ខេត្តក្រចេះ៖ រថយន្ដសាំងយ៉ុងដឹកឈើ១គ្រឿង ត្រូវបាននគរបាលប្រឆាំងបទល្មើសសេដ្ឋកិច្ចខេត្តក្រចេះបង្រ្កាបបាន និងប្រគល់អោយជំនាញរដ្ឋបាលព្រៃឈើសង្កាត់ថ្មគ្រែ ខណៈ ដែលរថយន្តខាងលើបានដឹកឈើលោតឆ័ត្រ បម្រុងនាំទៅប្រទេសវៀតណាម នៅថ្ងៃទី២២ ខែមិថុនា ឆ្នាំ២០១៧ នៅលើដងផ្លូវជាតិលេខ៧ ស្ថិតក្នុងឃុំចង្ក្រង់ ស្រុកចិត្របុរី ខេត្តក្រចេះ។
នគរបាលសេដ្ឋកិច្ចខេត្តក្រចេះ បានឲ្យដឹងថា រថយន្ដនេះដឹកឈើខាងលើនេះ ចេញពីខេត្តស្ទឹងត្រែង ឆ្លងកាត់ខេត្តក្រចេះ ឆ្ពោះទៅកាន់ព្រំប្រទល់ប្រទេសវៀតណាម ក្រោយពីកម្លាំងសមត្ថកិច្ចទទួលបានព័ត៌មាន ក៏សុំគោលការណ៍ថ្នាក់លើ ចេញប្រតិបត្តិការបង្ក្រាបតែម្ដង ហើយប្រគល់ជូនជំនាញរដ្ឋបាលព្រៃឈើសង្កាត់ថ្មគ្រែដើម្បីចាត់ការតាមច្បាប់ ។
ក្នុងការឃាត់ចាប់រថយន្តដឹកបទល្មើសខាងលើ គឺសមត្ថកិច្ចឃាត់បានតែរថយន្តនិងឈើតែប៉ុណ្ណោះ ដោយឡែកម្ចាស់រថយន្ដបានលោតចុះហើយរត់គេចខ្លួនបាត់ ។
លោក ម៉ី វុទ្ធី នាយសង្កាត់រដ្ឋបាលព្រៃឈើថ្មគ្រែបានបញ្ជាក់ថា រថយន្ដដែលនគរបាលសេដ្ឋកិច្ចចាប់បាន ហើយប្រគល់ជូនខាងជំនាញលោកនោះ មានផ្ទុកឈើសុក្រំ និងឈើគរគី ជាប្រភេទឈើលេខ១ មានចំនួន២៧ដុំ ស្មើជិត២ម៉ែត្រគូប ហើយពេលនេះកម្លាំងជំនាញបាននាំទៅរក្សាទុក នៅស្ថានីយ៍បណ្ដុះកូនឈើខ្សា ដើម្បីកសាងសុំរឿងចាត់ការតាមនីតិវិធីច្បាប់ស្តីពីព្រៃឈើ៕
