ភ្នំពេញ៖ នាយឧត្តមសេនីយ៏ផុតលេខផ្កាយមាស៥ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានធ្វើការព្រមានខ្លាំងៗ ទៅលើបក្សប្រឆាំង ប្រសិនបើពូកគេនៅតែធ្វើសកម្មភាព និងញុះញង់បង្កហឹង្សាដូចកាលបោះឆ្នោតឆ្នាំ២០១៣ កន្លងទៅ ដោយ សម្តេចបញ្ជាក់ថា បើពួកគេនៅតែបន្តធ្វើសកម្មភាពខាងលើនេះ នៅមុននិងក្រោយការបោះឆ្នោត ឆ្នាំ២០១៧-២០១៨ នោះពួកគេនិងប្រឈមការបង្ក្រាប ដោយមិនលើកលែងនោះឡើយ។
សម្តេច ហ៊ុន សែន បានថ្លែងដូច្នេះ នៅក្នុងទិវាអតីតយុទ្ធជនកម្ពុជា នៅកោះពេជ្រនាព្រឹកថ្ងៃទី១០ ខែឧសភា ឆ្នាំ២០១៧ ខណៈសម្តេចបានផ្តល់ជូនថវិកា២០ម៉ឺនរៀលសម្រាប់អតីតយុទ្ធជនផងដែរ។
សម្តេច ហ៊ុន សែន បានថ្លែងថា កាលពីមុននិងក្រោយការបោះឆ្នោតឆ្នាំ២០១៣ គណបក្សប្រឆាំងបានធ្វើសកម្មភាព ញុះញង់បង្កហឹង្សា ដូចជាការរារាំងការបោះឆ្នោត ការដុតបំផ្លាញរថយន្តសមត្ថកិច្ច ការប្រមូលផ្តុំធ្វើបាតុកម្មហឹង្សា រួមទាំងសកម្មភាពជាច្រើនទៀតប្រឆាំងរាជរដ្ឋាភិបាល។ ប៉ុន្តែរាជរដ្ឋាភិបាលបាន ខិតខំអត់ធ្មត់ ព្រោះតែចង់រក្សាសុវត្ថិភាព សន្តិភាព រួមទាំងឆន្ទៈបង្រួបបង្រួមជាតិ។ប៉ុន្តែនៅមុននិងក្រោយការបោះឆ្នោតឆ្នាំ២០១៧ -២០១៨ ខាងមុខនេះ រាជរដ្ឋាភិបាលនិងមិនបណ្តោយឲ្យក្រុមបក្សប្រឆាំងធ្វើសកម្មភាពបង្កហឹង្សាដូចកាលបោះឆ្នោតឆ្នាំ២០១៣ នោះឡើយ។ សម្តេចបញ្ជាក់ថា នឹងប្រើកម្លាំងប្រដាប់អាវុធ បង្រ្កាបសកម្មភាពទាំងអស់នោះ។
សម្តេចនាយករដ្ឋមន្ត្រីបានសង្កត់ធ្ងន់ថា រាល់សកម្មភាពរបស់បក្សប្រឆាំងនាពេលកន្លងមក បានបង្ហាញយ៉ាងច្បាស់ថា ពួកគេចង់បំផ្លាញនូវសេចក្តីសុខរបស់ប្រជាពលរដ្ឋកម្ពុជា សំខាន់បំផ្លាញសន្តិភាពដែលយើងទាំងអស់គ្នា ខិតខំរកបានដោយលំបាក។ដូច្នេះយើងនឹងមិនបណ្តាយឲ្យពួកគេបន្តធ្វើសកម្មភាពបែបញុះញង់បង្កសង្គ្រាម បំផ្លាញសន្តិភាពនោះឡើយ។
យ៉ាងណាក៏ដោយ សម្តេចបានអះអាងថា គណបក្សប្រជាជនកម្ពុជា និងឈ្នះឆ្នោតនៅគ្រប់ការបោះឆ្នោតជារៀងរហូតទៅ ព្រោថា ប្រជាពលរដ្ឋភាគច្រើនលើសលប់ នៅតែបន្តគាំទ្រការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដោយហេតុថា អ្វីៗដែលមាននៅពេលនេះ រួមទាំងសន្តិភាពផង គឺជាស្នាដៃរបស់គណបក្សប្រជាជនកម្ពុជា។
នៅក្នុងពិធីសំណេះសំណាលនេះ សម្តេចតេជោ ហ៊ុន សែន ក៏បានមានប្រសាសន៍រំលឹកពីភាព ខ្លោចផ្សានៃប្រទេសកម្ពុជា ដែលបានឆ្លងកាត់នូវសង្គ្រាមជាច្រើន ជាពិសេសក្នុងរបបប្រល័យពូជសាសន៍ ប៉ុលពត ដែលបានបន្សល់ទុកនូវអតីតយុទ្ធជនដែលជាជនពិការ និវត្តន៍ជន និងជនបាត់បង់សមត្ថភាព ការងារ ព្រមទាំងគ្រួសារ យុទ្ធជនពលី មរណៈជាច្រើន។ ក្រោយពីប្រទេសជាតិទទួលបានសុខសន្តិភាព រាជរដ្ឋាភិបាលបានដាក់ចេញនូវគោលនយោបាយជាច្រើន ក្នុងការលើកកម្ពស់សុខមាលភាព និងជីវភាព រស់នៅរបស់បងប្អូនប្រជាពលរដ្ឋ។ តាមរយៈក្រសួងសង្គមកិច្ចអតីតយុទ្ធជន យុវនីតិសម្បទា ក៏ដូចជា ស្ថាប័នពាក់ព័ន្ឋនានា តែងតែយកចិត្តទុកដាក់ចំពោះបងប្អូនអតីតយុទ្ធជន និងក្រុមគ្រួសារតាមគោល នយោបាយរបស់រាជរដ្ឋាភិបាល។ ក្នុងឱកាសនេះដែរ សម្តេចតេជោនាយករដ្ឋមន្រ្តី បានស្នើអោយមន្រ្តី និងអ្នកចូលរួមក្នុងពិធីទាំងមូល ក្រោកឈរ គោរពវិញ្ញាណក្ខ័នរំលែកទុក្ខដល់កងទ័ពមួយខៀវកម្ពុជាចំនួន៤នាក់ ដែលបានពលីជីវិតនៅក្នុងបេសកកម្មសន្តិភាព នៅអាហ្រ្វិកកណ្តាល ៕
