បន្ទាយមានជ័យ៖ជនសង្ស័យឈ្មោះ ស៊ុម យ៉ុង ភេទប្រុស អាយុ៥៤ឆ្នាំ នៅភូមិអូរកាច់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ត្រូវបានចាប់ឃាត់ខ្លួន កាលពីល្ងាចថ្ងៃទី២១ ខែមិថុនា ឆ្នាំ២០១៧ នៅផ្ទះជនសង្ស័យ ដោយបុរសម្នាក់នេះជាអតីតកងទ័ពខ្មែរក្រហម បានរងការចាប់ឃាត់ខ្លួនពីកម្លាំងនគរបាលខេត្តបន្ទាយមានជ័យ ក្រោយសមត្ថកិច្ចស្រាវជ្រាវស៊ើបអង្កេតរកឃើញជនសង្ស័យរូបនោះ បានលាក់ទុកអាវុធចំនួន៣ដើមខុសច្បាប់ និងគ្រាប់កាំភ្លើងជាច្រើនគ្រាប់ផងដែរ។
ការចាប់ឃាត់ខ្លួនជនសង្ស័យនោះដែរ ត្រូវគេមើលឃើញថាដឹកនាំកម្លាំងបញ្ជាផ្ទាល់ដោយលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ក្រោមការសម្របសម្រួលនីតិវីធីពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ។
លោកឧត្តមសេនីយ៍ត្រី សិទ្ធ ឡោះ ស្នងការរង ទទួលការងារព្រហ្មទណ្ឌ បានឲ្យដឹងថា៖ កម្លាំងនគរបាលឃាត់ខ្លួនជនសង្ស័យខាងលើ ក្រោយពីទទួលបណ្តឹងពីប្រជាពលរដ្ឋ១០នាក់ នៅភូមិឃុំជាមួយជនសង្ស័យថា ឈ្មោះ ស៊ុម យ៉ុង បានជំពាក់លុយ ពួកគាត់មិនព្រមសង ជំពាក់ប្រាក់ ម្នាក់ៗជិត១០ឆ្នាំមកហើយ និងប្រជាពលរដ្ឋរាយការណ៍ទៀតថា នៅពេលពលរដ្ឋទៅទារប្រាក់ ជនសង្ស័យមានកាំភ្លើងគំរាមគំហែងប្រជាពលរដ្ឋទៀតផង។
លោកស្នងការរងបានប្រាប់ឱ្យដឹងទៀតថា បន្ទាប់ពីទទួលបានព័ត៌មានពីប្រជាពលរដ្ឋបែបនោះហើយ លោកក៏បានសុំគោលការណ៍ពីលោកឧត្តមសេនីយ៍ស្នងការ អាត់ ខែម និងលោកព្រះរាជអាជ្ញាអមសាលាដំបូងខេត្តបន្ទាយមានជ័យ កម្លាំងនគរបាលក៏បានចុះទៅឆែកឆេរផ្ទះជនសង្ស័យនៅចំណុចខាងលើ ហើយបានរកឃើញកាំភ្លើង២ដើម ធុន AK ១ដើមនិងធុន CKC ១ដើម គ្រាប់ចំនួន៣៧គ្រាប់ បង់ចំនួន២និងថ្នាំញៀន៥គ្រាប់។នៅពេលនោះ កម្លាំងនគរបាលក៏បានឃាត់ខ្លួនជនសង្ស័យយកមកសាកសួរ នៅអធិការដ្ឋាននគរបាលស្រុកម៉ាឡៃ។
ក្រោយពីសាកសួរជនសង្ស័យរូបនេះរួចហើយ កម្លាំងនគរបាលក៏បានឈានទៅធ្វើការឆែកឆេរផ្ទះ បក្ខពួកជនសង្ស័យម្នាក់ទៀតឈ្មោះ ឡៃ រស់នៅភូមិឃុំជាមួយគ្នា សមត្ថកិច្ចក៏បានរកឃើញដកហូតអាវុធ០១ដើមទៀតធុន AK47 គ្រាប់ចំនួន៥គ្រាប់ និងបង់គ្រាប់ចំនួន ១ ផងដែរ។ចំណែកម្ចាស់ឈ្មោះ ឡៃ បានរត់គេចខ្លួនបាត់នៅមុនសមត្ថកិច្ចទៅដល់ផ្ទះជនរូបនោះ។
លោកស្នងការរងបានបញ្ជាក់ឱ្យដឹងទៀតថា នៅចំពោះមុខសមត្ថកិច្ចជនសង្ស័យឈ្មោះ ស៊ុម យ៉ុង បានសារភាពថា រូបគេអតីតជាទាហានខ្មែរក្រហម ។លុះក្រោយពីធ្វើសមាហរណកម្មរួចមក រូបគេក៏ឈប់ធ្វើជាទាហាន មកធ្វើជាពលរដ្ឋប្រកបមុខរបរជាធម្មតា ។កាំភ្លើង៣ដើមខាងលើរូបគេនិងបក្ខពួកម្នាក់ទៀតរក្សាទុក ចាប់តាំងពីសម័យពួកគេធ្វើជាទាហានខ្មែរក្រហម ដើម្បីទុកការពារភូមិប៉ុណ្ណោះ គ្មានបំណងយកទៅធ្វើសកម្មភាពប្លន់នោះឡើយ។
សូមបញ្ជាក់ថាការរក្សាទុកអាវុធគ្មានតួនាទីប្រើប្រាស់ និងគ្មានការអនុញ្ញាតពីច្បាប់ ចាត់ទុកថាជាអំពើខុសច្បាប់ បើទោះបីមិនបានយកអាវុធទៅធ្វើសកម្មភាពអ្វីក៏ដោយ ។ជនសង្ស័យឈ្មោះ ស៊ុម យ៉ុង បានរងការចោទពីបទរក្សាទុកអាវុធខុសច្បាប់ អនុវត្តខុសនិងគោលនយោបាយភូមិឃុំមានសុវត្ថិភាព និងរងការចោទប្រកាន់មួយករណីទៀត ពីបទរំលោភលើសេចក្តីទំនុកចិត្ត(ជំពាក់ប្រាក់ប្រជាពលរដ្ឋ) ជនសង្ស័យនិងវត្ថុតាង នៅព្រឹកថ្ងៃទី២២ ខែមិថុនា ឆ្នាំ២០១៧ ត្រូវបានកម្លាំងនគរបាលការិយាល័យជំនាញ កសាងសំណុំរឿង បញ្ជូនខ្លួនទៅសាលាដំបូងខេត្តបន្ទាយមានជ័យដើម្បីយកទៅចាត់ការតាមផ្លូវច្បាប់៕
