ខេត្តរតនគិរី៖ ឈើប្រណឹតរាប់សិបម៉ែត្រគូប ត្រូវពួកឈ្មួញលួចដឹកយ៉ាងលាក់កំបាំងបំផុតដែលគ្មាននរណានឹកស្មានដល់ ដោយពួកគេដឹកតាមផ្លូវមួយខ្សែកាត់ព្រៃកៅស៊ូ កាត់អូរ កាត់ជ្រលងភ្នំ ដែលកន្លងមកសកម្មភាពដឹកជញ្ជូនបទល្មើសបែបនេះ ពុំធ្លាប់បានត្រូវគេជួបប្រទះនោះឡើយ។
នៅវេលាម៉ោងប្រមាណ5និង30នាទី ព្រឹកថ្ងៃទី05 ខែឧសភា រថយន្តដឹកឈើតម្រៀបគ្នាមួយខ្សែ កំពុងធ្វើដំណើរ នៅក្នុងព្រៃចំការកៅស៊ូរបស់ក្រុមហ៊ុន74 ក្បែរចំណុចច្រករបៀងភ្នំក្រហម ដែលជាច្រករបស់វរៈនគរបាលការពារព្រំដែនគោកលេខ601 ដើម្បីចេញទៅស្រុកយួន ក៏ត្រូវបានប៉េអឹមស្រុកអូរយ៉ាដាវ និងប៉េអឹមខេត្តចាប់បង្រ្កាបបានទាន់ពេលវេលា ក្រោយពីមានបញ្ជាពីលោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តរតនគិរី ។
រថយន្តដឹកឈើ មានចំនួន04គ្រឿង សុទ្ធតែជាប្រភេទរថយន្តឡង់គ្រិះស័រកែច្នៃ ចំណែក1គ្រឿងទៀត បានទម្លាក់ឈើចេញ ហើយបានបើកគេចខ្លួនផុតពីប្រតិបត្តិការនោះហើយ ក្រោយពីម្ចាស់រថយន្ត1គ្រឿងនោះបានដឹងអំពីការចុះបង្រ្កាបនេះ។ឈើទាំងនោះត្រូវគេសន្និដ្ឋានថា មិនក្រោមពី30ម៉ែត្រត្រីគុណនោះទេ។
មេបញ្ជាការកងរាជអាវុធហត្ថស្រុកអូរយ៉ាដាវ លោក សុខ មីន នៅក្នុងប្រតិបត្តិការនោះបានអោយដឹងថា វត្ថុតាងទាំងនេះ នឹងត្រូវដឹកទៅកាន់បញ្ជាការដ្ឋានកងរាជអាវុធហត្ថស្រុក ដើម្បីកសាងនីតិវិធី មុននឹងបញ្ជូនអោយទៅស្ថាប័នជំនាញផ្សេងទៀតនោះ។ លោក សុខ មីន បន្តថា ខាងកំលាំងអាវុធហត្ថរបស់លោក ក្រោមបញ្ជាម៉ឺងម៉ាត់ពីឧត្តមសេនីយ៍ត្រី គឹម រស្មី កំលាំងរបស់លោកបានខិតខំទប់ស្កាត់លើជំនួញព្រៃឈើនេះយ៉ាងសកម្ម តាមរយៈសេចក្តីរាយការណ៍ របស់ភ្នាក់ងារសម្ងាត់ ដែលផ្តល់ជូនសមត្ថកិច្ចរបស់លោក។ហើយ ឈើមួយចំនួន គឺក្រុមឈ្មួញបានទិញពីអ្នកដឹកឈើតាមម៉ូតូ ជាក់ស្តែង កំណាត់ឈើខ្លីៗនេះ គឺជាប្រភេទដែលដឹកតាមម៉ូតូ។
សូមជម្រាបថា រយៈពេលប្រមាណជាង3ខែមកហើយ នៅចំណុចវរៈនគរបាលការពារព្រំដែនគោកលេខ601ច្រករបៀងភ្នំក្រហមនេះ បានលេចឮព័ត៌មានថា មានការលួចលាក់ធ្វើជំនួញឈើខុសច្បាប់ តាមច្រករបៀងភ្នំក្រហមនេះយូរណាស់មកហើយ ដោយសារតែមានការបើកដៃពីមេប៉ុស្តិ៍ច្រករបៀងភ្នំក្រហមឈ្មោះ យ៉ាត ។ ប្រភពបាននិយាយថា រាល់ជំនួញឈើខុសច្បាប់ទៅប្រទេសវៀតណាម មិនត្រឹមតែចេញតាមច្រកភ្នំក្រហមនេះទេ គឺនៅមានច្រកមួយទៀត ហៅថា ច្រករបៀងសង្កេតការណ៍ភូមិឡំ ។
ជុំវិញការចោទប្រកាន់ប៉ុស្តិ៍សង្កេតការណ៍ទាំងពីរនេះ លោក យ៉ាត មេប៉ុស្តិ៍សង្កេតការណ៍ច្រករបៀងភ្នំក្រហម មិនអាចស្វែងរកការបំភ្លឺតាមប្រព័ន្ធទូរស័ព្ទបានទេ ដោយសារតែគ្មានអ្នកលើក។ ដោយឡែក ច្រករបៀងសង្កេតការណ៍ភូមិឡំ មិនអាចស្វែងរកការទំនាក់ទំនងបានឡើយ។ ប៉ុន្តែនៅមុននេះបន្តិច មេប៉ុស្តិ៍ច្រករបៀងភ្នំក្រហម លោក យ៉ាត បានប្រាប់អ្នកកាសែតថា មូលហេតុមានការចាប់បទល្មើសនេះ
ដោយសារតែ នៅរាត្រីនោះ ឈ្មួញសុំចេញតែលោកមិនអោយចេញទេថ្ងៃនេះ ។
ចំណែកមេបញ្ជាការវរៈនគរបាលការពារព្រំដែនគោកលេខ៦២៣ លោក ងួន សុវណ្ណា បានបញ្ជាក់តាមទូរស័ព្ទ អោយក្រុមអ្នកសារពត៌មានដឹងនៅរសៀលថ្ងៃដដែលនេះថា សកម្មភាពដឹកនេះគឺតិចតួចទេ បើចង់ចាប់សូមចាប់តាមផ្លូវលេខ19 គឺមានច្រើនជាងនេះទៅទៀត រីឯវត្ថុតាងឈើនឹងរថយន្តនិងសម្ភារៈមួយចំនួនទៀត ត្រូវយកមករក្សាទុកបណ្តោះអាសន្ននៅកងរាជអាវុធហត្ថស្រុកអូរយ៉ាដាវ៕
