ខេត្តរតនគីរី ៖ កាលពីវេលាម៉ោង២នឹង៣០នាទីយប់រំលងអធ្រាត ឈានចូលថ្ងៃទី២៦ ខែឧសភា ឆ្នាំ២០១៧ អ្នកទោសចំនួន៥នាក់ បានលួចរត់ចេញពីពន្ធនាគារភ្នំស្វាយ ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ដោយក្នុងចំណោម៥នាក់ មាន៤នាក់រត់រួច និងម្នាក់ទៀតត្រូវចាប់បានមកវិញ ។ហើយរហូតមកដល់វេលាម៉ោង១១ព្រឹកថ្ងៃទី២៦ ខែឧសភានេះ កម្លាំងអនុរក្សពន្ធនាគារ សហការជាមួយ កម្លាំងអធិការនគរបាលក្រុងបានលុង បានកំពុងឡោមព័ទ្ធក្បែរជើងភ្នំស្វាយ ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ។
អ្នកទោសដែលកំពុងជាប់ឃុំឃាំង នៅពន្ធនាគារខេត្តរតនគិរី ចំនួន៥នាក់ បានរួមគ្នាធ្វើសកម្មភាពហែកគុក ដោយកាត់របងលួស រួចលូនចេញតាមលូបង្ហូទឹក មុនពេលលោតចេញទៅក្រៅ ។ ហេតុការណ៍អ្នកទោស ហែកគុករត់គេចខ្លួននេះបានកើតឡើង នៅវេលាម៉ោងប្រមាណ១២៖៣០នាទីរំលងអាធ្រាត្រចូលថ្ងៃទី២៦ ខែឧសភា ឆ្នាំ២០១៧ ។ អ្នកទោសទាំងនោះត្រូវបានតុលាការកាត់ ទោសពីបទល្មើសគ្រឿងញៀន និងជួញដូរព្រៃឈើ ។
អ្នកទោសទាំង៥នាក់រួមមាន៖ ទី១-ឈ្មោះ កែវ ឆក ជាប់ចោទពីបទរក្សាទុក និងប្រើប្រាស់ដោយខុសច្បាប់ នូវសារធាតុញៀន ហើយឃុំខ្លួនតាមដីកាសម្រេចឃុំខ្លួនលេខ៧៣ ចុះថ្ងៃទី០៣ ខែមេសា ឆ្នាំ២០១៧ ទី២-ឈ្មោះ កែវ ចន្ទ ជាប់ចោទពីបទរក្សាទុក និងប្រើប្រាស់ដោយខុសច្បាប់នូវសារធាតុញៀន ហើយឃុំខ្លួនតាមដីកាសម្រេចឃុំខ្លួនលេខ៧៤ ចុះថ្ងៃទី០៣ ខែមេសា ឆ្នាំ២០១៧ ទី៣-ឈ្មោះ សុខ នី ជាប់ចោទពីបទ ដឹកជញ្ជូន និងប្រមូលផល អនុផលព្រៃឈើ ហើយឃុំខ្លួនតាមដីកាសម្រេចឃុំខ្លួនលេខ១១០ ចុះថ្ងៃទី១៥ ខែឧសភា ឆ្នាំ២០១៧ ទី៤-ឈ្មោះ សូម ហាក់ ជាប់ចោទពីបទ អំពើផ្តល់មធ្យោបាយលួចរត់ ហើយឃុំខ្លួនតាមដីកាសម្រេចឃុំខ្លួនលេខ៣៩ ចុះថ្ងៃទី០៦ ខែមីនា ឆ្នាំ២០១៧ និងទី៥ឈ្មោះ នង វណ្ណា ជាប់ចោទពីបទរក្សាទុក ដោយខុសច្បាប់នូវសារធាតុញៀន ហើយឃុំខ្លួនតាមដីកាសម្រេចឃុំខ្លួនលេខ១០៤ ចុះថ្ងៃទី០៣ ខែឧសភា ឆ្នាំ២០១៧ ៕
សូមបញ្ជាក់ថា ពន្ធនាគារភ្នំស្វាយមួយនេះ មានទណ្ឌិតបានរត់រួចចំនួនពីរដងមកហើយដែរ ប៉ុន្តែកម្លាំងអនុរក្សជាច្រើននាក់ធ្វើឲ្យទណ្ឌិតរត់រួចបានទៀត នេះជាកំហុសរបស់ប្រធានពន្ធនាគារភ្នំស្វាយ មិនបានយកចិត្តទុកដាក់ឲ្យបានល្អនោះទេ ។ សមត្ថកិច្ចបានចាប់ខ្លួនអ្នកទោសម្នាក់ក្នុងចំណោម៥នាក់ ដែលបានហែកគុកនៅខេត្តរតនគីរី រត់គេចខ្លួនកាលពីយប់មិញ ខណដែលអ្នកទោសម្នាក់នោះបាក់កជើងក្នុងពេលលោតចេញពីគុក ៕
