អន្តរជាតិ ៖ នៅថ្ងៃអង្គារ ទី២៣ ខែឧសភា ប្រធានាធិបតីបណ្តេញចេញពីតំណែង របស់ប្រទេសកូរ៉េខាងត្បូង គឺលោកស្រី Park Geun-Hye បានចូលតុលាការ ជំនុំជម្រះក្តី លើរឿងអាស្រូវអំពើពុករលួយដ៏ធំ ដែលនាំឲ្យលោកស្រីត្រូវគេទម្លាក់ចេញពីតំណែង។
លោកស្រី Park បានដើរចូលទៅក្នុងបន្ទប់តុលាការ សង្កាត់កណ្តាល ក្រុងសេអ៊ូល ដោយជៀសវាងការជួបជាមួយ ជំនិតសម្ងាត់យូរអង្វែងរបស់លោកស្រី និងជាអ្នកដែលរងការចោទប្រកាន់ដូចគ្នា គឺលោកស្រី Choi Soon-Sil ។
ការកាត់ទោសដែលត្រូវបានគេរំពឹងថា នឹងមានរយៈពេលច្រើនខែមួយនេះ គឺជាសកម្មភាពចុងក្រោយនៅក្នុងឆាកល្ខោនដែលបានជះឥទ្ធិពលដល់លោកស្រី Park ដែលត្រូវជាកូនស្រីរបស់មេដឹកនាំផ្តាច់ការម្នាក់ដែលបានបន្តជាប់ឆ្នោតជាប្រធានាធិបតីមុនពេលដែលលោកស្រីត្រូវបានបណ្តេញចេញដោយតុលាការកំពូលរបស់ប្រទេសនេះនៅក្នុងខែមីនា។
លោកស្រី Park ដែលមានអាយុ៦៥ឆ្នាំត្រូវបានចោទប្រកាន់ដោយសភាបន្ទាប់ពីការបង្ហាញអំពីការពាក់ព័ន្ធរបស់លោកស្រីនៅក្នុងរឿងអាស្រូវអំពើពុករលួយដ៏ធំមួយជាមួយអ្នកនាង Choi ដែលជាមិត្តភក្តិរបស់លោកស្រីនិងការរួមចំណែកពីអ្នកជំនួញកំពូលៗរបស់ប្រទេសនេះ ដោយរួមទាំងអ្នកស្នងតំណែងប្រធានក្រុមហ៊ុន Samsung លោក Lee Jae-Yong ផងដែរ។
មិនយូរប៉ុន្មានបន្ទាប់ពីនោះ លោកស្រីត្រូវបានគេឃុំខ្លួននិងរងការចោទប្រកាន់។ការបើកការជំនុំជម្រះនៅថ្ងៃអង្គារនេះគឺជាការបង្ហាញខ្លួនជាសាធារណៈលើកដំបូងរបស់លោកស្រីចាប់តាំងពីលោកស្រី Park ត្រូវបានយកទៅឃុំឃាំងក្នុងខែមីនា។
ការកាត់ទោសនេះអាចបង្ហាញពីពន្លឺថ្មីមួយ លើទំនាក់ទំនងរវាងលោកស្រី Park និងមេក្រុមហ៊ុនគ្រប់គ្រងជាលក្ខណៈគ្រួសារ ដែលចោទប្រកាន់ថាបានសូកប៉ាន់លោកស្រី។
គួរបញ្ជាក់ថា លោកស្រី Park បានប្រឈមមុខនឹងការចោទប្រកាន់ចំនួន១៨ករណី ដោយរួមបញ្ចូលទាំងការសូកប៉ាន់ ការបង្ខិតបង្ខំនិងការរំលោភអំណាចផងដែរ៕
