ខេត្តកំពង់ធំ ៖វិធានការរបស់រដ្ឋាភិបាល ដែលបានដាក់ចេញកាលពីខែមករា ឆ្នាំ២០១៦ ក្នុងការបង្ក្រាបបទល្មើសព្រៃឈើ និង ទប់ស្កាត់បទល្មើសរត់ពន្ធឈើ តាមបណ្តារាជធានីខេត្តមួយចំនួន ត្រូវបានមជ្ឈដ្ឋានសាធារណៈនានា វាយតម្លៃថា គឺជារឿងឥតន័យ ព្រោះមកដល់ពេលនេះបទល្មើសកាប់ឈើនិង ដឹកជញ្ជូនឈើនៅតែកើតឡើង ដូចភ្លៀងរលឹមដដែល ។
បើតាមរបាយការណ៍ដែលអ្នកសារព័ត៌មានទទួលបានៗ បង្ហាញថា ចន្លោះពីខែវិច្ឆិកា ឆ្នាំ២០១៦ ដល់ខែឧសភា ឆ្នាំ២០១៧នេះ មានឈើខុសច្បាប់ដឹកឆ្លងកាត់ និងដឹកចេញពីខេត្តកំពង់ធំជាច្រើនម៉ែត្រគូប ឆ្ពោះទៅកាន់រាជធានី
ខេត្តមួយចំនួន និងនាំចេញទៅស្រុកយួនផងដែរ ។
សកម្មភាពកាប់ឈើខុសច្បាប់កើតឡើងក្នុងតំបន់ ព្រៃការពារ ព្រៃអភិរក្ស ដូចជា ព្រៃឡង់ ព្រៃអង់តែន។ល។
នៅក្នុងរបាយការណ៍នីមួយៗបានបង្ហាញថា សកម្មភាពកាប់ឈើ និង ដឹកជញ្ជូនឈើខុសច្បាប់ដែលអាចធ្វើទៅបាន គឺដោយមានការឃុបឃិតសូកប៉ាន់រវាងមន្ត្រីអាជ្ញាធរ និង សមត្ថកិច្ចពាក់ព័ន្ធមួយចំនួន ហើយពួកឈ្មួញក៏បានសូកប៉ាន់មន្ត្រីជំនាញ ដើម្បីចូលទៅកាប់ឈើ នៅក្នុងតំបន់ការពារនិងតំបន់អភិរក្សនោះ។
ជាក់ស្តែង
រថយន្តហ៊ីយ៉ាន់ដាយដឹកឈើធ្នង់ចំនួន៧៤ដុំ របស់ឈ្មោះធា ភេទប្រុស អាយុ២៦ឆ្នាំ រស់នៅភូមិព្រែកតាមាក់ ត្រូវបានសមត្ថកិច្ចរដ្ឋបាលព្រៃឈើកំពង់ថ្ម សហការជាមួយកម្លាំងអាវុធហត្ថស្រុកសន្ទុក ខេត្តកំពង់ធំ ក្រោមការបញ្ជានិងចូលរួមដោយលោក ស្រី សំណាង មេបញ្ជាការកងរាជអាវុធហត្ថស្រុកសន្ទុក ឃាត់ចាប់រថយន្តម៉ាក់ហ៊ីយ៉ាន់ដាយ ដឹកឈើធ្នង់៧៤ដុំ នៅចំណុចមុខមូលដ្ឋានកងរាជអាវុធហត្ថស្រុកសន្ទុក ខេត្តកំពង់ធំ ខណៈពេលដែលរថយន្តកំពុងធ្វើដំណើរដឹកឈើ នៅវេលាម៉ោង២ ថ្ងៃទី១៣ ខែឧសភា ឆ្នាំ២០១៧ ។
ប្រភពពត៍មានពីលោក ស្រី សំណាង បានអោយដឹងថា បន្ទាប់ពីបានទទួលពត៏មានពីបណ្ដាញ លោកបានបញ្ជារអោយកម្លាំងអាវុធហត្ថ សហការនិងរដ្ឋបាលព្រៃឈើ បានត្រៀមកម្លាំងចាំស្ទាក់ចាប់ លុះមួយសន្ទុះក្រោយ ក៍បានឃើញរថយន្តនោះ ដឹកឈើចេញពីខេត្តកំពង់ធំ ខណៈពេលនោះកម្លាំងសមត្ថកិច្ចបានស្ទាក់ឃាត់សួរនាំ ឃើញថាមិនមានច្បាប់ទំលាប់អីទេ ហើយក៍បានប្រគល់អោយទៅជំនាញផ្នែករដ្ឋបាលព្រៃឈើកំពង់ថ្ម ព្រមទាំងឃាត់ខ្លួនអ្នកបើកបរ និងអ្នករួមដំណើរចំនួន២នាក់ ស្រីមួយនាក់ ប្រុសម្នាក់់ យកទៅសាកសួរ នៅផ្នែករដ្ឋបាលព្រៃឈើកំពង់ថ្ម និងធ្វើកំណត់ហេតុ បញ្ជូនទៅរដ្ឋបាលព្រៃឈើដើម្បីចាត់ការបន្ត។
លោក សុទ្ធ ម៉ារី នាយផ្នែករដ្ឋបាលព្រៃឈើកំពងថ្ម បានអោយដឹងថា ឈើធ្នង់ដែលផ្ទុកលើរថយន្តម៉ាកហ៊ីយ៉ាន់ដាយនោះ មានចំនួន៧៤ដុំស្មើនិង១.៣៧១គីប ឈើនិងរថយន្តត្រូវបានរក្សាទុក នៅផ្នែករដ្ឋបាលព្រៃឈើកំពង់ថ្ម ចំណែកអ្នកបើកបរនិងអ្នករួមដំណើរ ត្រូវបានកសាងសំណុំរឿងទៅតាមផ្លូវច្បាប់ ៕
