ខេត្តក្រចេះ៖ ថ្ងៃទី១៥ ខែមីនា ឆ្នាំ២០១៧ នៅចំនុចតំបន់ព្រៃសហគមន៍ព្រែកទឹកខ្មៅ និងត្រពាំងថ្វាង ក្នុងភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ កម្លាំងមន្ត្រីផ្នែករដ្ឋបាលព្រៃឈើព្រែកប្រសព្វ សង្កាត់រដ្ឋបាលព្រៃឈើជ្រោយបន្ទាយ សហការជាមួយកម្លាំងនគរបាលប៉ុស្តិដឹកនាំដោយលោក អោក ដារុណ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ទទួលបន្ទុកបង្ក្រាបបទល្មើសព្រៃឈើ បាន ចុះធ្វើការឃាត់ចាប់ ឈើលេខ១ប្រភេទសុក្រមចំនួន២៤ដុំ មានបណ្តោយ៣មទៅ៤ម៉ែត្រ និងមុខកាត់៣តឹកទៅ៤តឹក ។
លោក អ៊ិន ស៊ីណាង នាយផ្នែករដ្ឋបាលព្រៃឈើព្រែកប្រសព្វបានអោយដឹងថា តាមការផ្តលព័ត៏មាន អោយដឹងពីប្រជាពលរដ្ឋ ឈើទាំងអស់ដែលសមត្ថកិច្ចចាប់ឃាត់ខាងលើ គឺជាប្រភេទឈើលេខ១សុក្រម ដែលជនល្មើសលួចកាប់ដឹកចេញពីក្នុងតំបន់ព្រៃឡង់ (ព្រៃអភិរក្ស ) ដោយលាក់ទុកនៅក្បែរតំបន់ព្រៃសហគមន៍ព្រែកទឹកខ្មៅ និងត្រពាំងថ្វាងជាច្រើនរយកំណាត់ ។
ប៉ុន្តែជាក់ស្តែងពេលកម្លាំងចម្រុះមកដល់ ឃើញតែជាង២០កំណាត់ប៉ុណ្ណោះ ហើយក៏សម្រេចឃាត់ចាប់ និងដឹកជញ្ជូនមករក្សាទុកនៅ សង្កាត់រដ្ឋបាលព្រៃឈើជ្រោយបន្ទាយ ដើម្បីចាត់ការតាមនីតិវិធី ចំណែកម្ចាស់ឈើគឺរត់គេចខ្លួនបាត់ ។
លោក ប៉ុក វណ្ណា នាយសង្កាត់រដ្ឋបាលព្រៃឈើព្រែកប្រសព្វបានអោយដឹងថា ក្រោយពីដឹកឈើទាំងអស់ខាងលើ មកដល់ស្នាក់ការសង្កាត់ សមត្ថកិច្វជំនាញបានកសាងសំណុំរឿង ធ្វើការចោទប្រកាន់តាមច្បាប់ស្តីពីព្រៃឈើ ហើយនៅព្រឹកថ្ងៃទី១៦នេះ សមត្ថកិច្ចបានធ្វើការវាស់វែង ដោយឃើញថាឈើនេះមានបរិមាណជិត ១១ ម៉ែត្រគូប ៕
