ភ្នំពេញ៖ ក្នុងជំនួបនៅព្រឹកថ្ងៃទី២០ ខែមិថុនា នៅទីស្តីការក្រសួងព័ត៌មាន រវាងក្រុមអ្នកសារព័ត៌មានចម្រុះស្ថាប័ន ប្រមាណជា៦០នាក់ ដែលស្វែងរកការអន្តរាគមន៍ពី ឯកឧត្តម ខៀវកាញារឹទ្ធ រដ្ឋមន្ត្រីក្រសួងពត័មាន ជុំវិញការចាប់ខ្លួនរបស់អ្នកកាសែត៤នាក់ នៅខេត្តរតនគិរី កាលពីថ្ងៃទី១៤ ខែមិថុនា ឆ្នាំ២០១៧កន្លងទៅ និងស្ថានភាពគំរាមកំហែងចំពោះអ្នកសារពត័មានដោយក្រុមអ្នកកាសែតបានលើកឡើងថា ការចាប់ខ្លួនអ្នកកាសែតនៅខេត្តរតនគីរី គឺ ជាអន្ទាក់របស់មន្ត្រីមានសមត្ថកិច្ច សហការជាមួយឈ្មួញរកស៊ីឈើខិលខូច ដើម្បីធ្វើបាបអ្នកយកព័ត៌មាន ដែលស្រាវជ្រាវតាមដាននិងសរសេររឿងរសើបរបស់ពួកគេ ឬអាចនិយាយជាភាសាសាមញ្ញថា «ដាក់អន្ទាក់ធ្វើស៊ី»អ្នកកាសែត និងគំរាមអ្នកកាសែតដ៏ទៃទៀតឲ្យចាកចេញពីខេត្តរតនគីរី ដែលសំបូរដោយបទល្មើសព្រៃឈើ។
តំណាងក្រុមអ្នកយកព័ត៌មានប្រមាណជា៦០នាក់ ដែលបានមកជួបសុំអន្តរាគមន៍ពីរដ្ឋមន្ត្រីក្រសួងព័ត៌មាន គឺ លោក ជា លីហ៊ាង ចាងហ្វាងកាសែតរស្មីកូនខ្មែរ បានផ្តល់បទសម្ភាសន៏ថា បច្ចុប្បន្ន ក្រុមអ្នកសារព័ត៌មាន ដែលកំពុងចុះបេសកម្មយកព័ត៌មាន តាមគ្រប់បណ្ដាខេត្តក្រុងនៅទូទាំងប្រទេស ពាក់ព័ន្ធនឹងព័ត៌មានបទល្មើសនានា ជាពិសេសសកម្មភាពបទល្មើសព្រៃឈើ នៅក្នុងភូមិសាស្ត្រខេត្តរតនគិរី បាន និងកំពុងទទួលរងនូវការគំរាមកំហែង បំបិទសិទ្ធិសេរីភាព ក៏ដូចជា ការគំរាមកំហែងដល់អាយុជីវិតជាដើម។ ជាក់ស្ដែង មានអ្នកកាសែតមួយរូបនៅខេត្តរនគិរី ត្រូវគេលួចធ្វើឃាត ហើយថ្មីៗនេះ ក្រុមលោក សុខ សុវណ្ណ ត្រូវបានពួកឈ្មួញប្រើអំពើហិង្សាវាយកម្ទេចរថយន្តចំនួន៣គ្រឿង និងបង្កការភ័យខ្លាចយ៉ាងធ្ងន់ធ្ងរ។
ជុំវិញការគំរាមកំហែង និងបំបិទសិទ្ធិសេរីភាពចំពោះក្រុមអ្នកយកព័ត៌មាននៅខេត្តរតនគិរីនេះ លោក ជា លីហ៊ាង បានបន្ថែមថា ថ្មីៗនេះ អ្នកយកព័ត៌មានចំនួន៤នាក់ ត្រូវបានចាប់ខ្លួនបន្ថែមទៀត រួមមាន ទី១-ឈ្មោះ យ៉ន ទិត្យ (ហៅ ទិត្យ ឦសាន) ជានាយករងអង្គភាពយុវជនខ្មែរព័ត៌មាន ទី២-ឈ្មោះ ប៉េង សុត្ថារ៉ាក់ អ្នកយកព័ត៌មាននៅអង្គភាព CPN អនឡាញ ទី៣-ឈ្មោះ ម៉ី ម៉េងហ៊ុយ អ្នកយកព័ត៌មាន នៅអង្គភាពដំណឹងភ្នំពេញ និងទី៤-ឈ្មោះ ចាន់ ណារ៉ា ភេទស្រី អ្នកយកព័ត៌មាន នៅអង្គភាព TNM អនឡាញ។ លោកបានចាត់ទុកថា ការចាប់ខ្លួនអ្នកកាសែតពីសំណាក់កម្លាំងកងរាជអាវុធហត្ថខេត្តរនគិរីនេះ គឺជាការរៀបចំពីសំណាក់ក្រុមឈ្មួញរកស៊ីឈើខុសច្បាប់ ដែលបានឃុបឃិតជាមួយមន្ត្រីខិលខូចមួយចំនួន ហើយលោកស្នើឲ្យរដ្ឋមន្ត្រីក្រសួងព័ត៌មាន ជួយអន្តរាគមន៍រកយុត្តិធម៌ និងស្វែងរកការពិត ជូនអ្នកដែលត្រូវបានចាប់ខ្លួន ក៏ដូចជាស្នើវែកមុខដើមបណ្ដឹង ដែលប្ដឹងមិនបញ្ចេញអត្តសញ្ញាណច្បាស់លាស់។
ឆ្លើយតបចំពោះការសុំអន្តរាគមន៍នេះ ឯកឧត្តម ខៀវ កាញារីទ្ធ បានថ្លែងថា នឹងជំរុញក្រសួងយុត្តិធម៌ឲ្យស្វែងរកការពិត ចំពោះការចាប់ខ្លួនអ្នកទាំង៤។ ឯកឧត្តមក៏បានណែនាំឲ្យអ្នកសារព័ត៌មានទាំងអស់ ត្រូវគោរពក្រមសីលធម៌ និងវិជ្ជាជីវៈរបស់ខ្លួន ក្នុងពេលបំពេញភារកិច្ច ជាពិសេសការចុះយកព័ត៌មានស៊ើបអង្កេត ពាក់ព័ន្ធបទល្មើសផ្សេងៗព្រមទាំងឲ្យរកមេធាវីកាពារខ្លួននៅពេលដែលប្រឈមចំពោះផ្លូវច្បាប់។
គួររំឭកថា អ្នកកាសែត៤នាក់ ប្រចាំនៅភូមិភាគឦសាន ត្រូវបានចាប់ខ្លួនពីសំណាក់កម្លាំងកងរាជអាវុធហត្ថខេត្តរតនគិរី ពាក់ព័ន្ធការជំរិតទារប្រាក់ពីឈ្មួញដឹកជន្លង់ម្រេច ចំនួនប្រមាណជា៥០០ទៅ៦០០ដុល្លារ។ ក្រោយមក តុលាការខេត្តរតនគិរី បានសម្រេចឃុំខ្លួនអ្នកទាំង៤ ដាក់ពន្ធនាគារជាបណ្តោះអាសន្ន កាលពីថ្ងៃទី១៦ ខែមិថុនា ឆ្នាំ២០១៧។
ព្រះរាជអាជា្ញរង និងជាអ្នកនាំពាក្យសាលាដំបូងខេត្តរតនគិរី លោក ហាក់ ហ៊ាន់ បានប្រាប់ បញ្តាញពត័មានថា អ្នកកាសែត៤នាក់ ត្រូវព្រះរាជអាជ្ញារងនៃអយ្យការអមសាលាដំបូងខេត្ត គឺលោក រ៉ា បូរានី សម្រេចចោទប្រកាន់២សំណុំរឿង ពីបទអំពើកំហែងយក តាមមាត្រា៣៦៣ និងមាត្រា៣៦៤ នៃក្រមព្រហ្មទណ្ឌ។ លោកចាត់ទុកថា នេះជាបទល្មើសមជ្ឈឹម ហើយអ្នកទាំង៤ ប្រឈមការជាប់ពន្ធនាគារពី២ ទៅ៥ឆ្នាំ និងពិន័យជាប្រាក់ចូលជាថវិការដ្ឋពី៤ ទៅ១០លានរៀល ។
គួរជម្រាបផងដែរថា ក្រៅពីសុំកិច្ចអន្តរាគមន៍ពីរដ្ឋមន្ត្រីក្រសួងព័ត៌មាន ក្រុមអ្នកសារព័ត៌មាន ក៏បានដាក់ពាក្យបណ្តឹងទៅខុទ្ធកាល័យសម្តេចតេជោ ហ៊ុន សែន នាយករដ្ឋមន្រ្តី ដើម្បីឲ្យសម្តេចបានជ្រាបពីឈ្មួញ ដែលនៅតែបន្តរកស៊ីបទល្មើសព្រៃឈើ ការកាប់ទន្រ្ទានព្រៃ ការដឹកជញ្ជូនឈើទាំងយប់ទាំងថ្ងៃ ដោយមានការឃុបឃិតជាមួយមន្រ្តីស្ទើរគ្រប់ស្ថាប័នក្នុងខេត្ត។
បើតាមលោក ជា លីហ៊ាង ករណីទាំងអស់ខាងលើនេះ បានធ្វើឲ្យក្រុមអ្នកសារព័ត៌មាន មានការព្រួយបារម្ភ និងភ័យខ្លាច ក្នុងការបំពេញបេសកកម្មចុះយកព័ត៌មាន អំពីសកម្មភាពបទល្មើសព្រៃឈើនៅក្នុងខេត្តរតនគិរី ដែលបានចាត់ទុកថា ការបំភិតបំភ័យ គំរាមកំហែងនេះ បានធ្វើឲ្យសិទ្ធិសេរីភាពនៃរបបសារព័ត៌មានធ្លាក់ចុះយ៉ាងខ្លាំង។
ក្រុមអ្នកកាសែតក៏បានអំពាវនាវសុំឲ្យរដ្ឋាភិបាលជួយគាំទ្រ និងការពារអ្នកកាសែតក្នុងពេលបំពេញបេសកកម្មយកព័ត៌មាន អំពីសកម្មភាពបទល្មើសព្រៃឈើ៕
