ពត័មានអន្តរជាតិ៖ នៅវេលាម៉ោង01.20នាទីរសៀល ថ្ងៃទី17/05/2017 មានគ្រោះថ្នាក់ចរាចរណ៍មួយកើតឡើងនៅប្រទេសថៃ មានពលករខ្មែរចំនួន៤នាក់បានស្លាប់ភ្លាមៗនៅនឹងកន្លែងកើតហេតុ នៅក្នុងចំណោមពលករខ្មែរទាំង៧នាក់ ខណៈដែលពួកគេបាននាំគ្នា ជិះរថយន្តតាក់ស៊ីចូលទៅកាន់ទីក្រុងបាងកក ដើម្បីរកការងារធ្វើ ក៏បានជួបនឹងឧប្បទ្ទវហេតុនៅតាមដងផ្លូវ ។
តាមប្រភពពត័មាន គឺករណីគ្រោះថ្នាក់ចរាចរណ៍បានកើតឡើង លើកំណាត់ផ្លូវលខ331 ត្រង់ចន្លោះបង្គោលគីឡូម៉ែត្រលេខ 121និង122 ស្ថិតនៅត្រង់ចំណុចណងអ៊ីថូន ភូមិ14 ឃុំកោះខ្នុរ ស្រុកភ្នំសារៈខាម ខេត្តឆាក់ឈើងសៅ ប្រទេសថៃ។
ក្រោយពីកំលាំងតម្រួតបានចុះទៅត្រួតពិនិត្យនៅកន្លែងកើតហេតុ គឺបានសង្គេតឃើញថា មានរថយន្តមួយគ្រឿង ម៉ាកនីសាន់ណាវ៉ារ៉ា ព៌ណខ្មៅ ពាក់ស្លាកលេខ7262 បានបើកទៅបុកពីក្រោយរថយន្តធុនធ្ងន់ម៉ាក ហ៊ីណូ ប្រភេទយីឌុប សណ្តោងរ៉ឺម៉កពាក់ស្លាកលេខ 70.0980 និង 70.3116 ដោយរថយន្តនីសាន់ស្ថិតក្នុងសភាព ខ្ទេចខ្ទី។
បន្ទាប់មកក្រុមតម្រួត ក៏ដូចជាប្រជាពលរដ្ឋ បាននាំគ្នាប្រើប្រាស់ឧបករណ៍ ដើម្បីជួយគាស់ទាញយកសពតៃកុងអ្នកបើកបរ ជាជនជាតិថៃ ដែលត្រូវក្បាលរថយន្តកៀបជាប់ទៅនឹងចង្កូត ចំណែកអ្នកដំណើរនៅខាងក្រោយដែលជាពលករ ជនជាតិខ្មែរចំនួន07នាក់ ត្រូវស្លាប់នៅនឹងកន្លែងចំនួន04នាក់ និង03នាក់ទៀតរងរបួសធ្ងន់ បញ្ជូនទៅកាន់មន្ទីរពទ្យ ដើម្បីជួយសង្គ្រោះបន្ទាន់ផងដែរ ។
អ្នកដំណើរខ្មែរដែលស្លាប់ គេនៅមិនទាន់ស្គាល់អត្តសញ្ញាណនៅឡើយទេ ដោយគ្រាន់តែដឹងថា អ្នករបួសមានឈ្មោះ នីត ភេទស្រី អាយុ34ឆ្នាំ ឈ្មោះខេង ភេទប្រុស អាយុ22ឆ្នាំ និងកុមារម្នាក់អាយុ02ឆ្នាំ ចំណែកអ្នកបើកបរដែលស្លាប់ដែរនោះ មានឈ្មោះ ផុងផាត់ មេតអាំផន ភេទប្រុស អាយុ28ឆ្នាំ រស់នៅភូមិ01 ឃុំបាងក្លឿរ ស្រុកបាងប៉ាក់កុង ខេត្តឆាក់ឈើងសៅ ។
ក្រោយពេលកើតហេតុ កំលាំងសមត្ថកិច្ច ក៍បានចុះធ្វើការសាកសួរបន្ថែម ទៅលើអ្នកដែលរងរបួស កំពុងសម្រាកព្យាបាលនៅឯមន្ទីរពេទ្យ។ ចំណែកសពក៏កំពុងស្រាវជ្រាវរកសាច់ញាតិ ដើម្បីទាក់ទងទៅ អគ្គកុងស៊ុលខ្មែរ ដើម្បីបញ្ជូនទៅកាន់ស្រុកកំណើត នៅប្រទេសកម្ពុជាយើងវិញ។ ជុំវិញបញ្ហានេះ សមត្ថកិច្ចបានសន្និដ្ឋានថា
អាចបណ្តាលមកពីការរអិលទឹកភ្លៀង ដោយសារតែការបើកបរលឿនហួសកំណត់ ៕
