ភ្នំពេញ ៖ លោក សេន សុវណ្ណ អគ្គនាយក នៃអគ្គនាយកដ្ឋានសុខភាពសត្វនិងផលិតកម្មសត្វ នៅបន្តរងការរិះគន់យ៉ាងខ្លាំង ពីប្រជាពលរដ្ឋជាពិសេសកសិករចិញ្ចឹមជ្រូកថា អសមត្ថភាព ហើយថែមទាំងបានឃុបឃិតជាមួយថៅកែក្រុមហ៊ុនមួយចំនួន បើកដៃឲ្យបន្តនាំជ្រូកចូលពីវៀតណាម ដោយខុសច្បាប់បើទោះជារដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ព្រមានចាត់វិធានការចំពោះភាពអាណាធិបតេយ្យនៃការនាំជ្រូកចូលពីវៀតណាមក៏ដោយ ។
ជាក់ស្តែងនៅវេលាម៉ោង១១និង០០យប់ ថ្ងៃទី២៤ ដល់ម៉ោង២និង០០យប់ទៀបភ្លឺ ថ្ងៃទី២៥ ខែឧសភា ឆ្នាំ២០១៧ នេះ ឈ្មួញបានសម្រុកដឹកជ្រូកយ៉ាងគំហុក ចំនួន៦ឡានយីឌុប មកពីវៀតណាមនាំចូលមកកម្ពុជាតាមច្រករបៀងព្រៃតាអី ឡើងមកផ្លូវជាតិលេខ១ កាត់តាមក្រុងស្វាយរៀង ឆ្ពោះទៅរាជធានីភ្នំពេញ ដោយពុំមានសមត្ថកិច្ចត្រួតពិនិត្យ ឬក៏បង្ក្រាបឡើយ។
ប្រជាពលរដ្ឋបានអះអាងថា ខណនេះក្រុមហ៊ុន YKM បាននិងកំពុងសម្រុកដឹកជ្រូកចូលយ៉ាងគំហុកពីប្រទេសវៀតណាមក្នុងមួយយប់ៗ រាប់ពាន់ក្បាលលើសពីច្បាប់អនុញ្ញាត្តិ ហើយការនាំចូលនោះគឺមានទាំងជ្រូកឈឺផងដែរ ។
ប្រជាពលរដ្ឋអះអាងថា ក្រុមហ៊ុន YKM មួយនេះ រួមទាំងក្រុមហ៊ុនល្បីៗ មួយចំនួនទៀត មិនគ្រាន់តែមិនបញ្ឈប់ការនាំចូលជ្រូកលើសច្បាប់អនុញ្ញាត្តិរាប់ពាន់ក្បាលប៉ុណ្ណោះទេ ប៉ុន្តែក្រុមហ៊ុននេះថែមទាំងនាំចូលជ្រូកមានជំងឺ ជ្រូកដែលចិញ្ចឹមដោយប្រើសារធាតុគីមីឲ្យឆាប់ធំធាត់ថែមទៀត ខណដែលជ្រូកប្រភេទនេះ ប៉ះពាល់សុខភាពយ៉ាងធ្ងន់ធ្ងរដល់អ្នកបរិភោគ ។
យោងតាមព័ត៌មានដែលទទួលបាន ក្រុមមន្ត្រីជំនាញនៃអគ្គនាយកដ្ឋានសុខភាពសត្វផលិតកម្មសត្វ សុទ្ធតែបានដឹង ឬ បានទៅអើតមើលឃើញជាក់ស្តែងនៃការនាំចូលជ្រូករបស់ក្រុមហ៊ុន YKM រួមទាំងក្រុមហ៊ុនមួយចំនួនទៀតផងដែរ ។ ប៉ុន្តែមន្ត្រីទាំងនោះមិនគ្រាន់តែមិនបានបង្ក្រាបទេ ហើយថែមទាំងលេចឮព័ត៌មានមកខាងក្រៅថា មន្ត្រីទាំងនោះបានឃុបឃិតទទួលសំណូកថែមទៀត ។
មជ្ឈដ្ឋានទូទៅបានលើកឡើងថា បញ្ហាល្មើសច្បាប់នៃការនាំជ្រូកចូល ហេតុផលគឺបណ្តាលមកពីលោក សេន សុវណ្ណ អសមត្ថភាពក្នុងការគ្រប់គ្រង រួមទាំងបានប្រព្រឹត្តិនូវទង្វើខុសឆ្គង ឬអាចនិយាយថា ពាក់ព័ន្ធដោយផ្ទាល់ជាមួយមន្ត្រីជំនាញដែលចុះត្រួតពិនិត្យនិងបានទទួលសំណូកពីក្រុមហ៊ុនដែលនាំជ្រូកចូលខុសច្បាប់ថែមទៀត ។ ដូច្នេះមានន័យថា ប្រសិនបើមិនមានការឃុបឃិតខាងលើនោះទេម្លេះ ក្រុមហ៊ុននាំជ្រូកចូលពីវៀតណាមក៏មិនព្រហើនបន្តនាំជ្រូកខុសច្បាប់ចូលយ៉ាងអាណាធិបតេយ្យដូច្នេះដែរ ។
រដ្ឋមន្ត្រីក្រសួងកសិកម្មគូរតែចាត់វិធានការឲ្យបានតឹងរឹងបំផុត និងមានប្រសិទ្ធិភាពបំផុតទប់ស្កាត់ឲ្យបានការនាំជ្រូកចូលពីវៀតណាមលើសច្បាប់អនុញ្ញាត្តិ ប្រសិនបើនៅបណ្តែតបណ្តោយឲ្យក្រុមឈ្មួញបន្តនាំជ្រូកវៀតណាមចូលទៀត ប្រជាកសិករខ្មែរចិញ្ចឹមជ្រូកច្បាស់ជាខាតបះដៃបះជើងជាមិនខាន ។
ពាក់ព័ន្ធការរិះគន់ខាងលើនេះ យើងបានព្យាយាមទំនាក់ទំនងទៅមន្ត្រីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វផងដែរ ដើម្បីសុំឲ្យមានការបកស្រាយការពិតឲ្យបានច្បាស់លាស់ ចំពោះការរិះគន់នេះ ប៉ុន្តែពុំមានលេខទូរស័ព្ទ៕
