ក្រុមតម្រួតថៃ សហការជាមួយនឹងកំលាំងអន្តោប្រវេសន៍ ខេត្តស្រះកែវ តាមប្រមាញ់ និងឃាត់ខ្លួនបាន ពលករខ្មែរប្រមាណជាង៣០នាក់ ដែលគ្មានលិខិតស្នាមស្របច្បាប់ ខណៈដែលពួកគេទាំងអស់គ្នា បានលបលួចធ្វើដំណើរតាមរថយន្តរបស់មេខ្យល់ថៃ បំរុងឆ្ពោះទៅកាន់ទីក្រុងបាងកក ដើម្បីរកការងារធ្វើ ។
នៅល្ងាចថ្ងៃទី ២៧ ខែមេសា ឆ្នាំ២០១៧ ក្រោយពីទទួលបានព័ត៌មាន និងសេចក្តីរាយការណ៍យ៉ាងច្បាស់រួចមក កំលាំងតម្រួតសហការជាមួយនិងកំលាំងអន្តោប្រវេសន៍ នៃស្ថានីយ៍តម្រួតខេត្តស្រះកែវ បានចេញ ប្រតិបត្តិការឈរជើង នៅលើកំណាត់ផ្លូវតាមខ្សែបន្ទាត់ព្រំដែន សិរីភិន ត្រង់ចំណុចផ្លូវ បំបែកចូលទៅឃុំហ្វាកហ៊ួយ ស្ថិតក្នុងឃុំខ្លងណាំសៃ ស្រុកអារញ្ញប្រាក់ថេត ខេត្តស្រះកែវ ។
នៅក្នុងកិច្ចប្រតិបត្តិការនោះដែរ ដោយមានការសង្ស័យ កំលាំងបានស្ទាក់ឃាត់រថយន្ត ចំនួន៣គ្រឿង ដែលក្នុងនោះរថយន្តទី១ និងទី២ មានម៉ាកអ៊ីស៊ុយៗ និងរថយន្តខាងក្រោយគេ គឺម៉ាកតូយ៉ូតា ដែលជាប្រភេទរថយន្តឃ្លុបសម្រាប់ដឹកទំនិញ ។ នៅពេលដែលសមត្ថកិច្ចបញ្ជាអោយរថយន្តទាំង៣គ្រឿងឈប់ ដើម្បីត្រួតពិនិត្យ ស្រាប់តែរថយន្តទី១ និងទី២ បានបើកគេចចេញពីការស្ទាក់ចាប់របស់ក្រុមតម្រួត ប៉ុន្តែទោះបីជាយ៉ាងណា ក៏កំលាំងបានដេញតាមរហូតចាប់បាន រីឯរថយន្តទី៣ បានឈប់តាមការណែនាំ ដោយអ្នកបើកបរមានឈ្មោះ សុរិយ៉ុន មីវិរ៉ាត់ ភេទប្រុស អាយុ៣៧ឆ្នាំ រស់នៅខេត្តស្រះកែវ ។
ក្រោយពេលត្រួតពិនិត្យទៅលើរថយន្តដែលបិទឃ្លុបជិតនោះ គឺមានពលករខ្មែរជាច្រើននាក់ ដែលអ្នកបើកបរបានញាត់យ៉ាងណែននៅក្នុងឃ្លុបរថយន្ត រួមជាមួយនឹងកាបូបស្ពាយមួយម្នាក់ថែមទៀតផង បើសរុបទៅលើរថយន្តទាំង៣គ្រឿង គឺមានពលករខ្មែរដែលបានលបលួចឆ្លងដែន ដោយគ្មានច្បាប់អនុញ្ញាតចំនួន ៣២នាក់ ក្នុងនោះស្រី ១៥នាក់ ។ បច្ចុប្បន្នរថយន្តនិងអ្នកបើកបរ ត្រូវបានកំលាំងជំនាញថៃ បញ្ជូនទៅកាន់ស្នងការដ្ឋាន ដើម្បីចាត់ចែងតាមនិតិវិធី ដោយឡែកពលករខ្មែរទាំងអស់ គឺតម្រូវអោយធ្វើកិច្ចសន្យាដើម្បីបញ្ជូនអោយវិលត្រឡប់ទៅកាន់ស្រុកកំណើតរៀងៗខ្លួនវិញ ៕
