ខេត្តកំពង់ធំ ៖ នៅវេលាម៉ោង១២ ថ្ងៃទី១១ ខែឧសភា ឆ្នាំ២០១៧រថយន្តទេស ចរណ៍ដឹកឈើធ្នង់៣៦ដុំរបស់ក្រុមហ៊ុនថោងស៊ីន ត្រូវបានសមត្ថកិច្ចរដ្ឋបាលព្រៃឈើកំពង់ថ្ម សហការជាមួយកម្លាំងអាវុធហត្ថស្រុកសន្ទុក ក្រោមការបញ្ជាររបស់លោកអ៊ិត សុធា ព្រះរាជអាជ្ញាសាលាតំបូងខេត្តកំពង់ធំ ឃាត់ចាប់បាននៅចំណុចភូមិជ្រាប់ ឃុំជ្រាប់ ស្រុកសន្ទុក ខេត្តកំពង់ធំ។
ប្រភពពត៍មានពីលោកព្រះរាជអាជ្ញា បានអោយដឹងថាបន្ទាប់ពីបានទទួលពត៏មានពីបណ្ដាញ លោកក៏បានបញ្ជាឲ្យកម្លាំងអាវុធហត្ថនិងរដ្ឋបាលព្រៃឈើ បានត្រៀមកម្លាំងចាំស្ទាក់ចាប់លុះមួយម៉ោងក្រោយមកក៍បានឃើញរថយន្តនោះ ដឹកឈើចេញពីខេត្តព្រះវិហារ ខណៈពេលនោះ កម្លាំងសមត្ថកិច្ចបានដេញតាមប្រកៀកប្រកិតគ្នា លុះមកដល់ចំណុចភូមិឃុំខាងលើ ទើបស្ទាក់ចាប់បាន ព្រមទាំងឃាត់ខ្លួនអ្នកបើកបរ និងព្រូឡានចំនួន២នាក់យកទៅសាកសួរ នៅស្នាក់ការអាវុធហត្ថស្រុកសន្ទុក និងធ្វើកំណត់ហេតុបញ្ជូនទៅរដ្ឋបាលព្រៃឈើដើម្បីចាត់ការបន្ត។
លោកសូរ៉ាត់នាយសង្កាត់រដ្ឋបាលព្រៃឈើតាំងក្រសាំងបានអោយដឹងថា ឈើធ្នង់ដែលផ្ទុកលើរថយន្តក្រុងមានចំនួន៣៦ដុំស្មើរនិង១.១២០គីប ឈើនិងរថយន្តត្រូវបានរក្សាទុកនៅសង្កាត់រដ្ឋបាលព្រៃឈើតាំងក្រសាំងចំណែកអ្នកបើកបរនិងព្រូឡាន ត្រូវបានបញ្ជូនបន្តទៅតុលាការ ចាត់ការបន្តទៅតាមផ្លូវច្បាប់ ៕
