ប្រទេសថៃ ៖ ជនសង្ស័យចំនួន៣នាក់ រួមជាមួយនឹងថ្នាំញៀនជិត១លានគ្រាប់ ត្រូវបានកំលាំងជំនាញនៃអង្គភាពប្រឆាំងគ្រឿងញៀនប្រចាំខេត្តប្រៈជួប ប្រទេសថៃ ធ្វើការតាមប្រមាញ់រហូតឈានដល់ការបង្ក្រាបបាន បន្ទាប់ពីទទួលបានសេចក្តីរាយការណ៏ច្បាស់ពីកំលាំងសម្ងាត់ ក្នុងរយៈពេល២ថ្ងៃរួចមក ។
យោងតាមរបាយការណ៍គឺ នៅវេលាម៉ោង ៨ និង ៣០ នាទីព្រឹកថ្ងៃទី៩ ខែមិថុនា ឆ្នាំ២០១៧ អង្គភាពប្រឆាំងគ្រឿងញៀន នៃស្នងការដ្ឋានតម្រួតខេត្តប្រៈជួប ប្រទេសថៃ បានធ្វើការដាក់កំលាំងដើម្បីស្ទាក់ចាប់រថយន្តពីរគ្រឿង ដែលគេសង្ស័យថាអាចមានការរត់ពន្ធនូវសារធាតុញៀនយកទៅចែកចាយតាមបណ្តាខេត្ត
មួយចំនួននៅភាគខាងត្បូងនៃប្រទេសថៃ ។
នៅពេលនោះដែរមុខសញ្ញាទី១ ក៏បានបង្ហាញខ្លួនគឺជារថយន្តម៉ាកអ៊ីស៊ុយៗ ព៌ណខ្មៅពាក់ស្លាកលេខ បាងកក ៦៩៦៣ ក្នុងពេលនោះដែរ កំលាំងបានអោយសញ្ញាបញ្ជាអោយបញ្ឈប់យានដើម្បីត្រួតពិនិត្យ ដោយក្នុងនោះមានមនុស្សចំនួន២នាក់ គឺអ្នកបើកបរមានឈ្មោះ សុថាត់ ក្រៈចាយសិរី ភេទប្រុស អាយុ៤៥ឆ្នាំ រស់នៅភូមិ៤ឃុំបុះឫស្សី ស្រុកមឿងសុរិន្ទ ខេត្តសុរិន្ទ និងអ្នករួមដំណើរមានឈ្មោះ ខាំរ៉ុន ច័ន្ទអនភេទប្រុស អាយុ៣១ឆ្នាំ រស់នៅភូមិ៣ ឃុំបួវឌ្ឍនា ស្រុកណងផៃ ខេត្តភិតប៊ូន ។ ក្រោយការត្រួតពិនិត្យ ទោះបីដឹងថារថយន្តនេះគឺកំលាំងសម្ងាត់បានបញ្ជាក់យ៉ាងច្បាស់ក៏ដោយ ក៏ការត្រួតពិនិត្យពុំមានជួបប្រទះឃើញអ្វីដែលខុសច្បាប់នោះឡើយ ប៉ុន្តែមិនបានប៉ុន្មាននាទីផង មុខសញ្ញាទី២ក៏បានបង្ហាញខ្លួន គឺជារថយន្តប្រភេទម៉ាស្តាព៌ណស ពាក់ស្លាកលេខ បាងកក ៦៧៥៩ ដោយមានអ្នកបើកបរតែម្នាក់គត់នៅក្នុងរថយន្ត គឺមានឈ្មោះ បឋម ផន ស្ងៀមនុកូល ភេទប្រុស អាយុ២៧ឆ្នាំ រស់នៅភូមិ៤ឃុំណាតាខ្វាន់ ស្រុកមឿង ខេត្តរៈយ៉ង ដោយកំលាំងបានឆែកឆេរនៅក្នុងរថយន្តបានប្រទះឃើញមានថ្នាំញៀនប្រភេទយ៉ាម៉ាចំនួន៤៥៦ដុំ ស្មើនឹង៩១២ ០០០ គ្រាប់ ។
យោងតាមចំលើយសារភាព ពួកគេបាននិយាយថា ជាការដឹកស៊ីឈ្នួលអោយគេតែប៉ុណ្ណោះ ដោយដឹកចេញពីស្រុក ថាអ៊ុថេន ក្នុងខេត្តនគរភ្នំ ទៅកាន់ខេត្តចំនួន៣នៅភាគខាងត្បូងប្រទេសថៃ ពិសេសគឺខេត្តសុងខ្លា ដោយមានឈ្មួញធំចាំទទួលនៅទីនោះហើយពួកគេក្នុងម្នាក់ៗទទួលបាន ៥ ម៉ឺនបាត ។
បច្ចុប្បន្នកំលាំងជំនាញបាននាំខ្លួនពួកគេទាំង៣នាក់ រួមជាមួយនឹងវត្ថុតាង ទៅកាន់ស្នងការខេត្តដើម្បីសាកសួរបន្ត និងចាត់វិធានការតាមផ្លូវច្បាប់៕
