រតនគីរី៖ នៅថ្ងៃទី២១ ខែមេសា ឆ្នាំ២០១៧ វេលាម៉ោង១១និង៤៥នាទីយប់ អាជ្ញាធរស្រុកសហការណ៍ជាមួយប៉េអឹមស្រុក ចុះបង្ក្រាបរថយន្តកែច្នៃចំនួន៣គ្រឿង នៅចំណុចភូមិប្លង់ ឃុំប៉ាតេ ស្រុកអូរយ៉ាដាវ បម្រុងលោតតឆត្រដឹកឈើទៅលក់នៅប្រទេសវៀតណាមតាមច្រករបៀងភ្នំក្រហម ស្រុកអូរយ៉ាដាវ ខេត្តរតនគីរី។
ទាក់ទិននិងករណីខាងលើ លោកសុខ មីន មេបញ្ជាការប៉េអឹមស្រុកអូរយ៉ាដាវ បានអោយដឹងថា ដោយមានបញ្ជាពីលោកជា ពេជ្រ ព្រះរាជអាជ្ញាសាលាដំបូងខេត្តរតនគិរី ទើបលោកដឹកនាំកម្លាំងប៉េអឹមស្រុក និងអាជ្ញាធរស្រុកអូរយ៉ាដាវ បានចុះចាប់រថយន្តកែច្នៃចំនួន៣គ្រឿង ផ្ទុកឈើកម្រដែលមានមុខកាត់៥០ ,៦០ ប្រវែង៣ទៅ៤ម៉ែត្រ បំណងយកទៅលក់នៅប្រទេសវៀតណាម តាមច្រករបៀងខាងលើ។
លោកសុខ មីន បានបន្តទៀតថា បច្ចុប្បន្នវត្ថុតាងមានទាំងរថយន្តនិងឈើ បានយកមករក្សាទុកនៅផ្នែករដ្ឋបាលព្រៃឈើស្រុកបរកែវ តាមចំនួនពិតប្រាកដ មិនទាន់ធ្វើការវាស់វែងនៅឡើយនោះទេ ចំណែកតៃកុងរថយន្តទាំង៣នាក់បានរត់គេចខ្លួនបាត់។
បើតាមប្រភពពត៌មាន ពីប្រជាពលរដ្ឋនៅតំបន់ភូមិឃុំខាងលើ បានអោយដឹងថាមួយយប់ៗ មានរថយន្តកៃឆ្នៃដឹកឈើជាច្រើនគ្រឿង ដែលឆ្លងកាត់តាមច្រករបៀងភ្នំក្រហមនេះ ហើយឃើញមានរថយន្តសេរីទំនើបពាក់ផ្លាកលេខ.ខ ម. និង.ន ប កាងពីក្រោយរថយន្តដឹកឈើ។ចំណែកច្រករបៀងភ្នំក្រហមជាច្រកមួយ យ៉ាងសំខាន់ ដែលឈ្មួញដឹកជញ្ជូនឈើគ្រប់ប្រភេទ យកទៅលក់អោយប្រទេសវៀតណាមយ៉ាងគគ្រឹកគគ្រេញងដោយរលួន៕
