ខេត្តរតនគិរីៈក្រោយពីកើតមានខ្យល់កន្រ្តាក់ កាលពីព្រលប់ថ្ងៃទី១៤ ខែមិនារបាយការណ៍បឋមរបស់នគរបាលខេត្តរតនគិរីអោយដឹងថាៈ លំនៅដ្ឋានប្រជាពលរដ្ឋ សាលារៀន និងផ្លាកគណបក្សនយោបាយ បានរងការខូចខាតយ៉ាងដំណំ ក្នុងនោះស្រ្តីម្នាក់ក៏រងនូវការចឹកពីសត្វពស់មានពិសផងទៀត។
ឃុំចំនួន៣ នៅក្នុងស្រុកវ៉ើនសៃ ត្រូវខ្យល់គួចដំបូលផ្ទះប្រជាពលរដ្ឋចំនួន០៦ខ្នង ក្នុងនោះឃុំប៉ាកាឡាន់ចំនួន០៤ខ្នង ឃុំភ្នំកុកចំនួន១ខ្នង និងឃុំកាចូនចំនួន១ខ្នង ក្រៅពីនោះ ផ្លាកសាលារៀន១បានធ្លាក់ចុះដី ជាមួយគ្នានោះក៏មានស្រ្តីម្នាក់រងគ្រោះ ដោយសារសត្វពស់មានពិសចឹកផងដែរ តែមិនបាត់បង់ជីវិតទេ ។ ជនរងគ្រោះត្រូវគេបញ្ជូនទៅព្យាបាលនៅផ្ទះគ្រូពេទ្យបុរាណ។ ដោយឡែកនៅឃុំវ៉ើនសៃ ផ្លាកគណបក្សនយោបាយចំនួន២ ក៏ត្រូវខ្យល់គួចធ្លាក់ដល់ដីផងដែរ។
សូមរំលឹកថា ខ្យល់កន្រ្តាក់បានកើតមានក្នុងស្រុកវ៉ើនសៃ ខេត្តរតនគិរីនេះ គឺបន្ទាប់ពីក្រសួងធនធានទឹកនិងឧតុនិយម បានចេញផ្សាយព័ត៌មានតាមទំព័រហ្វេសប៊ុក កាលពីថ្ងៃទី០៦ ខែមិនាកន្លងទៅ ដោយសូមអោយមានការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្រ្តាក់ ដែលអាចនឹងកើតមានឡើងនៅពេលមេឃរកកលភ្លៀង ពិសេសនៅតាមតំបន់វាលទំនាប៕
