ភ្នំពេញ៖ កូនប្រុសបង្កើតរបស់តារាកំប្លែងនាយ ហុង ដា ដែលជាប់សង្ស័យក្នុងការសម្លាប់ម្ដាយចុងរបស់ខ្លួនកាលពីថ្ងៃទី១១ឧសភានៅក្នុងបន្ទប់ជាន់ទី៥ នៃអគារខុនដូ កំពុងស្ថាបនា ក្នុងភូមិតាឡី សង្កាត់ដង្កោ ខណ្ឌដង្កោ ពោលនៅក្រោយផ្សារ សារឿនយ៉ានី ត្រូវបានកម្លាំងអាវុធហត្ថរាជធានីភ្នំពេញ និងខណ្ឌជ្រោយចង្វា បានចាប់ខ្លួនបានហើយ នៅខាងក្រោយវិហារចាម នៅរសៀលថ្ងៃទី១២ ខែឧសភា ឆ្នាំ២០១៧។
មន្ដ្រីអាវុធហត្ថបានឲ្យដឹងថា នៅពេលនេះជនដៃដល់និងសង្សា ត្រូវបាននាំខ្លួនភ្លាមៗ ទៅកាន់ទីបញ្ជាការដ្ឋានអាវុធហត្ថរាជធានីភ្នំពេញ ដើម្បីធ្វើការសួរនាំបន្ដទៀត។ករណីនេះក្រៅពីផ្អែកលើកាម៉េរ៉ាសុវត្ថិភាព សមត្ថកិច្ចមូលដ្ឋានបានឲ្យដឹងថា មុនពេលមានការភ្ញាក់ផ្អើលនេះ មានស្ត្រីម្នាក់ឈ្មោះ អឿន ចិន្តា ត្រូវជាប្អូនស្រីបង្កើតរបស់លោក ហុង ដា បានប្រាប់ថា ពេលមកពីច្រៀងវិញ ក៏បានប្រទះឃើញជនសង្ស័យដែលត្រូវជាក្មួយរបស់គាត់ ចេញពីខុនដូនោះដែរ ក្នុងស្ថានភាពមានញើសជោកខ្លួន។
ស្អែកឡើង ពេលនាងចេញដើរលេងតាមបន្ទប់ខុនដូ ក្នុងជាន់ទី៥ ដល់បន្ទប់របស់ស្ត្រីរងគ្រោះ ស្រាប់តែប្រទះឃើញជនរងគ្រោះ មានភួយរុំក្បាលនឹងមុខ មើលមិនស្គាល់ទេ ហើយគាត់ក៏មានការភ័យស្លន់ស្លោរ បានទូរស័ព្ទរាយការណ៍ ទៅសមត្ថកិច្ចភ្លាមៗ ដើម្បីសុំការអន្តរាគមន៍។
សូមបញ្ជាក់ដែរថា ស្ត្រីដែលត្រូវជនមិនស្គាល់មុខសម្លាប់នោះ គឺមានឈ្មោះ ស៊ឹម ចន្ធី ហៅស្រីមុំ អាយុ១៩ឆ្នាំ គឺជាប្រពន្ធទី២របស់លោក ហុង ដា ដែលមកស្នាក់នៅក្នុងខុនដូនេះ ជាងកន្លះឆ្នាំមកហើយ។កូនប្រុសនាយហុងដាជាមួយប្រពន្ធដើមឈ្មោះនាង រ៉េន សុធារី ហៅ ឃ្មឹប ឫខ្សុច ដែលជាប់សង្ស័យជាឃាតករសម្លាប់ម្តាយចុងមានឈ្មោះថារី សុខខេន ហៅអានិច គិតមកដល់ឆ្នាំ២០១៧នេះ អាយុជិត២០ឆ្នាំហើយ។
សូមបញ្ជាក់ដែរថា នាយ ហុងដា ក្នុងវ័យ៤៥ឆ្នាំឈ្មោះពិតគឺលោកអឿន សុខា ជាតារាចម្រៀងនិងកំប្លែងជាមួយក្រុមនាយកុយ ។ គាត់ជា អតីតជាអ្នកសិល្បៈល្ខោនបាសាក់ តវង្សត្រកូលតាំងពីជីតាមក ។ នាយបានចូលប្រឡូកក្នុងវិស័យសិល្បៈតាំងពីឆ្នាំ១៩៧៩ ដែលកាលនោះជីតារបស់នាយជាតួយក្ស ឪពុកនិងម្តាយជាតួឯក ក្នុងក្រុមល្ខោនបាសាក់បាក់ ស្រេង ព្រួញមាស ៕
