មណ្ឌលគិរី ៖នៅថ្ងៃទី០៩ ខែមិថុនា ឆ្នាំ២០១៧ វេលាម៉ោង០៦ និង១២នាទីព្រឹក ត្រង់ចំណុចទឹកច្រប់ ស្ថិតនៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី មានរថយន្តឡង់គ្រីសស័រមួយគ្រឿង ជួបគ្រោះថ្នាក់ចរាចរណ៏ក្រឡាប់ដោយខ្លួនឯង បង្កឱ្យមនុស្សពីរនាក់រងរបួសធ្ងន់ស្រាល ហើយឈើដែលមានផ្ទុកក្នុងរថយន្តធ្លាក់រាយប៉ាយលើផ្លូវជាតិ ទើបធ្វើឲ្យមានការភ្ញាក់ផ្អើលដល់សមត្ថកិច្ច។
សមត្ថកិច្ចបានឲ្យដឹងថា អ្នកបើកបរឈ្មោះ ថៃ ធារ៉ា ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិពូជ្រៃ ឃុំពូជ្រៃ ស្រុកពេជ្រជា ខេត្តមណ្ឌលគិរី (រងរបួសស្រាល)។ ចំណែកអ្នករួមដំណើរឈ្មោះ នី ភេទប្រុស អាយុ៣២ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិពូជ្រៃ ឃុំពូជ្រៃ ស្រុកពេជ្រជា ខេត្តមណ្ឌលគិរី (រងរបួសធ្ងន់ បាក់ជើងខាងស្ដាំ និងរបួសក្បាល) ។បច្ចុប្បន្នជនរងគ្រោះកំពុងសំរាកព្យាបាលនៅមន្ទីរពេទ្យបង្អែកខេត្ត។ ចំណែករថយន្តដោយមានផ្ទុកឈើផងនោះ ត្រូវបានយកទៅរក្សាទុកនៅខណ្ឌរដ្ឋបាលព្រៃឈើ ប៉ុន្តែនៅមិនទាន់ដឹងពីបរិមាណឈើល្មើសច្បាប់នៅឡើយ។
ការដឹកជញ្ជូនឈើប្រណីតនេះត្រូវគេឃើញថា កើតមានជាហូរហែក្នុងក្រុងសែនមនោរម្យ ប៉ុន្តែមិនដែលឃើញមានជំនាញចុះទប់ស្កាត់ ឬបង្ក្រាបឡើយ។ ឈើក៏ត្រូវបានគេដឹកឆ្លងកាត់ក្រុងសែនមនោរម្យយ៉ាងរលូនឆ្ពោះទៅផ្លូវដាក់ដាំ ស្រុកអូររាំង និងច្រកទ្វារទ្វេភាគីណាមលៀរ ស្រុកពេជ្រា ជាប្រចាំផងដែរ ចំណែកសមត្ថកិច្ចស្ងាត់ជ្រាប លុះត្រាណាឡានក្រឡាប់ក្អួតចេញឈើទើបបានភ្ញាក់ផ្អើល៕
