ខេត្តតាកែវ៖ ឈ្មួញឈើឈ្មោះ ស៊ី ស ជនជាតិវៀតណាម ដែលត្រូវជាកូនប្រសារលោកឆេង ឡុង ធ្លាប់សមត្ថកិច្ចបង្ក្រាបចាប់ឈើ និងឆែកឆេរលំនៅឋាន នៅខេត្តកំពង់ស្ពឺនោះ បានបន្តជំនួញឈើសារជាថ្មីនិងដោយរលូន ដោយមិនព្រឺរោមបន្តិចណាសោះ ជាមួយអាជ្ញាធរ សមត្ថកិច្ចពាក់ព័ន្ធទាំងខេត្តកំពង់ស្ពឺ និងខេត្តតាកែវ ។
សេចក្តីរាយការណ៍ពីភ្នាក់ងារពិសេសបានឲ្យដឹងថា នៅវេលាម៉ោង៤រសៀល ថ្ងៃទី៣១ ខែមីនា ឆ្នាំ២០១៧ រថយន្តដឹកឈើម្រេញរបស់ឈ្មួញ ស៊ី ស ពណ៌ស ពាក់ស្លាកលេខ ភ្នំពេញ 3A-9564 ផ្ទុកឈើម្រេញពេញប្រៀប បានមកដល់ចំណុចទ្រុងមាន់ ម្តុំភ្នំតាម៉ៅ ដើម្បីឆ្ពោះទៅកាន់ច្រកបាក់ដៃ ខេត្តតាកែវ បន្តលើកដាក់ទូកឆ្លងទៅប្រទេសវៀតណាម ។
នៅយប់នេះផងដែរ ឈ្មួញស៊ី ស នឹងមានគម្រោងចេញឈើជាច្រើនឡានទៀត បន្ទាប់ពីមានអ្នករត់ការ ឈ្មោះជាតិ និងឈ្មោះ ឡាយ ណារិទ្ធ ស្នងការរងខេត្តតាកែវ ទទួលបន្ទុកនគរបាលបង្ក្រាបបទល្មើសសេដ្ឋកិច្ច និងត្រូវជាបងបង្កើតរបស់លោកឡាយ វណ្ណៈ អភិបាលនៃគណៈអភិបាលខេត្តតាកែវរួចរាល់ហើយនោះ ។
ខេត្តតាកែវ កំពុងក្លាយទៅជាតំបន់ឆ្លងកាត់ឈើម្រេញ និងឈើប្រណីតជាច្រើនទៀត ទៅប្រទេសវៀតណាម បន្ទាប់ពីអភិបាលខេត្តមានភាពធូរលុង ក្នុងនោះសូម្បីតែសាច់ញាតិរបស់គាត់ មានតួនាទីជាសមត្ថកិច្ច ក៏ជាអ្នកចូលរួមចំណែក ក្នុងបទល្មើសដឹកជញ្ជូនឈើនេះ ក្នុងនាមជាអ្នករត់ការផ្លូវ សម្រាប់បែងចែកប្រភពសេដ្ឋកិច្ចទៅកាន់អាជ្ញាធរ សមត្ថកិច្ច និងជំនាញពាក់ព័ន្ធ ជាលក្ខណៈចំហរថែមទៀត ។
លោកឡាយ វណ្ណៈ អភិបាលនៃគណៈអភិបាលខេត្តតាកែវ មិនអាចទាក់ទងបានទេនៅរសៀលថ្ងៃទី៣១ ខែមីនា ឆ្នាំ២០១៧ ដើម្បីសុំការបំភ្លឺ ៕
