កំពង់ធំ៖ សេចក្តីរាយការណ៍ បានបញ្ជាក់ថា មានករណីជនឆបោកមួយក្រុម បានយករថយន្តលុចស៊ីស៣៣០មួយគ្រឿង ទៅបញ្ចាំឲ្យទៅឈ្មួញម្នាក់ នៅក្នុងខេត្តសៀមរាប ក្រោយពីបានមើលរថយន្ត ហើយថែមទាំងត្រូវរ៉ូវតំលៃគ្នាហើយ ក៏បានពិនិត្យឯកសាររថយន្ត តែម្ចាស់ហាងពុំបានយកចិត្តទុកដាក់និងឯកសារឲ្យបានច្បាសលាស់ ទើប បានហុចលុយឲ្យទៅជនឆបោកចំនួន២ម៉ឺនដុល្លា ខណៈពេលនោះម្ចាស់ហាងក៏ពិនិត្យម្តងទៀត ទើបដឹងថាជាឯកសារក្លែងក្លាយ រីឯជនសង្ស័យបានវិចលុយ ហើយរត់ចូលរថយន្តបាឡែនមួយគ្រឿង ពណ៌ទឹកប្រាក់ ដែលជារថយន្តបក្ខពួករបស់គេ ឈប់ចាំនៅខាងក្រៅបើកចេញទៅ ។
ប្រភពព័ត៌មានពីសមត្ថកិច្ចបានបន្តថា ក្រោយពីជនឆបោកបានរត់ចូលឡាន ម្ចាស់លុយបាននាំគ្នាជិះម៉ូតូដេញតាម ដោយក្រុមជនសង្ស័យបានយកលុយចំនួន២ម៉ឺនដុល្លាទៅជាមួយផង ដោយមិនបានដឹងថា គោលដៅរបស់ក្រុមជនឆបោកនឹងធ្វើដំណើរឆ្ពោះទៅផ្លូវណានោះទេ តែដោយការយកចិត្តទុកដាក់របស់សមត្ថកិច្ចខេត្តសៀមរាប បានធ្វើកិច្ចសហការជាមួយនឹងកម្លាំងសមត្ថកិច្ចតាមបណ្តាខេត្តជាប់ព្រំប្រទល់ ដើម្បីធ្វើការ ឃ្លាំមើលនិងទប់ស្កាត់។
លុះក្រោយមកលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បានបញ្ជាកម្លាំងដាក់គោលដៅឃ្លាំមើលរថយន្តមុខសញ្ញា តាមការផ្តល់ដំណឹងពីលោកឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ ទើបបានប្រទះឃើញរថយន្តបាឡែន ដែលជាមុខសញ្ញាមកមែន សមត្ថកិច្ចបានឃាត់រថយន្តបាឡែន តែក្រុមជនឆបោកដឹងខ្លួន ក៏បានបើករត់ចូលតាមផ្លូវលំ រីឯកម្លាំងសមត្ថកិច្ចដេញចាប់ ប្រផាត់ប្រភីងទាំងកណ្តាលភ្លៀង ទើបធ្វើឲ្យរថយន្តក្រុមជនសង្ស័យ បានរអិលធ្លាក់ទៅនឹងក្រឡុកក្បាលទៅមុន ទៅមុខលែងរួច ហើយក្រុមនេះបាន បើកទ្វារឡាននាំយកទាំងលុយ២ម៉ឺនដុល្លារត់ចូលក្នុងព្រៃ។
លោកវរៈសេនីយ៍ទោ ខេន ឈុនគ័រ អធិការស្រុកកំពង់ស្វាយ បានឲ្យដឹងថា ក្រោយពីបានទទួលការណែនាំចង្អុលបង្ហាញរបស់លោក ឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ ក្រោមការបញ្ជាផ្ទាល់របស់លោក អ៊ិត សុធា ព្រះរាជអាជ្ញាខេត្តកំពង់ធំ បានដាក់កម្លាំងត្រួតពិនិត្យនៅមុខអធិការដ្ឋាន ខណៈបានប្រទះឃើញរថយន្តបាឡែនដែលជារថយន្តសង្ស័យ បត់ចូលហាងបាយនៅរមណីយដ្ឋានព្រៃប្រស់ ខណៈលោកបានចុះពីលើឡាន ដើរទៅសួរនាំ ស្រាប់តែរថយន្តជនសង្ស័យបានបើករត់ នៅវេលាម៉ោង២ ថ្ងៃទី៥ ខែមិថុនា ឆ្នាំ ២០១៧ ដោយបើក ចូលតាមផ្លូវលំ ក្រោយមកបានរអិលធ្លាក់ក្រឡុក នៅចំនុច តាពិជ្រ ឃុំ នីពេជ ស្រុកកំពង់ស្វាយ ខេត្តកំពង់ធំ ហើយចន្លោះនៃការដេញមានគម្លាតពីគ្នា១គីឡូដី ស្រាប់តែជនសង្ស័យបានចុះពីលើឡាន ហើយរត់ចូលព្រៃបាត់ ។
លោកវរៈសេនីយ៍ទោ ខេន ឈុនគ័រ បានបន្តថា បានដាក់កម្លាំងជាង២០នាក់ នាំគ្នាហ៊ុំព័ទ្ធក្នុងព្រៃរហូតមកដល់ម៉ោង១០យប់ ក៏ពុំទាន់ប្រទះឃើញនៅឡើយទេ តែទោះជាយ៉ាងណានោះ ក្នុងកិច្ចសហប្រតិបត្តិការបង្រ្កាបបទល្មើសនេះ គឺសមត្ថកិច្ចបានឃាត់បានរថយន្តចំនួន ២គ្រឿងផងដែរ ទី១គឺរថយន្តលុចស៊ីស៣៣០ និងរថយន្តបាឡែន អត់ស្លាកលេខមួយគ្រឿង អញ្ចឹងចំនួនលុយ២ម៉ឺនរៀល គឺពួកវាដោះដូរនឹងឡានចំនួន២គ្រឿងហ្នឹង ។
គេសង្កេតឃើញថា រាល់បទល្មើសឆក់ប្លន់ លួច ទ្រព្យសម្បត្តិរបស់អ្នកដ៏ទៃ ឲ្យតែឆ្លងកាត់ខេត្តកំពង់ធំ មានការផ្តល់ព័ត៌មានច្បាស់លាស់ ក្តាប់បាននូវមុខសញ្ញា ជនល្មើស និងភិនភាគរថយន្ត គឺមិនអាចឆ្លងផុតពីទឹកដីខេត្តកំពង់ធំបានឡើយ កន្លងមកមានករណីលួចម៉ូតូ រថយន្ត និងបទល្មើសផ្សេង ភាគច្រើនគឺជាប់អន្ទាក់សមត្ថកិច្ចខេត្តកំពង់ធំ ៕
