ខេត្តកណ្តាល ៖គេសង្កេតឃើញថា បទបញ្ជាលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ក្នុងការបើក យុទ្ធនាការទប់ស្កាត់និងបង្ក្រាបបទល្មើសល្បែងស៊ីសងខុសច្បាប់ គ្រប់ប្រភេទនៅទូទាំងប្រទេសកម្ពុជា ពីសំណាក់សមត្ថកិច្ចមូលដ្ឋានពាក់ព័ន្ធ មានប្រសិទ្ធភាពខ្ពស់ ក្នុងការទប់ស្កាត់និងបង្ក្រាប ដើម្បីអនុវត្តន៏ គោលនយោបាយ ភូមិ-ឃុំ មានសុវត្ថភាពទាំង៩ចំណុច របស់រាជរដ្ឋាភិបាលកម្ពុជា និងរក្សាសន្តិសុខសង្គម សណ្តាប់ធ្នាប់ជូនប្រជាពលរដ្ឋ។
ប៉ុន្តែបទបញ្ជាខាងលើនេះ ត្រូវបានមហាជនកំពុងតែរិះគន់យ៉ាងខ្លាំងក្លា ទៅលើអាជ្ញាធរនិងសមត្ថកិច្ចស្រុកល្វាឯម រួមទាំងអាជ្ញាធរខេត្តកណ្តាលថា មិនខ្វាយខ្វល់និងមិនហ៊ានបង្ក្រាប បទល្មើសល្បែងសងស៊ីសងខុសច្បាប់ នៅក្នុងបរិវេណដីរបស់លោកតាហ៊ុន សាន បងប្រុសបង្កើតរបស់ សម្តេចតេជោហ៊ុន សែន នាយករដ្ឋមន្ត្រី នៅ ផ្លូវចូលវត្តខ្សាច់ពោធិអារ្យ ភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល ដែលកំពុងលេងយ៉ាងអាណាធិបតេយ្យ ពុំខ្វល់និងបទបញ្ជារបស់ឧបនាយករដ្ឋមន្ត្រី ស ខេងនោះឡើយ។
ប្រជាពលរដ្ឋកំពុងបើកភ្នែកមើលនិងសួរថា ហេតុអ្វីល្បែងបញ្ជល់មាន់ និងអាប៉ោង ក្នុងបរិវេណដីលោកតាហ៊ុនសាន ដែលស្ថិតនៅផ្លូវចូលវត្ត ខ្សាច់ពោធិអារ្យ ភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល លេងបានយ៉ាងរលូនយ៉ាងដូច្នេះ? ឫមួយមានការឃុបឃិតជាមួយមន្ត្រីអាជ្ញាធរ និងសមត្ថកិច្ចក្នុងមូលដ្ឋានទើបអ្វីៗ អាចប្រព្រឹត្តបានដោយរលូនយ៉ាងនេះ នៅក្នុងបរិវេណដីរបស់លោកតាហ៊ុន សាន។
បច្ចុប្បន្ននេះល្បែងស៊ីសងខុសច្បាប់នៅក្នុងបរិវេណផ្ទះ លោកតា ហ៊ុនសាន បាននិងកំពុងតែធ្វើ សកម្មភាពបើកលេង យ៉ាងអនាធិបតេយ្យ ដោយមានក្រុមសន្តិសុខសុទ្ធតែជើងខ្លាំងយាមនិងការពារ ហើយគេមិនដែលឃើញមានមន្ត្រីអាជ្ញាធរ ឬសមត្ថកិច្ចមូលដ្ឋានណាមួយហ៊ានចាត់វិធានការបង្ក្រាបនោះឡើយ ព្រោះគេខ្លាចអំណាច....។
ប្រភពមូយឲ្យដឹងថា សង្វៀនជល់មាន់ខាងលើនេះ គេបើកលេងចំនួន៣ថៃ្ងក្នុងមួយអាទិត្យ គឺថ្ងៃអង្គារ៏ ព្រហស្បត្តិ៏ និងថៃ្ងអាទិត្យ ដោយភ្នាល់លុយចាញ់ឈ្នះរាប់ពាន់រាប់ម៉ឺនដុល្លា ហើយចំណូលរបស់វង់ល្បែងនេះមិនក្រោមពីម៉ឺនដុល្លារឡើយក្នុង១ថ្ងៃ ។
ករណីបើកល្បែងស៊ីសងគ្រប់ប្រភេទនៅក្នុងបរិវេណផ្ទះ លោកហ៊ុន សាន កំពុងតែរីករាលដាលនិងល្បីល្បាញពេញទឹកដីស្រុកល្វាឯម ប៉ះពាល់ដល់កិត្តិយសត្រកូលហ៊ុនដែលមានគុណបំណាច់បំរើជាតិយ៉ាងស្មោះត្រង់ ហើយអាជ្ញាធរនិងសមត្ថកិច្ចចាប់ពីឃុំរហូតដល់ខេត្ត ជាអ្នកទទួលខុសត្រូវបង្រ្កាប ពីព្រោះអស់លោក ជាអ្នកទទួលបទបញ្ជារបស់សម្តេច ស ខេង មកអនុវត្តន៏ហើយបែរជាអស់លោកមិនហ៊ានបង្ក្រាប ល្បែងស៊ីសងទាំងនេះដើម្បីពង្រឹងសន្តិសុខក្នុងសង្គម។
ពាក់ព័ន្ធជុំវិញបទល្មើសល្បែងស៊ីសងខុសច្បាប់ខាងលើនេះ ត្រូវបានមហាជនរង់ចាំមើល និងសំណូមពរ
ទៅសម្តេចនាយករដ្ឋមន្ត្រី ហ៊ុន សែនថា វាល្មមដល់ពេលហើយ មិនគួរ ព្រងើយកន្តើយចំពោះ បទល្មើសល្បែងស៊ីសងខាងលើនេះដល់ពេលណាទៀតទេ ដែលប្រជាជនគេពេបជ្រាយ ខណះពេលដែលយុទ្ធនាការទប់ស្កាត់ បទល្មើសល្បែងស៊ីសងខុសច្បាប់គ្រប់ប្រភេទ នៅទូទាំងប្រទេស ត្រូវបានបង្ក្រាបដូចភ្លៀងរលឹម បែរជានៅក្នុងបរិវេណផ្ទះលោកតា ហ៊ុន សាន ហ៊ានបើកលេង សង្វៀនជល់មាន់និងវង់អាប៉ោងម៉ាសេរី ប្រៀបបីដូចជាកាស៊ីណូអត់ច្បាប់អាងខ្សែមួយទៅហើយនោះ។
យើងពុំអាចទំនាក់ទំនងសុំការបំភ្លឺ ពីម្ចាស់សង្វៀនខាងលើបានឡើយ តែនឹងព្យាយាមនៅពេលក្រោយ ៕
