ខេត្តរតនគិរី ៖ តាមការផ្សាយរបស់គេហទំព័រមួយបានឲ្យដឹងថា យ៉ាងហោចណាស់មានរថយន្តសាំយ៉ុងប្រមាណ៥០គ្រឿង បាននិងកំពុងសម្រុកដឹកឈើប្រណិត ចេញទៅវៀតណាម តាមច្រកអូរយ៉ាដាវ និងច្រកតូចៗ មួយចំនួនទៀត នៅថ្ងៃទី២២ ខែឧសភា ឆ្នាំ២០១៧ នេះ ដោយគ្មានការទប់ស្កាត់ ពីជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធនោះទេ ។
ក្រុមសមត្ថកិច្ចបានខ្សឹបប្រាប់អ្នកសារព័ត៌មានថា រថយន្តសាំយ៉ុងបិទកញ្ចក់ខ្មៅ ដឹកឈើប្រណិតពេញ ធ្វើដំណើរលើផ្លូវជាតិ៧៨ ក្នុងល្បឿនលឿន ដោយពុំខ្លាចគ្រោះថ្នាក់អ្នកដទៃ ជួនកាលហ៊ានបើកកាត់ក្បួនក្រុមគណបក្សនយោបាយ កំពុងបើកយុទ្ធនាការឃោសនាបោះឆ្នោតឃុំ-សង្កាត់ថែមទៀតផង ។ តាមការអួតអាងរបស់ឈ្មួញទាំងក្រុមឈ្មួញដឹកឈើខ្មែរ និងវៀតណាមទាំងនោះ បានិយាយថា ពួកគេមិនខ្លាចច្បាប់នោះទេ ដោយពួកគាត់បង់លុយជូនថ្នាក់លើ អស់ទៅហើយ ហើយបង់តាំងពីថ្នាក់អភិបាលខេត្តដល់អាជ្ញាធរស្រុក រួមទាំងមន្ត្រីជំនាញ សំខាន់មន្ត្រីច្រកតែម្តង ។
តាមព័ត៌មានទទួលបាន រថយន្តដឹកឈើប្រណិតទាំងអស់នោះជារបស់ឈ្មួញដែលធ្លាប់មានឈ្មោះល្បីប្រចាំខេត្តរតនគីរី ឬអាចនិយាយថា ជាឈ្មួញដុះស្លែប្រចាំតំបន់នោះ ហើយទាំងអ្នកសារព័ត៌មាន ប្រជាពលរដ្ឋរួមទាំងអាជ្ញាធរគ្រប់ថ្នាក់ រហូតដល់អភិបាលខេត្តសុទ្ធតែបានស្គាល់ឈ្មោះឈ្មួញឈើទាំងអស់នោះឥតចន្លោះឡើយ ។ ប៉ុន្តែពួកនេះ បានប្តូររូបភាពពីដឹកឈើតាមរថយន្តយីឌុប មកដឹកតាមរថយន្តសាំយ៉ុងវិញ ដើម្បីបំភ័ន្តភ្នែកប្រជាពលរដ្ឋនិងអ្នកសារពត័មាន ។
ទន្ទឹមនោះក្រុមឈ្មួញបានលើកឡើងថា គេសម្រុកដឹកឈើឲ្យទាន់ក្នុងរដូវបោះឆ្នោត ព្រោះថា ដំណាក់កាលនេះ ថ្នាក់លើមិនចាប់អារម្មណ៍រឿងជំនួញឈើខុសច្បាប់នោះទេ ព្រោះរវល់គិតគូររឿងសន្លឹកឆ្នោត ។
ទាក់ទងទៅនឹងសកម្មភាព ដឹកឈើប្រណីតយ៉ាងអាណាធិបតេយ្យនេះដែរ លោក ញ៉ែម សំអឿន អភិបាលរង និងជាអ្នកនាំពាក្យសាលាខេត្តរតនគិរី បានប្រាប់អ្នកសារព័ត៌មានថា ការដឹកជញ្ជូនឈើប្រណីត ឆ្ពោះទៅវៀតណាម គឺរឿងខុសច្បាប់ ព្រោះរដ្ឋាភិបាលបានហាមឃាត់ ប៉ុន្តលោកបានបង្វែររឿងនេះ ទៅសួរអភិបាលរងខេត្តផ្សេងទៀត ដែលទទួលបន្ទុកព្រៃឈើ ។ ចំណែកក្រុមមន្ត្រីព្រៃឈើនាំគ្នាបិទទូរស័ព្ទជិតឈឹងតែម្តង ហើយនេះជាឧកាសរបស់ពួកឈ្មួញនិងមន្ត្រីខិលខូច លួចនាំឈើខុសច្បាប់ចេញ ក្នុងពេលយុទ្ធនាការបោះឆ្នោត៕
