បាត់ដំបង៖ ពិធីនេះប្រព្រឹត្តក្រោមវត្តមាន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានវត្តមានចូលរួមពីឯកឧត្តម លោកជំទាវ លោកនិងលោកស្រី អញ្ជើញមកពីមន្ទីរស្ថាប័ននានា និងឯកឧត្តម គណៈប្រតិភូអមដំណើរ សរុប៣០០០នាក់ នាព្រឹកថ្ងៃទី០២ ខែមេសា ឆ្នាំ២០១៧ នៅ សាលមហោស្រព ស្ទឹងសង្កែ ក្នុងភូមិចំការសំរោង ឃុំចម្ការសំរោង ក្រុងនិងខេត្តបាត់ដំបង។
ក្នុងពិធីសំណេះសំណាល ជាមួយបេក្ខជន ឈរឈ្មោះបោះឆ្នោតក្រុមប្រឹក្សាឃុំសង្កាត់អាណត្តិទី៤នោះ សម្តេចសង្កត់ធ្ងន់ថា ក្រុមការងារគណបក្សគ្រប់ថ្នាក់ និងបេក្ខជន ក្រុមប្រឹក្សាឃុំសង្កាត់របស់គណបក្ស ត្រូវប្តេជ្ញាចិត្តជំនះ គ្រប់ឧបសគ្គគ្រប់បែបយ៉ាង ដើម្បីដណ្ដើមយកជ័យជម្នះ ក្នុងការបោះឆ្នោត ជ្រើសរើស ក្រុមប្រឹក្សាឃុំសង្កាត់
អាណត្តិទី៤ នាពេលខាងមុខអោយបានដាច់ខាតដោយត្រូវបន្តយកចិត្តទុកដាក់ អនុវត្តការងារសំខាន់ៗមួយចំនួន។
ពង្រឹងសន្តិសុខ និងសណ្ដាប់ធ្នាប់របៀបរៀបរយ អោយបានល្អប្រសើរ។យកចិត្តទុកដាក់ ជួយ
ដោះស្រាយអោយដល់គ្រួសារប្រជាពលរដ្ឋ ដែលរងការប៉ះពាល់អំពើហិង្សាក្នុងគ្រួសារ គ្រឿងញៀន និងរងគ្រោះថ្នាក់ផ្សេងៗទៀត។
មន្ត្រីដឹកនាំគ្រប់ផ្នែក គ្រប់ថ្នាក់ ត្រូវត្រួតពិនិត្យអបរំមន្ត្រីក្រោមឱវាទ អោយបំរើប្រជាពលរដ្ឋដោយសុច្ចរិតស្មោះត្រង់ និងគោរពស្រឡាញ់ប្រជាជន ។
គណកម្មាធិការបក្សមូលដ្ឋាន សាខាគណកម្មាធិការបក្ស មន្ទីរ អង្គភាព គ្រឹះស្ថាននានាជុំវិញគណបក្សខេត្ត ក្រុងស្រុក ត្រូវជំរុញណែនាំមន្ត្រីបក្ស អោយចុះជួយមូលដ្ឋាន អស់ពីសមត្ថភាពនិងលទ្ធភាព។
ពង្រឹងការទទួលខុសត្រូវ និងការអនុវត្ត តួនាទីភារកិច្ចរបស់ ក្រុមប្រឹក្សាឃុំសង្កាត់ ក្នុងតំណែងអោយបន្តកិច្ចការរបស់ខ្លួន ដើម្បីសម្រេចបានរាល់ភារកិច្ច ផែនការ ដែលក្រុមប្រឹក្សាខ្លួនបានអនុម័តរួចហើយ។
បេក្ខភាព ឃុំ សង្កាត់ គណបក្សឃុំ សង្កាត់និងក្រុមការងារគណបក្ស ចុះជួយឃុំ សង្កាត់ ត្រូវពិភាក្សា ឯកភាពគ្នា កសាងផែនការសកម្មភាព និងប្រតិទិនប្រចាំ១៥ម្តង ដោយផ្តោតសំខាន់លើ ការងារអបរំសតិអារម្មណ៍ រួមផ្សំការងារ កសាងសមាជិកបក្សបន្ថែម។ធ្វើសកម្មភាពដល់ខ្នងផ្ទះគ្រួសារសមាជិកបក្សនិងខ្នងផ្ទះប្រជាពលរដ្ឋទូទៅ៕
