ខេត្តរតនគិរី៖គោយន្តកែឆ្នៃមួយគ្រឿងដឹកឈើប្រភេទសុក្រម ត្រូវបានកម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្តរតនគីរី ចុះស្រាវជ្រាវបង្ក្រាបបាន នៅថ្ងៃទី17 ខែមេសា ឆ្នាំ2017 វេលាម៉ោង21:30នាទី ស្ថិតនៅភូមិតាអង2 ឃុំតាអង ស្រុកកូនមុំ ខេត្តរតនគីរី។
ដោយសារការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានទទួលព័ត៌មានពីកម្លាំងសំងាត់ មានគោយន្តកែច្នៃលួចដឹកឈើសុក្រមខុសច្បាប់មួយគ្រឿង ស្ថិតនៅភូមិ ឃុំខាងលើ ទើបឈានដល់មានការចុះទៅស្រាវជ្រាវរុករកប្រទះឃើញ ឈើសុក្រមចំនួន17ដុំ ស្មើនឹង 3,951ម៉ែត្រគូប នៅលើគោយន្តកែច្នៃមួយគ្រឿងនោះ រីឯអ្នកបើកបររត់គេចខ្លួនបាត់ភ្លាមៗផងដែរ។
បច្ចុប្បន្ន វត្ថុតាងទាំងឈើនិងគោយន្ត សមត្ថកិច្ចបានធ្វើកំណត់ហេតុ ប្រគល់អោយទៅផ្នែករដ្ឋបាលព្រៃឈើលំផាត់ ដើម្បីចាត់ការបន្តតាមនីតិវិធីច្បាប់ព្រៃឈើ៕
