ខេត្តមណ្ឌលគិរី៖ ការដឹកឈើប្រណិតនៅស្រុកកោះញែក មានសកម្មភាពខ្លាំងខ្លាជាងនៅខេត្តរតនគិរី បន្ទាប់ពីលោក មើល សឿនបានកាប់ដើមគីនីន ដែលដាំតាំងពីសម័យសង្គមរាស្រ្តនិយម យកទៅលក់អោយឈ្មួញវៀតណាម ឥឡូវនេះបានបើកដៃអោយឈ្មួញនៅខេត្តរតនគិរីដឹក ឈើប្រណិតដោយសេរី ដោយមានការបើកដៃពីសំណាក់មន្ត្រីដែលពាក់ព័ន្ធនៅក្នុងស្រុកកោះញែក ដូចជាលោក មើល សឿន គណៈបញ្ជាការឯកភាពស្រុកកោះញែក មិនដែលយកភ្នែកមើល និងមានការឃុបឃិតជាមួយឈ្មួញរកស៊ីបទល្មើសព្រៃឈើ តាំងពីយូរយាណាស់មកហើយ រួចបើលោកអភិបាលស្រុកកោះញែក មិនមានការពាក់ព័ន្ធនោះទេ ច្បាស់ជាមានការទប់ស្កាត់ហើយ មិនធូររលុងដូចបច្ចុប្បន្មនេះឡើយ។
ការដឹកឈើនេះ មានរថយន្តមិនក្រោម១០គ្រឿងទេ ដែលដឹកចេញពីភូមិទួលភូមិឆក់ដែក និងស្រែហ៊ុយ ស្រុកកោះញែក ដោយដឹកឆ្លងកាត់តាមស្រុកលំផាត់ ចេញទៅខេត្តរតនគិរី យកទៅលក់នៅប្រទេសវៀតណាម តាមច្រកអូរយ់ាដាវ មានរថយន្តខ្លះយកមកស្តុបទុកនៅអូរវាក់ស្រុកលំផាត់ ដោយមិនមានការទប់ស្កាត់ពីសម្ថកិច្ចដែលនៅតាមដងផ្លូវនោះទេ ទុកបណ្តែតបណ្តោយអោយឡានដឹកបទល្មើសព្រៃឈើទាំងនោះ ទៅដោយរលូន ដឹកតាមរថយន្តទំនើបៗដូចជា រថយន្តឡង់គ្រីស័រ រថយន្តលុចសីស450 TOYOTA១បាំងកន្លះ រថយន្តបាឡែន រថយន្តវីស្តូ រថយន្តវីហ្គោ ជាដើមហើយឈ្មួញរកស៊ីឈើដ៏សកម្មនោះត្រូវបានគេស្គាល់ឈ្មោះមី ដែលជាមន្រ្តីប៉ូលិសពាក់ស័ក្ត៣ បានមករកស៊ីដឹកឈើនៅក្នុងស្រុកកោះញែកយ៉ាងសកម្ម មិនដែលឃើញអស់លោកសមត្ថកិច្ច និងជំនាញធ្វើការបង្រ្កាបម្តងណាឡើយ ដែលធ្វើឱ្យឈ្មួញឈើរូបនេះធ្វើការដឹកជញ្ជូនឈើយ៉ាងអានាធិបតេយ្យ។
ប្រភពបានឱ្យដឹងបន្តថា លោកស័ក្កិ៣នេះ រកស៊ីដឹកឈើយូរមកហើយ ដោយយកលុយទៅបិទមាត់សមត្ថកិច្ច និងជំនាញ ដើម្បីកុំឱ្យចាប់រថយន្តដឹកឈើរបស់ខ្លួន ជុំវិញទៅនឹងការដឹកជញ្ជូនឈើរបស់ឈ្មួញដុះស្លែរូបនេះ មិនដឹងថាលោក មើល សឿន អភិបាលស្រុកកោះញែក ធ្វើមិនដឹងមិនលឺទេដឹង ពីព្រោះការដឹកជញ្ជូនឈើនេះ មានជារៀងរាល់យប់នៅក្នុងស្រុកកោះញែក។
បើតាមការខ្សិបប្រាប់ឱ្យដឹងពីពលរដ្ឋនៅក្នុងស្រុកកោះញែកថា ពេលសមត្ថកិច្ចចុះធ្វើការបង្រ្កាបរថយន្តដឹកឈើ គឺបាត់ពួកឈ្មួញអស់រលីង ដោយសារពេលចុះបង្រ្កាបរបស់កម្លាំងសមត្ថកិច្ចមានដង្កូវក្នុងសាច់ ដែលទទួលបានលាភសក្ការៈពីក្រុមឈ្មួញអោយដំណឹងភ្លាម។
ពលរដ្ឋសង្ឃឹមថា លោក ស្វាយ សំអ៊ាង អភិបាលខេត្តមណ្ឌលគិរី និងមានវិធានការ ចំពោះករណីដឹកឈើខុសច្បាប់នេះ ពីព្រោះអស់លោកសមត្ថកិច្ច និងជំនាញនៅតំបន់នោះបានឃុបឃិតគ្នាជាលក្ខណៈប្រព័ន្ធអស់ហើយ ។
ពាក់ព័ន្ធទៅនឹងបញ្ហាខាងលើនេះ លោក ស្វាយ សំអ៊ាង អភិបាលខេត្តរតនគិរី បានប្រាប់បណ្តាញពត័មានថា លោកនិងដាក់បទបញ្ជាទៅគណៈអភិបាលស្រុក និងចាត់ចែងអោយចុះបង្រ្កាបរាល់បទល្មើសទាំងឡាយណា ដែលកើតឡើងនៅក្នុងស្រុកនេះ និងមិនបណ្តែតបណ្តោយអោយមានរាល់បទល្មើសកើតឡើងនោះទេ៕
