ខេត្តរតនគិរី៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្តសហការណ៍ជាមួយកម្លាំងផ្នែករដ្ឋបាលព្រៃឈើ និងកម្លាំងនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្ត បានចាប់រថយន្តកាមរីហើម ដឹកឈើប្រណិតកាលពីវេលាម៉ោង១១នឹង១០នាទី ព្រឹកថ្ងៃទី២៣ ខែមិនា ឆ្នាំ២០១៧ ស្ថិតនៅក្នុងភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគីរី។
មន្ត្រីនគរបាលបានឲ្យដឹងថា រថយន្តម៉ាកកាមរីហើម ពណ៌ទឹកប្រាក់ ពាក់ស្លាកលេខ ភ្នំពេញ2A-8578 បានដឹកជញ្ជូនឈើប្រណិត ចូលក្រុងបានលុង ក៍ជួបគ្រោះថ្នាក់ចរាចរណ៍ រវាងរថយន្តនឹងរថយន្ត ហើយបានរកឃើញ ឈើប្រណិតប្រភេទធ្នង់ចំនួន៦៩ដុំ ស្មើនឹង៥១០គីឡូក្រាម ចំណែកជនបង្កបានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ។
រីឯរថយន្តមួយគ្រឿងទៀត មិនត្រូវបានសមត្ថកិច្ចប្រាប់ឲ្យដឹងនោះទេ គេសង្ស័យថា ជារថយន្តរបស់សមត្ថកិច្ច ដែលដេញតាមបង្ក្រាប រវាងរថយន្តដឹកឈើនឹងរថយន្តរបស់សមត្ថកិច្ច។
ក្រោយពីកើតហេតុ កម្លាំងនគរបាលចរាចរណ៍ជើងគោក នៃស្នងការដ្ឋាននគរបាលខេត្ត បានចុះមកអន្តរាគមន៍នឹង យករថយន្តបង្កទៅការិយាល័យនគរបាលចរាចរណ៍ខេត្ត។
បច្ចុប្បន្នឈើទាំងនោះ នគរបាលប្រឆាំងបទល្មើសសេដ្ឋកិច្ចខេត្ត បានធ្វើកំណត់ហេតុ ប្រគល់ទៅឲ្យជំនាញផ្នែករដ្ឋបាលព្រៃឈើលំផាត់ ដើម្បីចាត់ការបន្តតាមនីតិវិធីច្បាប់។
