ខេត្តបន្ទាយមានជ័យ៖ កាលពីវេលាម៉ោង៣និង៣០នាទីទាបភ្លឺ ឈានចូលថ្ងៃទី១៦ ខែមេសា ឆ្នាំ២០១៧កន្លងទៅថ្មីៗនេះ តូបរបស់អាជីវកខ្មែរដែលលក់ដូរនៅផ្សារស្បែកជើង ផ្សាររោងក្លឿ ស្រុកអារញ្ញប្រាថេត ខេត្តស្រះកែវ ប្រទេសថៃ ចំនួន២០តូប ត្រូវបានអគ្គីភ័យលេបត្របាក់នៅសល់តែគ្រោងឆ្អឹងតូប។
ព័ត៌មានចុងក្រោយដែលទទួលបាន គឺការឆាបឆេះនេះ បណ្តាលមកពីទុស្សេខ្សែភ្លើងយ៉ាងពិតប្រាកដ ដោយសារ ខ្សែភ្លើងនោះមានសភាពចាស់។ចំណែកសម្ភារៈដែលរងការឆេះខូចខាតទាំងស្រុង បើគិតជាទឹកប្រាក់សរុបអស់ប្រហែល២០លានបាត នេះបើយោងតាមការឲ្យដឹងពីសមត្ថកិច្ចប្រទេសថៃ។
គួរំលឹកដែរថា កាលពីវេលាម៉ោង៣និង៣០នាទីទាបភ្លឺ ឈានចូលថ្ងៃទី១៦ ខែមេសា ឆ្នាំ២០១៧កន្លងទៅនេះ មានហេតុការណ៍គួរឲ្យភ្ញាក់ផ្អើលមួយ បានកើតឡើងដោយមានអគ្គីភ័យបានលេបត្របាក់តូបរបស់អាជីវករខ្មែរលក់ស្បែកជើង នៅសល់តែគ្រោងឆ្អឹង ខណ:ដែលអាជីវករខ្មែរទាំងនោះបានចាកចេញទៅស្រុកកំណើត ដើម្បីជូបជុំបងប្អូននិងឪពុកម្តាយ ក្នុងឳកាសបុណ្យចូលឆ្នាំខ្មែរប្រពៃណីជាតិ។
ហេតុការណ៍នេះបានកើតឡើងនៅ ចំណុចផ្សារស្បែកជើងជជុះផ្សាររោងក្លឿ ស្រុកអារញ្ញ ខេត្តស្រះកែវ ប្រទេសថៃ។បន្ទាប់ពីកើតហេតុភ្លាមមក កម្លាំងសមត្ថកិច្ចថៃចំរុះជាច្រើននាក់ បានចុះជួយអន្តរាគមន៍និងហៅរថយន្តពន្លត់អគ្គីភ័យជាច្រើនគ្រឿង ដើម្បីធ្វើការបាញ់ពន្លត់ រហូតដល់វេលាម៉ោងជាង៥ទាបភ្លឺ ទើបភ្លើងបានរលត់ទាំងស្រុងតែម្តង៕
