កំពង់ចាម ៖ កាលពីវេលាម៉ោង ១២និង៤០នាទី ថ្ងៃទី១៤ ខែមិថុនា ឆ្នាំ២០១៧ នៅក្នុងទឹកដីស្រុកព្រៃឈរ ខេត្តកំពង់ចាម មានការឃាត់ខ្លួនមនុស្សចំនួន៦នាក់ ពាក់ពន្ធ័ដេញរថយន្តដឹកឈើ។
មន្ត្រីប៉ូលិស ប៉េអឹម និងយោធាខេត្តត្បូងឃ្មុំចំនួន៦នាក់ ត្រូវបានកម្លាំងនគរបាលស្រុកព្រៃឈរ សហការណ៍ជាមួយ កម្លាំងជំនាញខេត្តកំពង់ចាម ធ្វើការឃាត់ខ្លួន ខណៈដែលក្រុមជើងខ្លាំងនេះបានដេញតាមរថយន្តដឹកឈើឆ្លងខេត្ត និងបាញ់បោះសេរីទៅលើឈ្មួញរកស៊ីឈើ ផ្អើលតាំងពីខេត្តត្បូងឃ្មុំ រហូតដល់ខេត្តកំពង់ចាម ព្រោះតែខឹងរថយន្តដឹកឈើមិនព្រមឈប់។
អធិការនគរបាលស្រុកព្រៃឈរ បានឲ្យដឹងថា កម្លាំងជំនាញបានធ្វើការឃាត់រថយន្តចំនួន៤គ្រឿង និងឃាត់ខ្លួនមនុស្ស៦នាក់ មកពីស្ថាប័នចំនួន៣ផ្សេងគ្នា រួមមាន ៖
១/ឈ្មោះ ផុន វាសនា ឋានៈនាយផ្នែកសន្តិសុខ ជាមន្ត្រីនគរបាលស្រុកត្បូងឃ្មុំ ខេត្តត្បូងឃ្មុំ។
២/ឈោះ ជាតិ សំណាង ឋានន្តរសក្កិអនុសេនីយ៍ត្រី ជាជំនួយការហ្វឹកហ្វឺន យោធាស្រុកត្បូងឃ្មុំ ដែលជាអ្នកបាញ់បោះដោយកាំភ្លើង Ak47 ចំនួន១គ្រាប់។
៣/ឈោះ កេត តារា ឋានន្តរសក្កិនាយចំណង់ យោធាស្រុកត្បូងឃ្មុំ។
៤/ឈោះ ម៉ៅ អឿន ឋានន្តរសក្កិអនុសេនីយ៍ទោ កងការពារស្រុកត្បូងឃ្មុំ។
៥/ឈ្មោះ ខែម សុធារ័ត្ន ឋានន្តរសក្កិអនុសេនីយ៍ទោ នាយផ្នែកសន្តិសុខ (ប៉េអឹម) និងទី៦/ឈ្មោះ វ៉ាន់ សុទ្ធ ឋានន្តរសក្កិនាយចំណង់ (ប៉េអឹម)។
ក្រៅពីឃាត់ខ្លួនមន្ត្រីប្រដាប់អាវុធទាំង៦នាក់ខាងលើនោះ សមត្ថកិច្ចខេត្តកំពង់ចាម ក៏បានឃាត់ខ្លួនព្រូឡានម្នាក់ ឈ្មោះ រីម សុខរឹម ភេទប្រុស អាយុ២៧ឆ្នាំ រស់នៅភូមិកោះកន្ដឹន ឃុំសាមគ្គី ស្រុកស្ទឹងត្រែង ខេត្តស្ទឹងត្រែង និងដកហូតវត្ថុតាង រួមមាន រថយន្តម៉ាកសំាងយ៉ុង១គ្រឿង ពណ៌លឿង ដែលដឹកសសរចំនួន១៦ដើម កាំភ្លើងម៉ាកAKចំនួន១ដើម គ្រាប់២៤គ្រាប់ រថយន្តម៉ាកកាមរីបាឡែនមួយគ្រឿង ពាក់ស្លាកលេខ ភ្នំពេញ2Q-2237 រថយន្តម៉ាកកាមរីបាឡែនមួយគ្រឿង ពាក់ស្លាកលេខភ្នំពេញ2T-4068 និងរថយន្តម៉ាកតូយូតា ហាយព្រីតមួយគ្រឿង ពាក់ស្លាកលេខ ខេមរភូមិន្ទ 2-0538។
សមត្ថកិច្ចបានបញ្ជាក់ថា ការឃាត់ខ្លួនជនទាំង៦នាក់នេះ បន្ទាប់ពីពួកគេបានបាញ់បោះយ៉ាងសេរី ដើម្បីឃាត់រថយន្តដឹកឈើតាំងពីខេត្តត្បូងឃ្មុំ រហូតដល់ទឹកដីខេត្តកំពង់ចាម ពោលគឺនៅចំណុចភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម ព្រោះខឹងរថយន្តដឹកឈើមិនព្រមឈប់ ហើយបើកប៉ះពាររថយន្តក្រុមខ្លួន បណ្តាលឲ្យក្រឡាប់១គ្រឿង នៅខេត្តត្បូងឃ្មុំ។
ក្រោយការឃាត់ខ្លួនជនសង្ស័យទាំង៦នាក់ និងវត្ថុតាង ត្រូវបានសមត្ថកិច្ចជំនាញនៃអធិការដ្ឋានគរបាលស្រុកព្រៃឈរ កសាងសំណុំរឿងតាមនីតិវិធី ដើម្បីចាត់ការតាមច្បាប់៕
