រតនគិរី៖ លោក សុខ សុវណ្ណប្រធានក្រុមប្រឹក្សាសារពត័មានកម្ពុជាបានឲ្យដឹងថា ក្រុមប្រឹក្សាសារពត័មានកម្ពុជា កំពុងតាមដាននិងឃ្លាំមើលយ៉ាងយកចិត្តទុកដាក់ ករណីអ្នកកាសែតនៅខេត្តរតនគិរី៤នាក់ ត្រូវបានចាប់ខ្លួនពីបទកំហែងយក។
តាមប្រភពពត័មានបានឲ្យដឺងថា មានអ្នកកាសែតប្រុស ស្រី៤នាក់ ត្រូវកម្លាំងកងរាជអាវុធហត្ថខេត្តរតនគិរី បញ្ជូនទៅតុលាការនៅព្រឹកថ្ងៃទី១៦ ខែមិថុនា ឆ្នាំ២០១៧នេ ក្រោយពីបានឃាត់ខ្លួននិងបញ្ចប់ការសាកសួរ ពាក់ព័ន្ធករណីទារលុយ ពីរថយន្ដសាំយ៉ុងដឹកជន្លង់ស្រកានាគ។
លោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តរតនគីរី បានប្រាប់បញ្តាញពត័មានថា អ្នកកាសែតប្រុស-ស្រី៤នាក់ខាងលើនេះ ត្រូវបានកម្លាំងអាវុធហត្ថឃាត់ខ្លួន នៅថ្ងៃទី១៤ ខែមិថុនាកន្លងទៅ បន្ទាប់ពីមានពាក្យបណ្តឹងពីម្ចាស់រថយន្តសាំយ៉ុង ដឹកជន្លង់ស្រកានាគថា ក្រុមអ្នកកាសែតទាំងនេះទារលុយ។
អ្នកកាសែតប្រុស-ស្រី4នាក់ ទី១៖ យ៉ន ទិត្យ អង្គភាពយុវជនខ្មែរព័ត៌មាន ទី២៖ ប៉េង សុខថារៈ អង្គភាពCPNអនឡាញ ទី៣៖ ម៉ី ម៉េងហ៊ុយ អង្គភាពដំណឹងភ្នំពេញ និងទី៤៖ ច័ន្ទ ណារ៉ា ភេទស្រី អង្គភាពTNM អនឡាញ។
បើតាមលោកមេបញ្ជាការបានឲ្យដឹងទៀតថា លោក យ៉ន ទិត្យ ទារលុយប្រចាំខែ៥០០ដុល្លារ ក្នុងមួយខែ រីឯក្រុមមានគ្នា៣នាក់ទារលុយពី ម្ចាស់រថយន្តសាំយ៉ុងដឹកជន្លង់ស្រកានាគ ចំនួន៦០០ដុល្លារ។ ក្រោយពីជំនាញអាវុធហត្ថសាកសួរពួកគាត់ទាំង៤នាក់ខាងលើ ហើយបានឆែកឃើញលុយដុល្លារក្លែងក្លាយសែន ចំនួន១៦សន្លឹក នៅជាប់ខ្លួនជាមួយអ្នកកាសែតឈ្មោះ ប៉េង សុខថារៈ និងឈ្មោះ ម៉ី ម៉េងហ៊ុយ ហើយបានសារភាពថាពិតជាបានទារលុយប្រាកដមែន។
លោកសុខ សុវណ្ណ ប្រធានក្រុមប្រឹក្សាសារពត័មានកម្ពុជា បានអំពាវនាវ ឲ្យអ្នកកាសែតត្រូវគោរពក្រមសីលធម៏ និងវិជ្ជាជីវៈអ្នកសារពត័មានឲ្យបានម៉ឺងម៉ាត់ ជៀសវាងការប្រឈមនៅពេលយកពត័មាន ៕
