មណ្ឌលគិរី៖ វេលាម៉ោង៥ព្រឹក ថ្ងៃទី១៤ ខែមិថុនា ឆ្នាំ២០១៧ ទីតាំងប្រមូលទិញ ស្តុកឈើ ដើម្បីនាំចេញទៅប្រទេសវៀតណាមធំជាងគេប្រចាំខេត្តមណ្ឌលគីរី ត្រូវបានសមត្ថកិច្ចនគរបាលខេត្តមណ្ឌលគីរី និងជំនាញរដ្ឋបាលព្រៃឈើចុះឡោមព័ទ្ធ បន្ទាប់ពីកម្លាំងក្រុមការងារស្រាវជ្រាវ ទប់ស្កាត់បង្ក្រាបបទល្មើសធនធានធម្មជាតិ កងរាជអាវុធហត្ថលើផ្ទៃប្រទេស បង្ក្រាបចាប់ឡានដឹកឈើពីប្រភពនាំឈើចេញពីតាំងស្តុកឈើនៅចំណុចភូមិពូត្រំ សង្កាត់រម្យនា ក្រុងសែនមនោរម្យ ខេត្តមណ្ឌលគិរី និងឃាត់ខ្លួនជនសង្ស័យម្នាក់ឈ្មោះ ប៉ោហេង ភេទប្រុស អាយុ១៨ ឆ្នាំ ត្រូវជាប្អូនថ្លៃលោក គួយ សុឃុន ជាម្ចាស់ទីតាំងស្តុកឈើ ហើយជាប្អូនបង្កើតលោកអភិបាលនៃគណៈអភិបាលខេត្តមណ្ឌលគិរី។
ប្រភពព័តមានបានទម្លាយថា៖ ទីតាំងស្តុកឈើចំនួន២កន្លែងខាងលើជារបស់លោកគួយ សុឃុន ប្អូនលោកអភិបាលនៃគណៈអភិបាលខេត្តមណ្ឌលគិរី និងឈ្មោះ ភ័ក្រ្ត ដែលមានឈើលាក់ទុកជាង១០០ម៉ែត្រគូប ហើយសមត្ថកិច្ចកម្លាំងក្រុមការងារស្រាវជ្រាវ ទប់ស្កាត់បង្ក្រាបបទល្មើសធនធានធម្មជាតិ កងរាជអាវុធហត្ថលើផ្ទៃប្រទេស នឹងសហការជាមួយកម្លាំងកងរាជអាវុធហត្ថខេត្ត បន្តចុះចាប់ ប៉ុន្តែករណីខាងខេត្តខ្លាចកម្លាំងកងរាជអាវុធហត្ថលើផ្ទៃប្រទេសចាប់ ឈានដល់បំពេញនីតិវិធឃាត់ខ្លួនជនពាក់ព័ន្ធ ពិសេសមុខមាត់អាជ្ញាធរ សមត្ថកិច្ចជំនាញនៅទីនោះសុទ្ធតែមានប្រយោជន៍ឆ្នាំងបាយ ក៏ខាងខេត្តដឹកនាំទៅបង្ក្រាបវិញ ខ្លាចរាលដាលពេលខាងកម្លាំងកងរាជអាវុធហត្ថលើផ្ទៃប្រទេសបង្ក្រាប។
ប្រភពពត័មានបានបន្តថា៖ ឈើនៅទីនោះជាង១០០ម៉ែត្រគូប តែលោកគួយ សុឃុន និង ឈ្មោះ ភ័ក្រ្ត បានជួលប្រជាពលរដ្ឋលីជញ្ជូនចេញសឹងតែអស់ទៅហើយ ខណៈឈ្មួញនិងអាជ្ញាធរ សមត្ថកិច្ច ខាងជំនាញមិនដាច់ចិត្តវាយបំបែកឆ្នាំងបាយខ្លួនឯង ម្យ៉ាងទៀតម្ចាស់ឈើជានគរបាល និងជាប្អូនលោកអភិបាលនៃគណៈអភិបាលខេត្តមណ្ឌលគិរី និងជាមេខ្លោងប្រមូលទិញឈើនាំទៅវៀតណាមធំជាងគេទៀត ក៏រៀបចំអោយថ្នាក់ខេត្តបង្ក្រាបដើម្បីបិទរឿង។
ប្រភពពីវៀតណាមបញ្ជាក់ថា៖លោក គួយ សុឃុន ជាម្ចាស់ទីតាំងស្តុកឈើ បានយកលុយពីថៅកែស្រីជនជាតិវៀតណាមជិត១០ម៉ឺនដុល្លារ មកប្រមូលទិញឈើយកមកស្តុក ដើម្បីដឹកទៅវៀតណាមតាមច្រកកោះញែក ប៉ុស្តិ៧ និងប៉ុស្តិកែវសីមា ដូច្នេះករណីចាប់ឈើគឺ លោក គួយ សុឃុន គាត់ចំណេញវិញទេ ដោយថៅកែវៀតណាមគេទទួលស្គាល់ថាចាប់ពិតប្រាកដ ចឹងត្រូវផ្តល់លុយមកបន្ថែមទុករត់ការ និងបន្តប្រមូលទិញបន្តដោយមិនអោយដៃគូភ័យបាក់ទឹកចិត្ត។
ដូច្នេះលោក គួយ សុឃុន អាចយកលុយនោះមកចាត់ចែងអោយអាជ្ញាធរ សមត្ថកិច្ចជំនាញ ដែលជាវប្បធម៍យូរលង់មកហើយ រឿងហែកប្រយោជន៍ចែកគ្នាពីប្រភពបទល្មើសព្រៃឈើនៅខេត្តមណ្ឌលគិរីនេះ។
ប្រជាពលរដ្ឋលើកឡើងថា៖ លោក ស្វាយ សំអ៊ាង ជាអភិបាលនៃគណៈអភិបាលខេត្តមណ្ឌលគិរី មានតួនាទីសំខាន់ណាស់បង្ក្រាបបទល្មើសព្រៃឈើក្នុងនាមជាសមាជិកគណៈកម្មការជាតិបង្ក្រាបបទល្មើសធនធានធម្មជាតិ តែផ្ទុយទៅវិញ ប្អូនបង្កើតជាមេខ្លោងប្រមូលទិញ ស្តុកទុកឈើ និងនាំចេញទៅវៀតណាម ហើយមុខរបរនេះកើតមានរាប់ឆ្នាំមកហើយ? ដូចជាករណីនេះគេហ៊ានទាយទុកហើយថា៖ ទីតាំងម្ចាស់ឈើមានឈ្មោះ គួយ សុឃុន ជាប្អូនលោកអភិបាលខេត្តមណ្ឌលគិរី និងឈ្មោះ ភ័ក្រ្ត ប្រាកដជាគេមិនបន្តនីតិវិធីឈានដល់ចាប់ខ្លួនអ្នកទាំងនោះទេ គឺស៊ីលុយហើយគេនឹងដាក់ថា ម្ចាស់ទីតាំងជាអញត្តិជន គ្រាន់តែស្វែងរកមុខប៉ុណ្ណោះ ។
មិនអាចទាក់ទងបានពីលោក គួយ សុឃុន ជាម្ចាស់ទីតាំងស្តុកឈើ ដោយគ្មានលេខទូរស័ព្ទ ។
ដោយឡែកលោក ស្វាយ សំអ៊ាង អភិបាលខេត្ត និងលោក វង់ សុខសេរី នាយខណ្ឌរដ្ឋបាលខេត្តមណ្ឌលគិរីក៏មិនអាចសុំការបំភ្លឺបានដែរ។
គេហទំព័រយើងស្វាគមន៏រង់ចាំការបំភ្លឺពីអ្នកពាក់ពន្ធ័ជានិច្ច ៕
