វិធីកោសខ្យល់ ដើម្បីព្យាបាលជម្ងឺ ដែលពេញនិយមនៅស្រុកខ្មែរ និងតំបន់អាស៊ី ត្រូវបានគេដឹងថា មានដើមកំណើតពីប្រទេសចិន ដែលមានពាក្យថា «刮痧 (Gua Sha) » ។ ពាក្យ «刮痧» ផ្សំឡើងពីអក្សរ «刮» និង «痧» ដែលពាក្យ «刮 (Gua)» ប្រែបានថា «កោស» និង «痧 (Sha)» ប្រែបានថា «ខ្សាច់»។ ជាការពិត 痧 ត្រូវសរសេរថា 沙 ដែលមានន័យថាខ្សាច់ដែលយើងមើលឃើញនៅមាត់សមុទ្រនោះឯង ប៉ុន្តែត្រូវភាសាចិនអភិវឌ្ឍមកជា 痧 សម្រាប់ប្រើនៅក្នុងភាសាពេទ្យវិញ។ Sha (痧) គឺជាគ្រាប់តូចៗពណ៌ក្រហមនៅលើស្បែក បន្ទាប់ពីយើងធ្វើការកោសនៅលើស្បែក។
ទោះជាយ៉ាងណា អ្វីដែលគួរចាប់អារម្មណ៍ថា តើមនុស្សប្រភេទណា មិនគួរនឹងប្រើវិធីកោសខ្យល់នេះ សម្រាប់ការព្យាបាល?
១. កុមារ៖បញ្ហានេះភាគច្រើនកើតឡើងចំពោះម្ដាយវ័យក្មេងដែលនៅឆ្ងាយពីពេទ្យ ឬនៅតាមទីជនបទ ពួកគាត់មានគំនិតបែបបុរាណ ដោយយល់ថាការកោសខ្យល់ឱ្យកុមារ គឺដូចនឹងមនុស្សធំដែរ មិនប៉ះពាល់អីទេ។ ប៉ុន្តែផ្ទុយទៅវិញការកោសខ្យល់ទៅលើរាង្គកាយរបស់កុមារមានផលអវិជ្ជមានជាច្រើនវិញទេ។
អ្នកដឹងហើយថាកូនក្មេង គឺមានស្បែកទន់ខ្សោយណាស់ ប៉ះមេរោគបន្តិចមិនបានផង ឆាប់កន្ទួលរមាស់ ឆាប់ឆ្លងនូវបាក់តេរីផ្សេងៗយ៉ាងងាយ។ ម្យ៉ាងទៀតចលនាឈាមរបស់កុមារងាយរងនូវសម្ពាធយ៉ាងខ្លាំងនៅពេលកុមារទទួលរងនូវការកោសខ្យល់។
២. ស្ត្រីមានផ្ទៃពោះ
អ្នកត្រូវចាំថា ក្នុងកាលៈទេសៈណាក៏មិនត្រូវកោសខ្យល់ដែរ ប្រសិនបើអ្នកមានផ្ទៃពោះ។
៣. មនុស្សដែលមានជំងឺបេះដូង
អ្នកដែលមានជំងឺបេះដូង គឺត្រូវហាមជាដាច់ខាតក្នុងការកោសខ្យល់នេះ។ បើយោងតាមក្រុមគ្រូពេទ្យពេទ្យបុរាណថា ចលនា និងចង្វាក់បេះដូងនឹងធ្វើបង្ករឱ្យមានការរលាក។ ការកោសខ្យល់នឹងធ្វើឱ្យមានការវាយប្រហារដល់បេះដូងជាថ្មីម្ដងទៀត នោះគឺជារឿងដែលគ្រោះថ្នាក់បំផុត អាចដល់ការពិការ ឬបាត់បង់ជីវិត។
៤. មនុស្សដែលមានសម្ពាធឈាមខ្ពស់
ពេលសម្ពាធឈាមឡើងខ្ពស់ គឺមានន័យថាសរសៃឈាមរីកធំដែរនៅពេលធ្វើការកោសខ្យល់នោះ។ ហើយការកោសនេះអាចធ្វើអ្នកជំងឺវៀចមុខវៀចមាត់ និងងងឹតភ្នែក។
នៅពេលមានសម្ពាធឈាមឡើងខ្ពស់ អ្នកជំងឺគួរតែគេងចុះឱ្យត្រង់ដើម្បីសម្រាក និងញ៉ាំនូវថ្នាំបន្ថយសម្ពាធឈាមជាបន្ទាន់។ កុំចាប់សរសៃ ឬកោសខ្យល់ឱ្យសោះ។
៥. អ្នកដែលមានជំងឺស្បែក ឬរបួសរោគសើស្បែក
នេះក៏ជាបញ្ហាធំផងដែរ ព្រោះពេលអ្នកមានបញ្ហានៅលើស្បែក ហើយអ្នកនៅបង្ខំធ្វើការកោសខ្យល់ទៀតនោះ អ្នកនឹងប្រឈមមុខជាមួយនឹងបញ្ហា អាឡែរហ្ស៊ីស្បែក និងងាយឱ្យអ្នកឆ្លងមេរោគយ៉ាងលឿនបំផុត។
៦. អ្នកដែលឈឺកញ្ចឹងក និងស្មា
ការឈឺកញ្ចឹងក និងស្មាអាចបង្ករឡើងដោយសារតែការគេងដោយប្រើខ្នើយកើយនឹងខ្ពស់ពេក ការគេងដែលមានឥរិយាបថមិនត្រឹមត្រូវ នោះធ្វើឱ្យសរសៃឈាមឡើងដុំ និងកកស្ទះ។ ដូចនេះការកោសខ្យល់អាចបង្ករឱ្យមានការហូរឈាមនៅក្រោមស្បែក៕
