កោះកុង៖ អាជ្ញាធរនៅស្រុកគីរីសាគរ ខេត្តកោះកុង បានឃុបឃិតគ្នាជាប្រព័ន្ធ បើកដៃស៊ីញ៉េអោយលោក ម៉េង ផល្លា ភេទប្រុស អាយុ៣៣ឆ្នាំ ធ្វើរោងចក្រផលិតទឹកកកដើមនៅក្នុងសមុទ្រដោយមិនខ្លាចផលប៉ះពាល់ដល់បរិស្ថាន ដែលរោងចក្រនេះបង្ហូរកាកសំណល់មានជាតិគីមីចូលក្នុងទឹកសមុទ្រទេ អោយតែបានលុយដាក់ហោប៉ៅ។
ប្រជាពលរដ្ឋបានរិះគន់ទៅលើលោក ភើយ កែ ជាមេឃុំកោះស្ដេច នឹង លោក ឃឹម ច័ន្ទឌី ចៅហ្វាយស្រុកគីរីសាគរតែម្ដង មិនគួរស៊ីញ៉្ញេអោយគេធ្វើរោងចក្រទឹកកកនៅលើទឹកសមុទ្រទេ វាធ្វើអោយប៉ះពាល់ដល់បរិស្ថានក្នុងបាតសមុទ្រនិងទឹកសមុទ្រ ជាពិសេសប៉ះពាល់ដល់ត្រីក្ដាមបង្គារគ្រប់បែបយ៉ាង ព្រោះកាកសំណល់នឹងធ្លាក់ចូលក្នុងទឹកសុទ្ធតែមានជាតិគីមី។
ប្រជាពលរដ្ឋបានរិះគន់បន្តទៀតថា សព្វថ្ងៃនៅលើកោះស្ដេច មានរោងចក្រទឹកកករបស់ថៅកែឈ្មោះតា អួនចេសឡាន មួយហើយ ហេតុអីបានជាចៅហ្វាយស្រុក ស៊ីញ៉េអោយគេធ្វើរោងចក្រទឹកកកមួយទៀតបើនៅលើកោះស្ដេចទាំងមូល មានប្រជាពលរដ្ឋរស់នៅតែ៧០០គ្រួសារ មានប្រជាពលរដ្ឋទាំងចាស់ទាំងក្មេង៣០៣០នាក់តែប៉ុណ្ណោះ។
កន្លងមក រាជរដ្ឋាភិបាលបានដាក់គោលការណ៏ហាមជាដាច់ខាតមិនអោយមានរោងចក្រសិប្បកម្មកែឆ្នៃផ្សេងៗទាំងអស់សង់នៅលើទឹក មិនថានៅទន្លេឫសមុទ្រទេ គឺមិនអនុញ្ញាតអោយសាងសង់ទេ បើអាជ្ញាធរណាហ៊ានស៊ីញ៉េឫចេញប័ណ្ណកម្មសិទ្ធអោយ អ្នកនោះនឹងត្រូវផ្ដន្ទាទោសតាមផ្លូវច្បាប់ជាមិនខានបើលក្ខណៈធ្ងន់ធ្ងរ អាចឈានទៅដល់ការចាប់ខ្លួនដាក់ពន្ធនាគារទៀតផង។
ប្រជាពលរដ្ឋរិះគន់ទៀតថា ការឃុបឃិតគ្នាជាប្រពន្ធ័រវាងមេឃុំ ចៅហ្វាយស្រុក និងអ្នកពាក់ពន្ធ័នៅក្នងស្រុក នៅតែមានបន្តកើតឡើង មិនខ្លាចនិងញញើតច្បាប់ទេ អោយតែបានលុយដាក់ហោប៉ៅធ្វើមានធ្វើបានមិនគឹតដល់ផលប្រយោជន៌ជាតិ នឹងផលប៉ះពាល់សង្គមទេ មិនតែប៉ុណ្ណោះទេ ហ៊ានផ្គើននឹងអនុសាសន៏ប្រមុខថ្នាក់ដឹកនាំរាជរដ្ឋាភិបាល ដែលសម្តេចខិតខំធ្វើល្អបំរើប្រជាពលរដ្ឋ ការពារបរិស្ថានជូនប្រជាពលរដ្ឋ តែអស់លោកបែរជានាំគ្នាបំផ្លាញបរិស្ថានទៅវិញ។
សូមអោយលោក ប៊ុន លើត អភិបាលខេត្តកោះកុង និងលោកប្រធានមន្ទីបរិស្ថានខេត្ត ពិនិត្យបញ្ហាសង់រោងចក្រទឹកកកនៅក្នុងសមុទ្រផង នឹងយកលោក ឃឹម ច័ន្ទឌី ចៅហ្វាយស្រុកគីរីសាគរ នឹងលោក ភើយ កែ មេឃុំកោះស្តាច់ ទៅដុសក្អែល ឆ្លុះកញ្ចក់ចេញម្ដងហើយ កុំឲ្យធុំខ្លឹនដល់គេឯង៕(ដោយយួនឈីវ)
