់កន្លែងអស់ហើយ គ្មាននរណាហ៊ានចាប់នោះទេ។
ប្រធានមន្ទីរសាធារណះការ និងដឹកជញ្ជូន ខេត្តឧត្តរមានជ័យ លោក សាំង ប៊ុនថេន ធ្លាប់បានប្រាប់បញ្តាញពត័មានថា លោកពិតជាទទួលស្គាល់ថា ផ្លូវមានការស្រុតមែន ហើយកន្លងមក មន្ទីរបានធ្វើការត្រួតពិនិត្យលក្ខណៈបច្ចេកទេសយានយន្ត និងរថយន្តដឹកលើសទំងន់ ហើយបានធ្វើការកាត់ទ្រុងជាច្រើនថែមទៀត។ប៉ុន្តែលោកទទួលស្គាល់ថា ការដឹកលើសទំងន់ភាគច្រើនគឺនៅពេលយប់ ហើយលោកនឹងបង្កើតក្រុមការងារត្រួតពិនិត្យ នៅពេលយប់ទៀត ដើម្បីកាត់បន្ថយការដឹកលើសទំងន់ធ្វើឲ្យផ្លូវខូចនេះ។
យើងពុំអាចសុំការបំភ្លឺពី លោកឆាយបានទេ ព្រោះពុំមានលេខទូរសព្ទ័៕
